ប្រធានបាល់ទាត់អេស្ប៉ាញលាលែងពីតំណែងរឿងថើបកីឡាការិនីពេលទទួលពានWorld Cup នារី

លោក Rubiales បាន​លាលែងពី​តំណែង​ជា​ប្រធាន​សហព័ន្ធ​កីឡា​បាល់ទាត់​អេស្ប៉ាញ​ហើយ បន្ទាប់​ពី​រង​សម្ពាធ​ខ្លាំង​ជុំ​វិញ​ការថើបកីឡាការិនីអេស្ប៉ាញ Jennifer Hermoso អំឡុងពេលទទួល​ពាន​រង្វាន់​ FIFA Women’s World Cup។

ក្នុងវីដេអូឃ្លីបបង្ហោះលើប្រព័ន្ធផ្សព្វផ្សាយសង្គម លោក Rubiales បានពន្យល់ថា លោកបានសម្រេច​ចិត្តហើយ បន្ទាប់ពីគ្រួសាររបស់លោកបានប្រាប់ថា ៖«Luis ឥឡូវនេះ អ្នកត្រូវ​គិត​លើសេចក្តីថ្លៃថ្នូរដើម្បីបន្តជីវិតរបស់អ្នក។ បើមិន​លា​ឈប់​ទេ អ្នកនឹងបំផ្លាញមនុស្សជាទីស្រលាញ់ និងកីឡាដែលអ្នកស្រលាញ់»។

លោក Rubiales បានចេញសេចក្តីថ្លែងការណ៍មួយក្នុងពេលដំណាលគ្នាជាមួយនឹងវីដេអូឃ្លីបនេះ​ដោយបញ្ជាក់ថា លោកក៏​បានលាលែងពីតួនាទី​ជាអនុប្រធាននៅសហព័ន្ធ​កីឡា​បាល់ទាត់​អេស្ប៉ាញ។

«ថ្ងៃនេះ ម៉ោង៩:៣០នាទីយប់ ខ្ញុំបានបញ្ជូនលិខិត​លាឈប់​ទៅ​លោក Pedro Rocha ប្រធានស្ដីទីសហព័ន្ធបាល់ទាត់អេស៉្បាញ។ ខ្ញុំក៏បាន​ប្រាប់​គាត់ថា ខ្ញុំក៏ឈប់​ពីតួនាទី​នៅ UEFA  ដើម្បីឱ្យតំណែងរបស់ខ្ញុំត្រូវបានជំនួស»។ លោក Rubiales លោក​បាននិយាយ។

បាល់ទាត់អេស្បាញបានជួបវិបត្តិដោយសារការធ្លាក់ចេញពីអាកប្បកិរិយារបស់ Rubiales បន្ទាប់ពីប្រទេសនេះបានឈ្នះពានរង្វាន់ FIFA Women’s World Cup ជាលើកដំបូងកាលពីខែមុន នៅពេលពួកគេបានយកឈ្នះអង់គ្លេសក្នុងលទ្ធផល ១-០។

ដំបូងឡើយ លោក Rubiales បានសុំទោសចំពោះអាកប្បកិរិយារបស់ខ្លួន មុនពេល FIFA បើកការស៊ើបអង្កេត និងផ្អាកការងារ​ជាផ្លូវការរយៈពេល៩០ថ្ងៃ៕

ប្រែសម្រួល៖ មន្នីរ័ត្ន