កីឡា

ស្ថាបនិកគុនខ្មែររុស្ស៊ីប្រាប់ពីការប្រកួតគុនខ្មែរនៅសរុស្ស៊ី

បានផុស

៣ years មុន

នៅ

ថ្ងៃអង្គារ ៧ កុម្ភៈ ២០២៣

ដោយ

ការប្រកួតគុនខ្មែរ Kun Khmer Cup ឆ្នាំ២០២៣ បានបញ្ចប់ហើយ បន្ទាប់ពីការប្រកួតរយៈពេល៣ថ្ងៃចាប់ពីទី៣ ដល់ទី៥ ខែកុម្ភៈនេះនៅប្រទេសរុស្ស៊ី ដែលរៀបចំឡើងដោយសហព័ន្ធកីឡាប្រដាល់គុនខ្មែរប្រចាំប្រទេសរុស្ស៊ី។

លោក Oleg Kudrinsky នាយក និងស្ថាបនិកសហព័ន្ធកីឡាប្រដាល់គុនខ្មែរនៅប្រទេសរុស្ស៊ីបានប្រាប់«កម្ពុជាថ្មី»ថា ការប្រកួតជើងឯកគុនខ្មែរ Kun Khmer Cup ឆ្នាំនេះគឺកម្រិតយុវជនភាគច្រើនដោយមិនទាន់ឈានដល់កម្រិតអាជីពឡើយ។

«ការប្រកួតនេះលក្ខណៈស្ម័គ្រចិត្តដែលមានកីឡាករ កីឡាការិនីប្រហែលជា២០០នាក់មកពីតំបន់ផ្សេងៗនៅក្នុងប្រទេសរុស្ស៊ី។ ប្រហែលជា៧០%ជាកីឡាករ កីឡាការិនីក្មេងៗ ហើយក៏មិនមានការប្រកួតដណ្តើមខ្សែក្រវាត់ ឬពានរង្វាន់ឡើយ។ យើងនឹងរៀបចំការប្រកួតនៅរដូវក្តៅទៀតដែលលើកក្រោយនេះនឹងមានការប្រកួតជើងឯក»។ លោកបានបញ្ជាក់។

លោកបានបន្ថែមថា ទោះបីជាការប្រកួតលក្ខណៈស្ម័គ្រចិត្ត និងមិនទាន់អាជីព ប៉ុន្តែក៏មានមេដាយបំពាក់ដល់ជយលាភីផងដែរ។

និយាយពីប្រដាល់គុនខ្មែរនៅប្រទេសរុស្ស៊ី លោក Kudrinsky បានឲ្យដឹងថា សកម្មភាពប្រដាល់គុនខ្មែរនៅប្រទេសរុស្ស៊ីបានកំពុងរីកចម្រើនច្រើនក្នុងរយៈពេលជាង៥ឆ្នាំកន្លងទៅ ដោយមានក្លឹបតាមតំបន់ និងទីក្រុងជាច្រើនបានចូលជាសមាជិកសហព័ន្ធ ដើម្បីក្លាយជាគ្រួសារកីឡាគុនខ្មែរ។

សូមបញ្ជាក់ថា សហព័ន្ធកីឡាប្រដាល់គុនខ្មែរប្រចាំនៅប្រទេសរុស្ស៊ីត្រូវបានបង្កើតឡើងកាលពីឆ្នាំ២០១៨ ដោយមានលោក Pavel Arais ជាប្រធាន ខ្លួនលោកផ្ទាល់ជានាយក និងជាស្ថាបនិក និងលោក Sergey Babayan ជាអនុប្រធាន ព្រមទាំងមានក្លឹបជាច្រើនជាសមាជិក៕