កីឡា

Sammy នៅតែមានមហិច្ឆតាអង្រួនសង្វៀនគុនខ្មែរដោយឃើញ២រូបនេះជាដៃគូបន្ទាប់

បានផុស

៣ ខែ មុន

នៅ

ថ្ងៃចន្ទ ២០ មីនា ២០២៣

ដោយ

កីឡាករប្រដាល់ថៃ Sammy ដែលមកប្រកួតនៅស្រុកខ្មែរ៥ដងក្នុងរយៈពេល៣ខែចុងក្រោយនៅតែមានមហិច្ឆតាមកប្រកួតនៅសង្វៀនគុនខ្មែរទៀត បើទោះបីជាមិនពេញចិត្តនឹងលទ្ធផលចុងក្រោយដែលចាញ់ ធឿន ធារ៉ា។

កាលពីថ្ងៃសៅរ៍ ទី១៨ ខែមីនា កន្លងទៅនេះ កីឡាករថៃ Sammy ត្រូវបានចៅក្រមកាត់សេចក្តីឲ្យចាញ់ពិន្ទុអ្នកលេងគុនខ្មែរ ធឿន ធារ៉ា បន្ទាប់ពីតស៊ូគ្នាយ៉ាងស្វិតស្វាញ៥ទឹកពេញ។ លទ្ធផលនោះ រូបគេមិនពេញចិត្តនឹងការសម្រេចរបស់ចៅក្រមឡើយ ហើយគិតថា ខ្លួនគេជាអ្នកឈ្នះ ខណៈការប្រកួតរបស់ខ្លួនព្យាយាមទប់ ថយក្រោយ និងឌឺដងច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករថៃរូបនេះបានបង្ហោះវីដេអូបទសម្ភាសក្រោយការប្រកួតកាលពីថ្ងៃសៅរ៍ដោយបាននិយាយថា រូបគេ និង ធឿន ធារ៉ា ពិតជាវ៉ៃអស់ពីសមត្ថភាពមែន ប៉ុន្តែរូបគេមិនយល់ហេតុអ្វីបានជាឲ្យរូបគេចាញ់។ រូបគេបាននិយាយថា គ្មានកីឡាករណាឈ្នះ ធឿន ធារ៉ា ទេ ប្រសិនបើវ៉ៃមិនសន្លប់ ហើយក៏គ្មានកីឡាករណាចង់មកវ៉ៃជាមួយ ធឿន ធារ៉ា ដែរ ប្រសិនបើវ៉ៃមិនសន្លប់គឺមិនឈ្នះ។

ទោះបីជាយ៉ាងណា វីដេអូសម្ភាសដែលរូបគេបង្ហោះនោះមិនយូរប៉ុន្មានក៏ត្រូវបានលុបចេញវវិញ។ ប្រហែលជារូបគេមិនចង់ឲ្យមានបញ្ហារកាំរកួស ហើយរូបគេក៏នៅតែចង់មកប្រកួតនៅសង្វៀនស្រុកខ្មែរបន្ត ពីព្រោះរូបគេមានទីផ្សារប្រកួតបន្តបន្ទាប់នៅកម្ពុជា។

តាមរយៈពិធីករប្រចាំសង្វៀនទូរទស្សន៍ជាតិកម្ពុជា Sammy បានប្រាប់ថា រូបសម្លឹងឃើញដៃគូ២នាក់ទៀតដែលចង់ប្រកួតបន្ទាប់។ ជើងខ្លាំងពីរនាក់ដែលរូបគេចង់ជួបនោះគឺកីឡាករឡើងជើង ឈឿង ល្វៃ និង កីឡាករប្រេស៊ីល Thiago Teixeira ដែលបានប្រកាសវ៉ៃតំណាងឲ្យគុនខ្មែរ។

Sammy ប្រហែលជាស្គាល់ ឈឿន ល្វៃ ច្បាស់នៅពេលអ្នកលេងគុនខ្មែររូបនេះបានផ្តួលកីឡាករថៃ កងមឿងឆាង តាមរយៈរន្ទះជើងផ្កាប់ចានឲ្យសន្លប់ក្នុងទឹកទី១ កាលពីថ្ងៃទី១១ ខែមីនា កន្លងទៅដែលរាត្រីនោះ Sammy ក៏បានប្រកួតដែរដោយបានផ្តួលកីឡាករកម្ពុជា ធន់ រិទ្ធី ក្នុងទឹកទី១។

ចំណែកកីឡាករ Thiago Teixeira ដែលប្រកាសប្រកួតតំណាងឲ្យគុនខ្មែរគឺធ្លាប់ហ្វឹកហាត់នៅប្រទេសថៃ និងប្រកួតជោកជាំនៅសង្វៀនថៃ ដូច្នេះរូបគេស្គាល់កីឡាករប្រេស៊ីលនេះច្បាស់ណាស់។

សូមបញ្ជាក់ថា Sammy ធ្លាប់មកប្រកួតនៅសង្វៀនស្រុកខ្មែរ៥ដងហើយក្នុងនោះឈ្នះ២ ចាញ់២ និងស្មើ១។ ប្រកួតនៅស្រុកខ្មែរលើកទី១ចាញ់ ព្រំ សំណាង សន្លប់ក្នុងទឹកទី២, ប្រកួតលើកទី២ ស្មើពិន្ទុ ធឿន ធារ៉ា, លើកទី៣ និងទី៤ ផ្តួល ឡៅ ចន្ទ្រា ក្នុងទឹកទី២ និង ធន់ រិទ្ធី ក្នុងទឹក១ ហើយចុងក្រោយចាញ់ពិន្ទុ ធឿន ធារ៉ា៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ