គ្រប់ពាក្យសម្ដីរបស់លោក Felix Dalmas ក្រោយចូលកាន់តំណែងជាគ្រូជម្រើសជាតិកម្ពុជា ជាថ្មី

សហព័ន្ធកីឡាបាល់ទាត់កម្ពុជា នៅថ្ងៃទី០២ ខែមេសា ឆ្នាំ២០២៣ បានប្រកាសជាផ្លូវការក្នុងការតែងតាំងលោក Felix G.Dalmas ជាគ្រូបង្វឹកនៃក្រុមជម្រើសជាតិ ទាំងឈុតធំ និងអាយុក្រោម២៣ឆ្នាំ ជាផ្លូវការ ដែលមានកិច្ចសន្យារយៈពេល៤ឆ្នាំ ពីឆ្នាំ២០២៣ ដល់ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីបានប្រកាសជាផ្លូវការរួច លោកក៏ត្រូវបានបង្ហាញចំណាប់អារម្មណ៍អំពីការវិលត្រលប់មកវិញ ខណៈក៏មានការឆ្លើយតបទៅនឹងសំណួររបស់អ្នកសារព័ត៌មាន ខណៈកម្ពុជាថ្មី ដែលមានវត្តមាននៅទីនោះផងដែរ បានស្រង់នូវរាល់ពាក្យពេជន៍ដែលគ្រូបង្វឹកសញ្ជាតិអាហ្សង់ទីនរូបនេះបាននិយាយផងដែរ។

ថ្លែងក្នុងសន្និសីទសារព័ត៌មាន លោក Felix G.Dalmas បាននិយាយថា «ខ្ញុំសូមអរគុណ ក្នុងការដែលបានវិល ត្រលប់មកវិញសារជាថ្មី វាពិតជារីករាយខ្លាំងមែនទែន ដែលបានជួបជាមួយមិត្តភ័ក្ដិដែលធ្លាប់ជួបគ្នាកន្លងមក ហើយក៏ដូចជាអ្នកថ្មីផងដែរ។ ខ្ញុំនឹងចាប់ផ្ដើមនូវកិច្ចការដែលយើងបានកសាងរួចមកហើយ ដើម្បីបន្តកិច្ចការដែលយើងធ្លាប់មានឱ្យរីកចម្រើនបន្តទៀត។ ខ្ញុំបាទសូមថ្លែងអំណរគុណដល់សហព័ន្ធកីឡាបាល់ទាត់កម្ពុជា ដែលមានឯកឧត្តម សៅ សុខា ជាប្រធាន ក៏អរគុណសម្រាប់ការទុកចិត្តដែលនាំខ្ញុំត្រលប់មកកាន់មុនតំណែងនេះ»។

«វាពិតជារឿងគួរឱ្យរីករាយណាស់ក្នុងការឃើញលីគមានការរីកចម្រើនច្រើន ក៏ដូចជាកីឡាកររបស់យើងដែលធ្វើការវិវឌ្ឍន៍បានយ៉ាងល្អប្រសើរនាពេលកន្លងមកនេះផងដែរ។ នៅក្នុងពេលវេលានៃការផ្ទេរនេះ ខ្ញុំប្រាកដជារីករាយក្នុងការរំពឹងជឿជាក់ក្នុងការធ្វើការបន្តពីលោក Honda ក៏ដូចជារួចរាល់ដើម្បីជួបជាមួយគ្រប់គ្នា ទាំងកីឡាករ ក៏ដូចជាបុគ្គលិក»។ លោកបានបន្ថែម។

ក្រៅតែពីនិយាយពីចំណាប់អារម្មណ៍ លោកក៏មានពាក្យពេជ៦ទៅកាន់អ្នកគាំទ្រដែលមានខ្លឹមសារថា៖ «ទៅកាន់អ្នកគាំទ្រ យើងនឹងបន្តធ្វើការអភិវឌ្ឍន៍នូវអ្វីដែលយើងមានកន្លងមក ហើយនឹងធ្វើការជាមួយក្រុមរបស់យើង ដើម្បីធ្វើឱ្យកម្ពុជារបស់យើងមានមោទកភាពបន្តទៀតជាមួយកិច្ចដែលយើងធ្វើផងដែរ។ ខ្ញុំពាំនាំនូវការរៀនសូត្រ ក៏ដូចជាបទពិសោធថ្មីរបស់ខ្ញុំដើម្បីកសាងក្រុមបាល់ទាត់កម្ពុជា ឱ្យកាន់តែរីកចម្រើន»។ 

«យើងមិនអាចធ្វើអ្វីឱ្យរីកចម្រើនតែឯងបានទេ យើងត្រូវការការធ្វើការជាក្រុមជាមួយគ្នា យើងនឹងកសាងនូវអ្វីដែលយើងមានកន្លងរួចមកហើយ ហើយខ្ញុំនៅតែនិយាយម្ដងហើយម្ដងទៀតថា ខ្ញុំពិតជារីករាយក្នុងវិលត្រលប់មកវិញ ខ្ញុំនឹងកម្ពុជាខ្លាំង ដូច្នេះសូមចូលរួមគាំទ្របាល់ទាត់របស់យើង ជាពិសេសការប្រកួតស៊ីហ្គេម ដែលនឹងចាប់ផ្ដើមនាពេលដ៏ខ្លីខាងមុខ»។

ពេលសួរនាំអំពី ការចាកចេញកន្លងមក និងការវិលត្រលប់មកវិញ គ្រូបង្វឹកវ័យ ៣៤ឆ្នាំរូបនេះបានឆ្លើយតបដោយត្រជាក់ចិត្តថា ដោយសារលោកនៅមានកិច្ចដែលមិនទាន់បានបញ្ចប់ជាមួយក្រុមជម្រើសជាតិកម្ពុជា។

លោកនិយាយដូច្នេះថា៖ «តាមពិតទៅខ្ញុំមិនចង់ចាកចេញពីកម្ពុជានោះទេ ប៉ុន្តែដោយសារស្ថានភាពគ្រួសារ ក៏ដូចជាស្ថានភាពក្នុងសម័យកាលកូវីដ ដូច្នេះវាបានបង្ខំឱ្យខ្ញុំត្រូវចាកចេញពីកិច្ចការដែលត្រូវធ្វើជាមួយលោក Honda។ ជាមួយគ្នា ខ្ញុំក៏សប្បាយរីករាយដែលត្រលប់មកវិញ នៅពេលដែលសហព័ន្ធកីឡាបាល់ទាត់កម្ពុជា បង្ហាញឱ្យខ្ញុំបានឃើញអំពីផែនការរបស់សហព័ន្ធ ក៏ដូចជាគោលដៅ ក៏ដូចជាការរីកចម្រើនរបស់ក្លិបនៅកម្ពុជា ហើយខ្ញុំចង់ឃើញកិច្ចការនេះដំណើរការបន្តទៀត ហើយសហព័ន្ធក៏បានបង្ហាញឱ្យខ្ញុំឃើញក្ដីស្រមៃ ក្ដីសង្ឃឹមបាល់ទាត់កម្ពុជា អ្វីដែលខ្ញុំចង់និយាយនោះគឺថា ខ្ញុំមិនទាន់បានបញ្ចប់កិច្ចការរបស់ខ្ញុំនៅកម្ពុជានៅឡើយទេ ជាហេតុដែលធ្វើឱ្យខ្ញុំត្រលប់មកវិញ អ៊ីចឹងកម្ពុជា គឺជាម្រើសទី១ សម្រាប់ខ្ញុំក្នុងការត្រលប់មកវិញ»។

សូមបញ្ជាក់ថា នេះជាលើកទី២ ដែលបុរសសញ្ជាតិអាហ្សង់ទីនរូបនេះចូលដឹកនាំក្រុមជម្រើសជាតិកម្ពុជា បន្ទាប់ពីលើកទី១ លោកបានដឹកនាំពីឆ្នាំ២០១៨ ដល់២០២០ ដោយអមដំណើរជាមួយ លោក Honda មានតួនាទីជាអ្នកចាត់ការទូទៅ៕

អត្ថបទ៖ មន្នីរ័ត្ន