កីឡា

លន បញ្ញា ចង់ជួបដៃគូខ្លាំងៗមកពីក្រៅប្រទេសបន្ថែមទៀត

បានផុស

៣ years មុន

នៅ

ថ្ងៃចន្ទ ២៥ កញ្ញា ២០២៣

ដោយ

អ្នកលេងគុនខ្មែរ លន បញ្ញា ជាម្ចាស់ខែ្សក្រវាត់៤គ្រឿង នៅតែបន្តមហិច្ឆតាចង់ឈ្នះខ្សែក្រវាត់បន្ថែមទៀត ជាពិសេសចង់ជួបដៃគូខ្លាំងៗមកពីក្រៅប្រទេសដើម្បីបង្កើនសមត្ថភាពឲ្យឈានដល់កម្រិតកាន់តែខ្ពស់។

កីឡាករដែលមានដើមកំណើតមកពីខេត្តព្រៃវែងមិនទាន់ស្គាល់បរាជ័យឡើងក្នុងរយៈពេលជាង៣ឆ្នាំចុងក្រោយនេះសម្រាប់ការប្រកួតគុនខ្មែរ។ រូបគេធ្លាប់ប្រកួត១០៤ដង ឈ្នះ៨២ ចាញ់១៧ ស្មើ៤ និងផ្តួលដៃគូឲ្យបោះបង់ការប្រកួតចំនួន៤៣លើក។

លន បញ្ញា ជាកីឡាករឃីកបុកស៊ីង និងគុនខ្មែរដ៏ល្អម្នាក់នៅក្នុងប្រទេសកម្ពុជាដែលបានឈ្នះមេដាយមាស១ និងប្រាក់១ ពីកីឡាស៊ីហ្គេមពីរលើកចុងក្រោយ។ ស៊ីហ្គេមលើកទី៣២ រូបគេបានឈ្នះមេដាយមាសលើកីឡាឃីកបុកស៊ីងទម្ងន់ ៦៧គីឡូក្រាម ក្រោយឈ្នះកីឡាករ Haris Sofyan Abdul របស់ឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ លន បញ្ញា បានប្រាប់«កម្ពុជាថ្មី»ថា ៖«បច្ចុប្បន្នខ្ញុំមានខ្សែក្រវាត់៤គ្រឿង។ គោលដៅបន្ទាប់របស់ខ្ញុំគឺបន្តហ្វឹកហាត់ឲ្យខ្លាំង ហើយក៏ចង់ឈ្នះខ្សែក្រវាត់បន្ថែមទៀត។ សម្រាប់ដៃគូប្រកួតខ្ញុំចង់ជួបកីឡាករបរទេសខ្លាំងៗ ពីព្រោះនៅពេលខ្ញុំជួបដៃគូខ្លាំងៗគឺជាឱកាសអភិវឌ្ឍសមត្ថភាពបន្ថែមទៀត។ ជាពិសេស ខ្ញុំកាន់តែខ្លាំង កាន់តែល្បី ហើយជួយផ្សព្វផ្សាយគុនខ្មែរលើឆាកអន្តរជាតិផង»។

ចុងក្រោយបំផុត លន បញ្ញា បានឈ្នះខ្សែក្រវាត់គ្រុឌគុនខ្មែរអន្តរជាតិ តាមរយៈការផ្តួលជើងខ្លាំងអាហ្វ្រិកកីឡាករ អិនសេដូ ហ្គូមបេ។ ទោះបីសម្រេចបានសមិទ្ធផលធំៗជាច្រើនក្នុងអាជីពក៏កីឡាកររូបនេះនៅតែមានមហិច្ឆតាចង់ឈ្នះខ្សែក្រវាត់បន្ថែមទៀត។

ការប្រកួតចុងក្រោយរបស់កីឡាករ លន បញ្ញា គឺផ្តួលកីឡាករ អាម៉ាឌី ហ្វាយ៉ាត មកពីប្រទេសអ៉ីរ៉ង់ឲ្យបោះបង់ចោលការប្រកួតក្នុងទឹកទី២ កាលពីថ្ងៃទី១៧ ខែកញ្ញា ឆ្នាំ ២០២៣៕

អត្ថបទ៖ រតនា

Related Topics:លន បញ្ញា