កីឡា

Superlek ប្រើភាពឆ្លាតវៃយកឈ្នះ Rodtang ក្នុងជំនួបកក្រើកស្រុកថៃយប់មិញ

បានផុស

៦ ខែ មុន

នៅ

ថ្ងៃសៅរ៍ ២៣ កញ្ញា ២០២៣

ដោយ

ជំនួបជើងខ្លាំងលំដាប់ A នៅប្រទេសថៃដែលអ្នកគាំទ្ររង់ចាំអស់រយៈពេលជាច្រើនខែ បានបញ្ចប់ទៅដោយកីឡាកររហស្សនាម«រន្ទះជើងម៉ាស៊ីន» Superlek ទទួលបានជ័យជម្នះដោយពិន្ទុលើកីឡាកររហស្សនាម«រថពាសដែក» Rodtang ដោយពិន្ទុ បន្ទាប់ពីតស៊ូគ្នា៣ទឹកពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនេះដើមឡើយត្រូវដណ្តើមខ្សែក្រវាត់មួយថៃពិភពលោកពីកីឡាករ Rodtang ប៉ុន្តែដោយសារ Superlek ធ្វើទម្ងន់មិនបានដោយលើសជិត៣គីឡូទើបក្លាយជាការប្រកួតមិត្តភាពទៅវិញ។ ប្រការនេះធ្វើឲ្យអ្នកគាំទ្រគិតថា ជំនួបអ្នកទាំងពីរប្រហែលជាវ៉ៃមិនអស់សមត្ថភាពទេ ប៉ុន្តែការពិតនៅលើសង្វៀនវ៉ៃកក្រើកមិនឲ្យអ្នកទស្សនាខកបំណងឡើយ។

នៅទឹកទី១ អាចនិយាយបានថា Rodtang មានប្រៀបដោយសាររូបគេបានវាយកែងដ៏គ្រោះថ្នាក់បណ្តាលឲ្យ Superlek បែកថ្ងាលហូរឈាមពេញមុខ ប៉ុន្តែនៅទឹកដំបូងនេះកីឡាកររន្ទះជើងម៉ាស៊ីនទាត់ក្រោមផ្ទួនៗបានច្រើនដែរ។

នៅទឹកទី២ Superlek ធ្វើបានល្អជាងតាមរយៈការទាត់ជើងក្រោម ជង្គង់ និងកែង។ រូបគេបានវាយសន្ធាប់ម្តងជាពីរដងដែលធ្វើឲ្យ Rodtang ដួលត្រូវបានអាជ្ញាកណ្តាលរាប់ម្តង បន្ទាប់ពីត្រូវកែង និងជង្គង់។ បន្ទាប់មក«រថពាសដែក»បានសម្រុកចូលប្រើវាយកណ្តាប់ដៃជាច្រើន ប៉ុន្តែ Superlek ការពារបានយ៉ាងល្អ។

នៅទឹកទី៣ Superlek បានប្រើភាពឆ្លាតវៃរបស់ខ្លួនដោយមិនតទល់ជាមួយនឹងកណ្តាប់ដៃរបស់ Rodtang ឡើយ។ ផ្ទុយទៅវិញ រូបគេបានព្យាយាមអោនក្បាលចុះ និងចូលកៀកដើម្បីឡើងជង្គង់។ ក្បាច់នេះហើយបានធ្វើឲ្យ Rodtang ប្រើកណ្តាប់ដៃមិនសូវត្រូវគោលដៅ ខណៈ Superlek ប្រើជង្គង់បានច្រើន។

ជារួម Superlek ប្រើភាពឆ្លាតវៃជាមួយនឹងក្បាច់ប្រយុទ្ធល្អមួយកំភ្លេចគឺរន្ទះជើងទាត់ កែង កណ្តាប់ដៃ និងជង្គង់ ដែលស័ក្តិសមទទួលបានជ័យជម្នះ ខណៈ Rodtang ភាគច្រើនប្រើតែកណ្តាប់ដៃ និងកែង ប៉ុន្តែយប់មិញនេះ លទ្ធផលអាចស្មើគ្នា ឬ Superlek ចាញ់ ប្រសិនបើ Rodtang មិនត្រូវបានអាជ្ញាកណ្តាលរាប់៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ