កីឡា

ក្នុងស៊ីហ្គេម បុរសបារាំង-ខ្មែរ Derek ដាក់គោលដៅពង្រីកគុនល្បុក្កតោលើឆាកអន្តរជាតិ

បានផុស

៣ years មុន

នៅ

ថ្ងៃសុក្រ ២១ មេសា ២០២៣

ដោយ

លោក Derek Bidaut ដែលជាជនជាតិបារាំងទទួលបានសញ្ជាតិខ្មែរបានដាក់គោលដៅផ្សព្វផ្សាយ និងពង្រឹងក្បាច់គុនល្បុក្កតោលើឆាកអន្តរជាតិឲ្យល្បីល្បាញ ដោយមិនលំអៀងលើអត្តពលិកណាម្នាក់ឡើយនៅពេលខ្លួនធ្វើជាចៅក្រម និងអាជ្ញាកណ្តាលក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសបារាំងដែលចូលមកកម្ពុជាតាំងឆ្នាំ២០០៩ មានឈ្មោះខ្មែរ ចាន់ ឫទ្ឋិស័ក្តិ បាននិយាយថា ៖«ខ្ញុំពិតជាសប្បាយចិត្តមែនទែនដែលបានក្លាយជាចៅក្រម និងអាជ្ញាកណ្តាលក្បាច់គុនល្បុក្កតោ ជាពិសេសក្នុងកីឡាស៊ីហ្គេម លើកដំបូងនៅប្រទេសកម្ពុជា។ យើងជាម្ចាស់ផ្ទះ យើងជាម្ចាស់ក្បាច់គុន ហើយនិយាយពីកីឡាករ កីឡាការិនីខ្មែរ ខ្ញុំស្គាល់អស់ហើយ ហើយជិតស្និទ្ធថែមទែម ប៉ុន្តែក្នុងនាមយើងជាអាជ្ញាកណ្តាល អត់អាចកាន់ជើងគ្នាយើងបានទេ»។

«យើងជាអាជ្ញាកណ្តាល យើងឈរនៅកណ្តាល ដឹកនាំការប្រកួតធ្វើយ៉ាងណាឲ្យរលូន ហើយនរណាវ៉ៃបានល្អជាងគេ អ្នកនោះឈ្នះហើយ។ ទោះជាចិត្តយើងចង់ឲ្យខ្មែរឈ្នះមេដាយ តែនៅលើសង្វៀន យើងឈរកណ្តាលជាយុត្តិធម៌។ គោលដៅសំខាន់របស់ខ្ញុំគឺស៊ីហ្គេមហ្នឹងចង់ឲ្យពិភពលោកស្គាល់គុនល្បុក្កតោ»។ លោក Derek បានលើកឡើង។

លោកបានសង្កត់ធ្ងន់ថា ស៊ីហ្គេម នៅកម្ពុជានេះជាឱកាសល្អដ៏កម្រដែលធ្វើឲ្យពិភពលោកស្គាល់ក្បាច់គុនល្បុក្កតោ។ នៅពេលកីឡាករ កីឡាការិនីបរទេសឈ្នះមេដាយគុនល្បុក្កតោ នោះមានន័យថា កម្ពុជាបានផ្សព្វផ្សាយ និងពង្រីកគុនល្បុក្កតោលើឆាកអន្តរជាតិ។ ប្រសិនបើកម្ពុជាយកមេដាយមាសតែឯង នោះមិនមានន័យថា គុនល្បុក្កតោរីកចម្រើនទៅកាន់បណ្តាប្រទេសផ្សេងឡើយ។

បុរសបារាំងសញ្ជាតិខ្មែរបន្តថា ទោះបីជាយ៉ាងណា បើក្រឡេកមើលពីប្រទេសផ្សេងៗដែលចូលរួមប្រកួតគុនល្បុក្កតោក្នុងកីឡាស៊ីហ្គេមនៅកម្ពុជាក៏សុទ្ធតែជាប្រទេសខ្លាំងៗ។ ថ្វីបើពួកគាត់ប្រកួតល្បុក្កតោលើកដំបូង ប៉ុន្តែពួកគេមានភាពរឹងមាំ កម្លាំងខ្លាំង និងស្វាហាប់ ពីព្រោះពួកគាត់សុទ្ធតែកីឡាករ កីឡាការិនីដែលបានហ្វឹកហាត់កីឡាផ្សេងៗច្រើនឆ្នាំមកហើយ។ ក្នុងចំណោមប្រទេស៦ដែលចូលរួមប្រកួតគុនល្បក្កតោ មានឥណ្ឌូណេស៊ី វៀតណាម និងឡាវសុទ្ធតែខ្លាំង ខណៈហ្វីលីពីន និងមីយ៉ាន់ម៉ាក៏សុទ្ធតែមិនអាចមើលស្រាលបាន៕