Pep Guardiola បាននិយាយបែបកំប្លែងថា លោកបានប្ដូរ Erling Haaland ចេញ ដែលខ្វះតែ ១គ្រាប់ អាច​ស៊ុត​បាន ៦ គ្រាប់ (double hat-trick) ខណៈដែល Manchester City បានយកឈ្នះ RB Leipzig ៧-០ ដើម្បីឡើងទៅវគ្គ ៨ក្រុមចុងក្រោយ។

ខ្សែប្រយុទ្ធន័រវេសរូបនេះបានបង្កើតកំណត់ត្រាថ្មី ខណៈដែលគេបានស៊ុតបញ្ចូលទីបាន ៥ គ្រាប់ក្នុងរយៈពេល ៣៥នាទី ក្លាយជាកីឡាករក្មេងបំផុតដែលអាចរកបាន ៣០ គ្រាប់ក្នុងក្របខ័ណ្ឌ Champions League និងលឿនបំផុតក្នុងការធ្វើវា ហើយចូលរួមជាមួយ Lionel Messi និង Luiz Adriano ក្នុងការស៊ុតបញ្ចូលទី ៥ គ្រាប់ក្នុងមួយប្រកួតនៅ Champions League។

Haaland បានបំពេញការស៊ុតបញ្ចូលទី ៣គ្រាប់ម្នាក់ឯងក្នុងតង់ទី១ ដោយរកបាន ២គ្រាប់ក្នុងចន្លោះពេល ២នាទីនៅពាក់កណ្តាលតង់ទី១ ហើយបន្ទាប់មកបន្ថែម ២គ្រាប់ទៀតនៅនាទី៥៣ និង៥៧ នៅតង់ទី២ បន្ថែមដោយ Ilkay Gundogan និង Kevin De Bruyne រកបានម្នាក់ ១គ្រាប់ទៀត ខណៈជួយឱ្យ Man City ឈ្នះ ៨-១ សរុបលទ្ធផលទាំងជើង។

ប៉ុន្តែ Haaland ត្រូវបានប្ដូរចេញជំនួសដោយ Julian Alvarez ភ្លាមៗ ហើយក្រោយមកគេបាននិយាយថា៖ «ខ្ញុំបានប្រាប់គាត់ [Guardiola] នៅពេលដែលខ្ញុំប្ដូរចេញ ខ្ញុំចង់ស៊ុតបញ្ចូលទីបាន Hat-trick ពីរដង ប៉ុន្តែតើខ្ញុំអាចធ្វើអ្វីបាន!»។

នៅពេលសួរថា ហេតុអ្វីបានជា Haaland ត្រូវផ្លាស់ប្តូរចេញ លោក Guardiola បាននិយាយថា៖ «ប្រសិនបើគាត់សម្រេចបាននូវចំណុចសំខាន់នេះនៅអាយុ ២២, ២៣ឆ្នាំ វានឹងគួរឱ្យធុញក្នុងជីវិតរបស់គាត់។ ឥឡូវនេះគាត់មានគោលដៅមួយ នោះហើយជាមូលហេតុដែលខ្ញុំធ្វើការផ្លាស់ប្ដូរចេញ។ ខ្ញុំមិនបានដឹងរឿងនេះទេអំពី Messi ទល់នឹង (Bayer) Leverkusen ប៉ុន្តែជាធម្មតានៅពេលដែលការប្រកួតចប់ ខ្ញុំចង់ឱ្យកីឡាករទាំងអស់លេងឱ្យអស់ពីសមត្ថភាព»។

ការរកគ្រាប់បាល់មិនមានបញ្ហាទេចាប់តាំងពីថ្ងៃដែល Haaland មកដល់ Manchester City។ ការបង្ហាញទម្រង់លេងដ៏ល្អនៅថ្ងៃអង្គារ បានធ្វើឱ្យគេឈានដល់រកបាន ៣៩ គ្រាប់សម្រាប់រដូវកាលនេះ និងបំបែកកំណត់ត្រារបស់ក្លិប ដែលកីឡាករ Tommy Johnson ធ្លាប់ធ្វើបានក្នុង ១ រដូវកាល៕

ប្រភព៖ dailymail.co.uk
អត្ថបទ៖ មន្នីរ័ត្ន