កីឡា

មើលស្ថិតិទាំងនេះ ក្រុមបាល់ទះកម្ពុជា សង្ឃឹមឡើងវគ្គពាក់កណ្តាលផ្តាច់ព្រ័ត្រស៊ីហ្គេម

បានផុស

៣ years មុន

នៅ

ថ្ងៃព្រហស្បតិ៍ ៦ មេសា ២០២៣

ដោយ

ប្រភេទកីឡាបាល់ទះក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជា ត្រូវបានធ្វើការចាប់ឆ្នោតរួចរាល់ហើយកាលពីរសៀលថ្ងៃទី៥ ខែមេសា។

សម្រាប់វិញ្ញាសាបាល់ទះបុរសក្នុងសាល ក្រុមកម្ពុជាស្ថិតនៅក្នុងពូល A ជាមួយម្ចាស់ការពារមេដាយមាសឆ្នាំចាស់ ឥណ្ឌូណេស៊ី និងសិង្ហបុរី ខណៈពូល B មានក្រុមខ្លាំង វៀតណាម ថៃ ម៉ាឡេស៊ី និងមីយ៉ាន់ម៉ា។

*ក្រុមបាល់ទះកម្ពុជា ពេលឈ្នះមេដាយសំរឹទ្ធ កាលពីស៊ីហ្គេម លើកទី៣១*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើវិភាគលើក្រុមដែលនៅពូលជាមួយគ្នា កម្ពុជាមានសង្ឃឹមច្រើនក្នុងការឡើងទៅកាន់វគ្គពាក់កណ្តាលផ្តាច់។ ឥណ្ឌូណេស៊ី ជាក្រុមខ្លាំងដែលបានឈ្នះមេដាយមាស កាលស៊ីហ្គេម លើកទី៣១ ឆ្នាំ២០២១ (លើកឆ្នាំ២០២២) នៅប្រទេសវៀតណាម។

វគ្គសន្សំពិន្ទុក្នុងពូល ឥណ្ឌូណេស៊ី បានឈ្នះ មីយ៉ាន់ម៉ា ៣-០, ឈ្នះវៀតណាម ៣-១ និងឈ្នះ ម៉ាឡេស៊ី ៣-០។ ស្របពេលកម្ពុជានៅពូល B បានយកឈ្នះ ហ្វីលីពីន ៣-១ និងចាញ់ថៃ ៣-២ ឈរលេខ២ក្នុងពូលបានឡើងទៅកាន់វគ្គពាក់កណ្តាលផ្តាច់ព្រ័ត្រជួបឥណ្ឌូណេស៊ី ដែលលេខ១ក្នុងពូល A។

នៅវគ្គពាក់កណ្តាលផ្តាច់ព្រ័ត្រ ថ្វីបើក្រុមកម្ពុជាចាញ់ឥណ្ឌូណេស៊ី ៣-១ ប៉ុន្តែកម្ពុជាអាចតដៃយកឈ្នះបាន១សិតដែរ។ ដូច្នេះការជួបគ្នាសម្រាប់ស៊ីហ្គេម លើកទី៣២ ក្នុងនាមជាម្ចាស់ផ្ទះ នៅពូលជាមួយគ្នា កម្ពុជាប្រហែលមិនបណ្តោយឲ្យឥណ្ឌូណេស៊ី រកបានពិន្ទុបានស្រួលនោះទេ ប៉ុន្តែទទួលស្គាល់ឥណ្ឌូណេស៊ីជាក្រុមខ្លាំង។

នៅពូលជាមួយគ្នានេះគឺសិង្ហបុរីដែលត្រូវបានមើលឃើញថា កម្ពុជាអាចមានលទ្ធភាពក្នុងការទទួលបានជ័យជម្នះ។ មែនទែនទៅ កម្ពុជាទើបតែទទួលបានជ័យជម្នះលើសិង្ហបុរី ដោយលទ្ធផល ៣-១ ក្នុងជំនួបមិត្តភាពអន្តរជាតិកាលពីដាច់ខែមីនាកន្លងទៅថ្មីៗនៅប្រទេសម៉ាឡេស៊ី ដូច្នេះជួបគ្នានៅស៊ីហ្គេម ខាងមុខ កម្ពុជាសង្ឃឹមឈ្នះទៀត។

ប្រសិនកម្ពុជាចាញ់ឥណ្ឌូណេស៊ី ហើយយកឈ្នះសិង្ហបុរី នោះកម្ពុជានឹងឈរលេខ២ ហើយឡើងទៅកាន់វគ្គពាក់កណ្តាលផ្តាច់ព្រ័ត្រ ដោយសារពូលនេះមានតែ ៣ប្រទេសប៉ុណ្ណោះ ហើយមានតែ១ក្រុមប៉ុណ្ណោះធ្លាក់ក្នុងវគ្គសន្សំពិន្ទុក្នុងពូល។

អ្វីដែលកាន់តែសំខាន់ទៀតនោះ ក្នុងនាមជាម្ចាស់ផ្ទះស៊ីហ្គេម លើកដំបូង កម្ពុជាមានកម្លាំងចិត្តខ្លាំង និងមានអ្នកគាំទ្រច្រើនចូលរួមលើកទឹកចិត្ត ដូច្នេះក្រុមកម្ពុជាពិតជាមុះមុតក្នុងការប្រកួតមួយនេះ៕

អត្ថបទ៖ វីរបុត្រ