កីឡា

ស្ថាប័នប្រដាល់សកលអាស៊ី សរសើរកម្ពុជាឈានដល់របត់ថ្មីគួរឲ្យចាប់អារម្មណ៍

បានផុស

២ years មុន

នៅ

ថ្ងៃព្រហស្បតិ៍ ២ កុម្ភៈ ២០២៣

ដោយ

សហព័ន្ធកីឡាប្រដាល់សកលអាស៊ី (Asian Boxing Confederation) បានកោតសរសើរវិស័យកីឡាប្រដាល់សកលកម្ពុជា បន្ទាប់ពីកីឡាករ រ៉ាចាពៅ អាប់ដុលឡា បានក្លាយជាកីឡាករកម្ពុជាដំបូងគេបង្អស់ក្នុងការឈានដល់វគ្គផ្តាច់ព្រ័ត្រជើងឯកប្រដាល់សកលអាស៊ី ASBC Asian U22 Boxing Championships ដោយទទួលបានមេដាយប្រាក់ បន្ទាប់ពីចាញ់កីឡាករអ៊ូសបេគីស្ថាន Nusratbek Tokhirov វគ្គផ្តាច់ព្រ័ត្រទម្ងន់៩២គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាប្រដាល់សកលអាស៊ី បានរៀបរាប់ថា កម្ពុជាទទួលបានមេដាយប្រាក់២គ្រឿង និងសំរឹទ្ធ១គ្រឿងក្នុងប្រវត្តិសាស្ត្រប្រដាល់សកលរបស់ខ្លួននៅកីឡា«ទ្វីបអាស៊ី Asian Games»ចន្លោះឆ្នាំ១៩៦២ និង១៩៧០ ប៉ុន្តែកម្ពុជាមិនធ្លាប់បានឡើងដល់វគ្គផ្តាច់ព្រ័ត្រទេក្នុងជើងឯក ASBC Boxing Championships។

ស៊ីហ្គេមជាព្រឹត្តិការណ៍កីឡាដ៏សំខាន់បំផុតមួយសម្រាប់កម្ពុជា និងជាព្រឹត្តិការណ៍សម្រាប់អត្តពលិកឆ្នើមៗក្នុងតំបន់អាស៊ានប្រជែងមេដាយរាល់ពីរឆ្នាំម្តង។ លោក យូ ជីន ហុង បានឈ្នះមេដាយមាសប្រដាល់សកកដំបូងគេបង្អស់ពីកីឡាស៊ីហ្គេម សម្រាប់កម្ពុជា នៅឆ្នាំ១៩៦១។ បន្ទាប់ពីលោក ស៊ុន សូត្រ និង ខៀវ ស៊ុន ឈ្នះមេដាយមាសនៅឆ្នាំ១៩៦៥។

ស៊ីហ្គេម លើកទី៣២ ឆ្នាំ២០២៣ នឹងរៀបចំនៅកម្ពុជាដែលជាការទទួលធ្វើម្ចាស់ផ្ទះលើកដំបូងនាខែឧសភាខាងមុខនេះហើយកម្ពុជាបានកំពុងអភិវឌ្ឍធនធានយ៉ាងខ្លាំងដើម្បីឆ្ពោះទៅរកមេដាយដ៏ច្រើន។

ប្រធាន ASBC លោក Pichai Chunhavajira បានជួយឧបត្ថម្ភដល់ប្រដាល់សកលកម្ពុជាក្នុងរយៈពេលប៉ុន្មានខែចុងក្រោយនេះដែលជាផ្នែកមួយនៃការអភិវឌ្ឍប្រកបដោយយុទ្ធសាស្ត្រ។ លោក ប៊ុយ សុភ័ណ្ឌ ក៏ជាសមាជិកម្នាក់ក្នុងក្រុមប្រឹក្សាភិបាល ASBC និងជាអគ្គលេខាធិការសហព័ន្ធកីឡាប្រដាល់កម្ពុជាដែលបានរៀបចំកម្មវិធីជាច្រើននាប៉ុន្មានឆ្នាំចុងក្រោយនេះ។

សហព័ន្ធកីឡាប្រដាល់សកលកម្ពុជាបាននាំយកគ្រូបង្វឹកជនជាតិកាហ្សាស្ថាន លោក Berikbol Kassymkhanov រយៈពេលជិតមួយឆ្នាំកន្លងទៅហើយ។ ជាមួយគ្នានេះ អតីតកីឡាករប្រដាល់ជាច្រើនក៏បានវិលមកចូលរួមជាមួយក្រុមជម្រើសជាតិ តាំងពីស៊ីហ្គេម ឆ្នាំ២០១៥ ដែលពេលនោះ កីឡាករ វ៉ែន រដ្ឋា ឈ្នះមេដាយប្រាក់។ កីឡាករប្រដាល់សកលកម្ពុជាបានប្រកួតនៅប្រទេសហ្ស៊កដានី កាហ្សាស្ថាន និងថៃ នាប៉ុន្មានខែចុងក្រោយនេះ ប៉ុន្តែជើងឯកយុវជនអាយុក្រោម២២ឆ្នាំ ASBC Asian U22 Boxing Championships គឺជាព្រឹត្តិការណ៍ប្រកួតដ៏គួរឲ្យកត់សំគាល់សម្រាប់ប្រដាល់សកលកម្ពុជា។

កីឡាករកម្ពុជា រ៉ាចាពៅ អាប់ដុលឡា អាយុទើប២០ឆ្នាំក្នុង ASBC Asian Elite Boxing Championships បានយកឈ្នះកីឡាករគីជីស្ថាន Bakyt Toktosun Uulu នៅវគ្គពាក់កណ្តាលផ្តាច់ព្រ័ត្រ និងបានឡើងទៅកាន់វគ្គផ្តាច់ព្រ័ត្រប្រកួតចាញ់កីឡាករអ៊ូសបេគីស្ថាន Nusratbek Tokhirov ដោយទទួលបានមេដាយប្រាក់ដែលបានក្លាយជាមេដាយប្រាក់លើកដំបូងសម្រាប់កម្ពុជាក្នុងព្រឹត្តិការណ៍អាស៊ីមួយនេះ៕

ប្រែសម្រួល៖ វីរបុត្រ