កីឡា

ច្បាស់ការ! ក្រុមបាល់ទះកម្ពុជា ប៉ះ U-19 បារាំង ថ្ងៃទី១៩ កុម្ភៈនេះ

បានផុស

៣ years មុន

នៅ

ថ្ងៃពុធ ៨ កុម្ភៈ ២០២៣

ដោយ

ក្រុមបាល់ទះជម្រើសជាតិកម្ពុជា គ្រោងនឹងធ្វើការប្រកួតមិត្តភាពអន្ដរជាតិ ជាមួយក្រុមបាល់ទះយុវជនបារាំង អាយុក្រោម ១៩ឆ្នាំ នៅថ្ងៃទី១៩ ខែកុម្ភៈខាងមុខនេះ បន្ទាប់ពីមានជំនួប រវាងប្រមុខថ្នាក់ដឹកនាំសហព័ន្ធ នៃប្រទេសទាំងពីរកាលពីថ្មីៗ។

តាមគម្រោងការប្រកួត ដែលគ្រោងនៅថ្ងៃ១៩ ខែកុម្ភៈ ឆ្នាំ២០២៣ នឹងធ្វើឡើងនៅក្នុងសាលបាល់ទះ ក្នុងវិមាននៃពហុកីឡដ្ឋានជាតិអូឡាំពិក (ស្តាតអូឡាំពិក) ដែលបាននិងកំពុងជួសជុលជិតរួចរាល់ផងហើយដែរ ជាមួយនឹងការនៅសេសសល់តែការក្រាលជ័រតែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះពេលវេលានៃការប្រកួតគឺនឹងចាប់ផ្ដើមនៅវេលាម៉ោង៤នាទីល្ងាច និងមានការលក់សំបុត្រចូលទស្សនាក្នុងតម្លៃ ៨,០០០រៀល។

អគ្គលេខាធិការសហព័ន្ធកីឡាបាល់ទះកម្ពុជា ក៏បានចុះពិនិត្យទីតាំងជាមួយ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា ដើម្បីត្រៀមរៀបចំឱ្យមានការប្រកួតមិត្តភាពនេះផងដែរ។

ជុំវិញការចងសម្ព័ន្ធភាពដ៏ល្អ និងឈានទៅរកការប្រកួតមិត្តភាព ជាមួយក្រុមកំពុងឈរចំណាត់ថ្នាក់លេខ៣ លើពិភពលោកនេះ ត្រូវបានលោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធបាល់ទះកម្ពុជា បង្ហាញនូវសុទិដ្ឋិនិយមខ្ពស់ ដែលជាស្ថិតក្នុងផែនការរបស់សហព័ន្ធ ក្នុងការជំរុញក្រុមជម្រើសជាតិកម្ពុជា ធ្វើការប្រកួតមិត្តភាពអន្ដរជាតិឲ្យបានច្រើន។ ពិសេសក្រុមខ្លាំងៗជាងខ្លួន ដើម្បីវាស់ស្ទង់ ក៏ដូចជាពង្រឹងសមត្ថភាព និងបច្ចេកទេស ឆ្ពោះទៅប្រជែងមេដាយមាសស៊ីហ្គេម ឆ្នាំ២០២៣៕

អត្ថបទ ៖ មន្នីរ័ត្ន