កីឡា

ការប្រកួតកីឡាសកលវិទ្យាល័យអាស៊ានពន្យារពេលទៀតហើយ ដោយសារកូវីដ ១៩ រាតត្បាតខ្លាំងនៅប្រទេសថៃម្ចាស់ផ្ទះ

បានផុស

៥ years មុន

នៅ

ថ្ងៃព្រហស្បតិ៍ ៤ កុម្ភៈ ២០២១

ដោយ

ភ្នំពេញ ៖ លោកបឹង គឹមតោ ប្រធាននាយកដ្ឋានអប់រំកាយ និងកីឡាសិស្សនិស្សិត បានប្រាប់ឲ្យដឹងថា មួយរយៈពេលចុងក្រោយនេះមេរោគកូវីដ ១៩បានរាតត្បាតខ្លាំងនៅប្រទេសថៃដែលជាប្រទេសត្រូវធ្វើជាម្ចាស់ផ្ទះនៃព្រឹត្តិការណ៍នេះ ហេតុនេះទើបព្រឹត្តិការណ៍នេះត្រូវបានគេប្រកាសពន្យារបន្តនោះ។

ការប្រកួតកីឡាសាកលវិទ្យាល័យអាស៊ាន(ASEAN University Games)លើកទី២០ បន្ទាប់ពីបានពន្យារពេលជាច្រើនលើកមកហើយ ហើយកាលបរិច្ឆេទថ្មីគ្រោងនឹងធ្វើនៅខែ មិថុនា ឆ្នាំ២០២១នេះ ប៉ុន្តែពេលនេះត្រូវបានលើកពេលបន្តទៀតហើយ។

បើតាមលោកបឹង គឹមតោ ថា ក្នុងលិខិតមួយច្បាប់របស់លោក MOHD Rushdan MOHD Jailani ប្រធានសហព័ន្ធកីឡាសិស្ស និស្សិតអាស៊ីអាគ្នេយ៍ ផ្ញើជូនលោក ស សុខា រដ្ឋលេខាធិការក្រសួងអប់រំយុវជន និងកីឡា និង ជាប្រធានសហព័ន្ធកីឡាសិស្ស និស្សិតកម្ពុជានោះបញ្ជាក់ថា ការប្រកួតកីឡាសកលវិទ្យាល័យអាស៊ីអាគ្នេយ៍នឹងត្រូវលើកទៅធ្វើនៅឆ្នាំ២០២២វិញ គឺចាប់ពីថ្ងៃទី២០ដល់៣០ខែឧសភា។

ប្រភេទកីឡាចំនួន៣០ប្រភេទ នឹងត្រូវដាក់ឲ្យប្រកួតសម្រាប់ព្រឹត្តិការណ៍នេះ តែសម្រាប់កម្ពុជា នឹងបញ្ជូនទៅចូលរួមប្រកួតចំនួនតែ៧ប្រភេទប៉ុណ្ណោះ ។ អ្វីដែលគួរឲ្យភ្ញាក់ផ្អើលនោះ គឺកម្ពុជានឹងបញ្ជូនប្រភេទកីឡាបាល់ទាត់ទៅចូលរួមជាលើកដំបូង។

កីឡាទាំង៧ប្រភេទ ដែលកម្ពុជានឹងបញ្ជូនទៅចូលរួមប្រកួតនោះ មានប្រភេទបាល់ទាត់ ហែលទឹក អត្តពលកម្ម ប៉េតង់ ការាតេ តេក្វាន់ដូ និង ជីជីតស៊ូ ។ ក្រុមកីឡាករបាល់ទាត់ដែលចូលរួមនេះគឺជាក្រុមខ្លាំងវ័យក្មេងរបស់កម្ពុជាដែលមានកីឡាករខ្លះជាបេក្ខភាពត្រៀមស៊ីហ្គេមឆ្នាំ២០២៣។

សូមបញ្ជាក់ថា ព្រឹត្តិការណ៍នេះ ត្រូវបង្កើតឡើងតាំងពីឆ្នាំ១៩៨១មកម្ល៉េះ ហើយមកដល់ឆ្នាំ២០២០គឺជាការប្រកួតលើកទី២០ តែដោយសារការរំខាននៃមេរោគកូវីដ១៩នោះ ទើបព្រឹត្តិការណ៍នេះ ត្រូវពន្យារពេលមកដល់ពាក់កណ្ដាលឆ្នាំ២០២១ ។ពេលនេះព្រឹត្តិការណ៍នេះត្រូវពន្យារដល់ជិតពាក់កណ្ដាលឆ្នាំ២០២២ ។សម្រាប់ការប្រកួតកីឡាសាកលវិទ្យាល័យអាស៊ាន(ASEAN University Games)លើកទី២០នេះធ្វើនៅខេត្តUbon Ratchathani ៕

ដោយ ៖ វិសិទ្ធ