កីឡា

ហេតុផលចម្បងដែលនាំឲ្យក្លិប Juventus ត្រូវបានកាត់ ១៥ ពិន្ទុ នៅលីគកំពូលអ៊ីតាលី

បានផុស

១ year មុន

នៅ

ថ្ងៃចន្ទ ២៣ មករា ២០២៣

ដោយ

សហព័ន្ធបាល់ទាត់ជាតិ (FIGC) បាននិយាយកាលពីថ្ងៃសុក្រថា Juventus ត្រូវកាត់ចេញ ១៥ ពិន្ទុ សម្រាប់រដូវកាលបច្ចុប្បន្នដោយតុលាការបាល់ទាត់អ៊ីតាលី ដែលស៊ើបអង្កេតលើកិច្ចព្រមព្រៀងផ្ទេរកីឡាកររបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងមួយដែលត្រូវបានលើកឡើងគឺរវាង Juventus និង Barcelona បានឃើញកីឡាករ Miralem Pjanic ផ្លាស់ទៅក្លិប Barcelona នេះ ហើយក៏ដូចជាកីឡាករ Arthur Melo នៅឆ្នាំ ២០២០។

ព្រះរាជអាជ្ញា នៃទីក្រុង Turin ក៏បានរកឃើញការបង់ប្រាក់សម្ងាត់បន្ថែមទៀតដល់អតីតកីឡាករ Cristiano Ronaldo ដែលមិនត្រូវបានរាយការណ៍ដោយក្លិប។

ជាមួយនឹង ២០ ប្រកួត ដែលនៅសល់ក្នុងរដូវកាលនេះ Juventus ឈរនៅលេខ ៣ ក្នុងលីគកំពូលអ៊ីតាលី (Serie A) ដោយមាន ៣៧ ពិន្ទុ តាមពីក្រោយក្រុមកំពូលតារាង Napoli ១០ ពិន្ទុ។ ការកាត់ចេញនេះជំរុញឲ្យពួកគេធ្លាក់ទៅក្នុងចំណាត់ថ្នាក់លេខ ១០ ដែលនៅខាងក្រៅកន្លែងជម្រុះសម្រាប់ការប្រកួតប្រជែងពានទ្វីបអឺរ៉ុប។

នៅក្នុងសេចក្ដីថ្លែងការណ៍ តុលាការ ក៏បានដាក់បម្រាមមិនឲ្យកាន់តំណែងក្នុងបាល់ទាត់អ៊ីតាលី ចំពោះនាយកក្លិប Juventus ទាំង ១១ នាក់ ទាំងកាលពីអតីតកាល និងបច្ចុប្បន្ន។

Juventus បាននិយាយថា ខ្លួននឹងប្ដឹងទៅក្រុមប្រឹក្សាភិបាលធានាកីឡារបស់ប្រទេសនេះ នៅពេលដែលហេតុផល នៃសេចក្ដីសម្រេចនេះត្រូវបានប្រកាស។

មេធាវីរបស់ក្លិបបាននិយាយនៅក្នុងសេចក្ដីថ្លែងការណ៍មួយថា “យើងចាត់ទុកនេះថាជាអំពើអយុត្តិធម៌មួយផងដែរសម្រាប់អ្នកគាំទ្ររាប់លាននាក់ ដែលយើងជឿជាក់ថា នឹងត្រូវបានដោះស្រាយក្នុងពេលឆាប់ៗនេះនៅក្នុងតុលាការបន្ទាប់”។

Juventus បានបដិសេធមិនធ្វើខុស ហើយបាននិយាយថា គណនីរបស់ពួកគេគឺស្របតាមស្តង់ដារឧស្សាហកម្ម។

ក្លិបនេះត្រូវបានគ្រប់គ្រងដោយក្រុមហ៊ុនកាន់កាប់ Exor របស់គ្រួសារ Agnelli ហើយភាគហ៊ុនរបស់វាត្រូវបានចុះបញ្ជីនៅលើផ្សារហ៊ុន Milan។

អាជ្ញាធរបាល់ទាត់ បានបើកករណីនេះឡើងវិញ និងបានស្នើសុំការលុបចោលផ្នែកខ្លះ នៃការសម្រេចចិត្តដំបូង ដូច្នេះពួកគេអាចវាយតម្លៃឯកសារថ្មីដែលប្រមូលបានដោយរដ្ឋអាជ្ញាសាធារណៈនៅទីក្រុង Turin ដែលកំពុងស៊ើបអង្កេតហិរញ្ញវត្ថុរបស់ Juventus៕

ប្រភព ៖ espn.com

អត្ថបទ ៖ មន្នីរ័ត្ន