កីឡា

ធន់ ផានិត អស់ឱកាសឡើងវគ្គផ្តាច់ព្រ័ត្រខ្សែក្រវាត់ខារ៉ាបាវលើកទី២

បានផុស

៣ ខែ មុន

នៅ

ថ្ងៃចន្ទ ៥ មិថុនា ២០២៣

ដោយ

កីឡាករប្រដាល់គុនខ្មែរ ធន់ ផានិត មិនអាចឡើងទៅកាន់វគ្គផ្តាច់ព្រ័ត្រជាលើកទី២សម្រាប់ការប្រកួតខ្សែក្រវាត់ខារ៉ាបាវរដូវកាលថ្មី បន្ទាប់ពីចាញ់កីឡាករ ពេជ្រ ប៊ុនសិទ្ធ នៅវគ្គពាក់កណ្តាលផ្តាច់ព្រ័ត្រកាលពីល្ងាចថ្ងៃអាទិត្យទី៤ ខែមិថុនា ឆ្នាំ២០២៣ នៅសង្វៀនទូរទស្សន៍បាយ័នស្ទឹងមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតវគ្គពាក់កណ្តាលផ្តាច់ព្រ័ត្រដែលត្រូវប្រើពេល៥ទឹកពេញទទួលបានការចាប់អារម្មណ៍យ៉ាងខ្លាំងពីអ្នកទស្សនា។ អ្នកទាំងពីរមានលក្ខណៈពិសេស និងចំណុចល្អរៀងៗខ្លួន។ ធន់ ផានិត បានផ្លាស់ប្តូរបច្ចេកទេសខុសប្លែកពីរាល់ដងដោយព្យាយាមប្រើជង្គង់ច្រើនជាងការទាត់ជើងក្រោមដែលជាក្បាច់សម្លាប់ដៃគូរបស់ខ្លួន។ ស្របពេល ពេជ្រ ប៊ុនសិទ្ធ ប្រើកណ្តាប់ដៃ និងកែងដ៏មានប្រសិទ្ធភាព។

ចាប់ពីទឹកទី១ដល់ទី៣ អ្នកទាំងពីរធ្វើបានល្អដូចគ្នាដោយមិនសូវលើសខ្វះគ្នាប៉ុន្មានឡើយ ប៉ុន្តែទឹកទី៤ និងទី៥ ពេជ្រ ប៊ុនសិទ្ធ ប្រើកណ្តាប់ដៃច្បាស់ៗ ស្របពេល ធន់ ផានិត ស្រុតចម្រុះកម្លាំងស៊ុហ្វផង។

អ្វីដែលកាន់តែធ្វើឲ្យការប្រកួតមានពិន្ទុដាច់ស្រឡះទៀតនោះគឺនៅចុងទឹកទី៥ ពេជ្រ ប៊ុនសិទ្ធ វាយកណ្តាប់ដៃឲ្យអាជ្ញាកណ្តាលរាប់ ធន់ ផានិត ៨ពីរដង ហើយក៏ចប់ទឹកតែម្តង។ ប្រសិនបើមិនចប់ទឹកទេ ធន់ ផានិត អាចត្រូវបាន ប៊ុនសិទ្ធ វ៉ៃឲ្យអាជ្ញាកណ្តាលបញ្ឈប់ ឬក៏សន្លប់ក៏ថាបាន។

យ៉ាងណា ចប់ការប្រកួត ចៅក្រមទាំង៥រូបបានកាត់សេចក្តីឲ្យ ពេជ្រ ប៊ុនសិទ្ធ ឈ្នះពិន្ទុជាឯកច្ឆន្ទលើ ធន់ ផានិត ដើម្បីឡើងទៅកាន់វគ្គផ្តាច់ព្រ័ត្រ។

នេះជាការធ្លាក់ត្រឹមវគ្គពាក់កណ្តាលផ្តាច់ព្រ័ត្រជាលើកទី២របស់ ធន់ ផានិត បន្ទាប់ពីធ្លាប់ចាញ់ ពេជ្រ សម្បត្តិ ទឹកទី១ ក្នុងវគ្គពាក់កណ្តាលផ្តាច់ព្រ័ត្រជើងឯកខារ៉ាបាវរដូវកាលឆ្នាំ២០២២៕