កីឡា

កម្ពុជាមានមហិច្ឆតាបង្កើតសាលា«គុនខ្មែរ»កម្រិតអន្តរជាតិ

បានផុស

៣ years មុន

នៅ

ថ្ងៃព្រហស្បតិ៍ ២៣ កុម្ភៈ ២០២៣

ដោយ

បន្ទាប់ពីចប់ភារកិច្ចក្នុងការធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម លើកទី៣២ ឆ្នាំ២០២៣ នាពេលខាងមុខ កម្ពុជាអាចនឹងបង្កើតសាលាក្បាច់គុនដែលផ្តោតសំខាន់លើការបណ្តុះបណ្តាលថ្នាលគុនខ្មែរទ្រង់ទ្រាយធំលំដាប់ពិភពលោកនៅលើទឹកដីនៃព្រះរាជាណាចក្រកម្ពុជា។

លោក ពុយ គា (ឆ្វេ) លោក ថោង ខុន (កណ្តាល) និង លោក វ៉ាត់ ចំរើន (ស្តាំ)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានស្តីពីវឌ្ឍនភាពការងារក្នុងនាមជាម្ចាស់ផ្ទះកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅទីស្នាក់ការគណៈកម្មាធិការជាតិអូឡាំពិកកម្ពុជា នាព្រឹកថ្ងៃទី២៣ ខែកុម្ភៈនេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម មានប្រសាសន៍ថា កម្ពុជាមានមហិច្ឆតាហែកមេឃដើម្បីអភិវឌ្ឍកីឡាអត្តសញ្ញាណជាតិគឺ«គុនខ្មែរ»ទៅកាន់ឆាកអន្តរជាតិ។

«កាលពីមុន យើងមានប្រទេសជាសមាជិកជាង២០ប៉ុណ្ណោះ ប៉ុន្តែដល់ឃើញដាក់គុនខ្មែរចូលស៊ីហ្គេម ឥឡូវសមាជិកយើងបានកើនឡើងដល់ជាង៥០ប្រទេសដែលសុំចូលជាសមាជិក។ អីចឹងមានន័យថា យើងបោះជំហ៊ានទៅមុខហើយ។ យើងមិនចាំបាច់ផ្សព្វផ្សាយពីអត្តសញ្ញាណរបស់យើងទេ គេអាចស្រាវជ្រាវ គេដឹងហើយពីគុនខ្មែរមានប្រភពយ៉ាងណានោះ»។ លោក វ៉ាត់ ចំរើន បានលើកឡើង។

«យើងគ្រោងនឹងស្នើដល់រាជរដ្ឋាភិបាល និងប្រជាជនខ្មែរទាំងអស់ដើម្បីឲ្យរៀបចំបង្កើតថ្នាល Academy Kun Khmer ឲ្យក្លាយជាចក្រភពគុនខ្មែរមួយដ៏ធំ។ អីចឹងសហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់គុនខ្មែរអន្តរជាតិរៀបចំបណ្តុះបណ្តាលថ្នាលគុនខ្មែរមួយដែលមានកន្លែងហ្វឹកហាត់ កន្លែងស្នាក់នៅ អាហារហូបចុក នៅទីកន្លែងមួយក៏បានក្នុងប្រទេសយើង។ យើងបើកចំហរឲ្យយុវជនទូទាំងប្រទេសចូលហ្វឹកហាត់គុនខ្មែរ។ យើងបើកចំហរឲ្យជនបរទេសចូលហ្វឹកហាត់។ យើងទទួលបានផលប្រយោជន៍ រឿងអីដែលយើងមិនត្រូវពង្រីកគុនខ្មែរឲ្យរីកចម្រើន និងល្បីល្បាញ។ បង្កើនសាលាគុនឲ្យធំ ឲ្យរឹងមាំ ឲ្យខ្លាំង និងអស្ចារ្យដើម្បីយើងរក្សាទុកមរតកគុនខ្មែរយើងរាប់ពាន់ឆ្នាំ ក៏ដូចជាឆ្លើយតបនឹងបុព្វបុរសរបស់យើងដែលបន្សល់ទុកមក»។

គំនិតនៃគម្រោងបង្កើតសាលាបណ្តុះបណ្តាលថ្នាលគុនខ្មែរនេះកើតមានឡើង បន្ទាប់ពីគុនខ្មែរត្រូវបានដាក់បញ្ចូលជាផ្លូវការក្នុងកីឡាស៊ីហ្គេម ឆ្នាំ២០២៣នេះដែលកម្ពុជាធ្វើជាម្ចាស់ផ្ទះ។ គំនិតទាំងនេះគឺដើម្បីជំរុញ និងអភិវឌ្ឍប្រដាល់គុនខ្មែរដែលជាកីឡាអត្តសញ្ញាណជាតិឲ្យរីកចម្រើន ល្បីសុះសាយ និងបោះជំហានឆ្ពោះទៅរកមានមុខក្នុងកីឡាអូឡាំពិកដែលទាមទារឲ្យមានសមាជិកជាង៧០ប្រទេសឡើងទើបអាចដាក់ចូលបាន៕

អត្ថបទ៖ វីរបុត្រ