កីឡា

សង្វៀនធំ K-1 ចាប់អារម្មណ៍កីឡាករខ្មែរ ក្រោយកីឡាករជប៉ុន២រូបប្រកួតនៅខ្មែរ

បានផុស

៩ ខែ មុន

នៅ

ថ្ងៃអង្គារ ៣ តុលា ២០២៣

ដោយ

កីឡាករប្រដាល់ជប៉ុនលំដាប់ជួរមុខ និងស្ថាប័នរៀបចំការប្រកួតប្រដាល់ឃីកបុកស៊ីងលំដាប់ពិភពលោក K-1 បានចាប់អារម្មណ៍កីឡាករគុនខ្មែរ បន្ទាប់ពីកីឡាករជប៉ុន២រូបបានមកប្រកួតចាញ់កីឡាករកម្ពុជាកាលពីចុងសប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករជប៉ុន Kamemoto Yusho ត្រូវបានម្ចាស់មេដាយមាសស៊ីហ្គេម ឈុត សេរីវ៉ាន់ថង ផ្តួលឲ្យសន្លប់តាមរយៈការវាយកែងជាច្រើនបណ្តាលឲ្យអាជ្ញាកណ្តាលបញ្ឈប់ក្នុងទឹកទី១កាលពីយប់ថ្ងៃសៅរ៍ ទី៣០ ខែកញ្ញា ឆ្នាំ២០២៣។

នៅរាត្រីនោះដែរ ដៃភ្លើងជើងរន្ទះ រឿង សោភ័ណ្ឌ បានយកឈ្នះលើកីឡាករជប៉ុន Hiroyuki Ihara ដោយពិន្ទុដាច់តែម្តងដើម្បីក្លាយជាម្ចាស់ខ្សែក្រវាត់គុនខ្មែរ IPCC អន្តរទ្វីប។

ការប្រកួតរបស់កីឡាករជប៉ុនទាំងពីរត្រូវបានផេកផ្លូវការរបស់ស្ថាប័នប្រដាល់ K-1 យកទៅបង្ហោះដោយបានរៀបចំការប្រកួតនៅលើទឹកដីកម្ពុជា។ នារាត្រីនោះ កីឡាករជប៉ុនជាជើងខ្លាំង Yoza Yuki ម្ចាស់ខ្សែក្រវាត់ពិភពលោក K-1 បានចូលមើលការប្រកួតតាមបណ្តាញទំនាក់ទំនងសង្គម។ អ្វីដែលគួរឲ្យចាប់អារម្មណ៍កីឡាករជប៉ុនរូបនេះទំនងជាបើកភ្លើងខៀវឲ្យ ឈុត សេរីវ៉ាន់ថង ប្រកួតដណ្តើមខ្សែក្រវាត់ពិភពលោក K-1 ពីរូបគេ។

ក្រោយចប់ការប្រកួត កីឡាករជប៉ុន Kamemoto បាននិយាយថា ៖«ការប្រកួតដោយប្រើកែងមិនមែនជាការងាយស្រួលទេ។ ទោះបីជាយ៉ាងណា ខ្ញុំសម្រេចចូលរួមប្រកួតក្នុងកម្មវិធីនេះ ដូច្នេះបរាជ័យនេះគឺដោយសារសមត្ថភាពរបស់ខ្ញុំ មិនមែនមកពីច្បាប់ ឬបរិយាកាសនៃការប្រកួតទេ»។

កីឡាករ Kamemoto និង Ihara សុទ្ធតែបានអរគុណដល់អ្នកគាំទ្រកម្ពុជា និងអ្នករៀបចំការប្រកួតដែលបានផ្តល់ឱកាសឲ្យអ្នកទាំងពីរបានមកប្រកួតជាលើកដំបូងនៅទឹកដីខ្មែរ ហើយទទួលបានការគាំទ្រយ៉ាងច្រើនកុះករ។

ការនាំយកកីឡាករជប៉ុនមកប្រកួតនៅទឹកដីកម្ពុជាជាសញ្ញាល្អមួយបង្ហាញឲ្យឃើញថា កីឡាករកម្ពុជាមានគុណភាព និងសមត្ថភាពខ្ពស់ដែលអាចចេញទៅប្រកួតនៅក្រៅប្រទេសបាន ហើយជាផលចំណេញសម្រាប់គុនខ្មែរសម្រាប់ការផ្សេព្វផ្សាយលើឆាកអន្តរជាតិ។ តាមប្រវត្តិ មិនធ្លាប់មានកីឡាករកម្ពុជាបានចូលរួមប្រកួតនៅសង្វៀនធំ K-1 ទេដែលភាគច្រើនរៀបចំការប្រកួតនៅជប៉ុន និងចិន។

កីឡាករ Kamemoto មានកណ្តាប់ដៃ និងទាត់ល្អ ប៉ុន្តែរូបគេមិនចេះប្រើកែងទេ ដូច្នេះហើយទើបបានជា ឈុត សេរីវ៉ាន់ថង ផ្តោតលើការប្រើកែងរហូតផ្តួលឲ្យសន្លប់យ៉ាងឆាប់រហ័ស។

Yoza Yuki ដែលជាកីឡាករឃីកបុកស៊ីងបានចាប់ផ្តើមអាជីពពីឆ្នាំ២០១៩រហូតបច្ចុប្បន្នធ្លាប់ប្រកួតបាន១៨ដង ក្នុងនោះឈ្នះ១៦ដង និងចាញ់២ដង។ រូបគេបានឈ្នះខ្សែក្រវាត់ K-1 ពិភពលោកទម្ងន់៦២.៥គីឡូក្រាមកាលពីខែមីនា ឆ្នាំ២០២៣ បន្ទាប់ពីឈ្នះពិន្ទុកីឡាករ Taio Asahisa៕