កីឡា

កីឡាកររ៉ូម៉ានី Alex មិននឹកស្មានថា ធឿន ធារ៉ា ខ្លាំងលើសពីការគិត

បានផុស

៣ years មុន

នៅ

ថ្ងៃព្រហស្បតិ៍ ២០ កក្កដា ២០២៣

ដោយ

កីឡាករប្រដាល់អន្តរជាតិ Alex Bublea មិនស្មានដល់ពីភាពខ្លាំងរបស់កីឡាករកម្ពុជា ធឿន ធារ៉ា ដែលបានធ្វើឲ្យរូបគេចាញ់សន្លប់ទឹកទី១ក្នុងព្រឹត្តិការណ៍ការប្រកួតគុនខ្មែរជើងឯកពិភពលោក តេជោសន្តិភាព កាលពីថ្ងៃទី១៦ ខែកក្កដា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតត្រូវបានចប់យ៉ាងឆាប់រហ័ស បន្ទាប់ពីកីឡាករកម្ពុជា ធឿន ធារ៉ា វាយកណ្តាប់ដៃលើក្បាលពោះបណ្តាលឲ្យ Alex ដួលត្រូវបានអាជ្ញាកណ្តាលរាប់៨លើកទី១។ ក្រោយមកកីឡាកររ៉ូម៉ានីរូបនេះត្រូវបានអ្នកប្រដាល់កម្ពុជាវាយត្រូវក្បាលពោះបណ្តាលឲ្យអាជ្ញាកណ្តាលរាប់៨លើកទី២ និងលើកទី៣ ធឿន ធារ៉ា វាយកណ្តាប់ដៃឆ្វេងលើក្បាលបណ្តាលឲ្យដួល ហើយត្រូវបានអាជ្ញាកណ្តាលបញ្ឈប់ការប្រកួតតែម្តង។

បន្ទាប់ពីចប់ការប្រកួតកីឡាកររ៉ូម៉ានីកំពុងហ្វឹកហាត់នៅប្រទេសថៃរូបនេះបានលើកឡើងថា ៖«វ៉ូវ! ខ្ញុំចាញ់។ រឹតតែអាក្រក់ទៀតនោះគឺខ្ញុំមិនយល់ពីរបៀបដែលខ្ញុំធ្វើខុសគ្រប់យ៉ាង។ ពិតជាសោកស្តាយដែលមើលស្រាល។ ខ្ញុំនឹងត្រឡប់មកវិញ បន្ទាប់ពីខំប្រឹងប្រែងបន្ថែម»។

ឆ្លើយតបនឹងសំនួររបស់សារព័ត៌មាន«កម្ពុជាថ្មី»ដែលបានសួរថា តើលោកយល់យ៉ាងណាចំពោះកីឡាករកម្ពុជា ធឿន ធារ៉ា អ្នកប្រដាល់រ៉ូម៉ានី បាននិយាយថា ៖«ធឿន ធារ៉ា ខ្លាំងជាងអ្វីដែលខ្ញុំបានគិតទៅទៀត។ គាត់ល្អមែន»។

ដោយសារបរាជ័យយ៉ាងលឿនបែបនេះ Alex Bublea បានប្តេជ្ញាខិតខំប្រឹងប្រែងហ្វឹកហាត់ឲ្យខ្លាំងដើម្បីវិលមកសងសឹកអ្នកលេងពូថៅដៃកម្ពុជា។ កីឡាករបាននិយាយថា ៖«ខ្ញុំត្រូវតែហ្វឹកហាត់ឲ្យខ្លាំងជាមុនសិន អីចឹងខ្ញុំនឹងទៅវ៉ៃជាមួយគាត់ម្តងទៀត»។

តាមការគ្រោងទុក នៅថ្ងៃទី១៩ ខែសីហាខាងមុខនេះ Alex Bublea នឹងត្រូវឡើងប្រកួតទៀត ប៉ុន្តែមិនទាន់ដឹងនៅឡើយទេថា កីឡាកររូបណាជាដៃគូ។

កំពុងហ្វឹកហាត់នៅក្លិប PK Saenchai កីឡាករ Alex Bublea ជាកីឡាករប្រដាល់ម្នាក់ដែលមានបទពិសោធច្រើនសម្រាប់ការប្រកួតលើឆាកអន្តរជាតិជាពិសេសនៅសង្វៀន Thai Fight និង ONE Championship៕

អត្ថបទ៖ វីរបុត្រ