ប៉ះគ្នាព្រឹកស្អែក ខាន់ ចេសា មានទំនុកចិត្តយកឈ្នះ Danielle ដើម្បីខ្សែក្រវាត់ ONE

កីឡាការិនីខ្មែរ-អាមេរិក ខាន់ ចេសា នៅតែមានទំនុក​ក្នុងការយកឈ្នះកីឡាការិនី​អាមេរិក​ Danielle Kelly ក្នុង​ការប្រកួត​ដណ្តើម​​ខ្សែក្រវាត់​​​ជំនាញ​ឃ្លេ​ពិភព​លោក​នៅ​សង្វៀន ONE Championship នៅ​ព្រឹក​សៅរ៍ ថ្ងៃ​ទី​៣០ ខែ​កញ្ញា ឆ្នាំ​២០២៣ នៅ​ប្រទេស​សិង្ហបុរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ខាន់ ចេសា ធ្លាប់ជួបជាមួយកីឡាការិនី Danielle Kelly ម្តងរួចមកហើយកាល​ពី​ថ្ងៃទី២៦ ខែកុម្ភៈ ឆ្នាំ ២០២១ ក្នុង​កម្មវិធី Who’s Number One (WNO)។ ជា​លទ្ធផល កីឡាការិនី​​កម្ពុជា​​បាន​យក​ឈ្នះ​ពិន្ទុកីឡាការិនី ​​ Kelly។

ក្នុងបទសម្ភាស​មុនការប្រកួត ខាន់ ចេសា និយាយថា​៖«ខ្ញុំមានទំនុកចិត្តចំពោះការប្រកួតថ្ងៃស្អែកនេះ ដោយសារខ្ញុំធ្លាប់យកឈ្នះ Danielle ម្តងហើយ។ ខ្ញុំជឿជាក់ ពី​ព្រោះ​ខ្ញុំបានហ្វឹកហាត់នៅ​ក្លិប​ជឺជីតស៊ូមួយ​ដ៏​ល្អ មានគ្រូបង្វឹកល្អ។ ខ្ញុំបានត្រៀមខ្លួនរួចហើយសម្រាប់ការប្រកួតនេះ»។

ខាន់ ចេសា មិនធ្លាប់​ប្រកួតនៅសង្វៀន ONE Championship ទេ បន្ទាប់​ពី​​បានកុងត្រា​កាល​ពី​ងឆ្នាំ២០២២។ ចំណែក  Kelly ​​​ធ្លាប់​​ប្រកួត៣​ដង​ហើយ​​នៅ​ ​ONE ​ដោយ​មិន​ទាន់​ចាញ់​ឡើយ។ ក្នុង​នោះ​នាង​បាន​ឈ្នះ​កីឡាការិនី​ Mariia Molchanova និង​ Ayaka Miura ព្រម​ទាំង​ស្មើពិន្ទុ Mei Yamaguchi។

តើ​ ខាន់ ចេសា នឹងក្លាយជា​អត្តពលិក​កម្ពុជា​ដំបូង​គេ​​ដែល​បាន​ឈ្នះ​ខ្សែ​ក្រវាត់​នៅ ONE Championship ទេ?

អត្ថបទ៖ ផា រតនា​