កីឡា

Nick Taylor ប្តេជ្ញាធ្វើឲ្យអ្នកមានមោទនភាពសម្រាប់ការប្រកួតថ្ងៃនេះ

បានផុស

៣ years មុន

នៅ

ថ្ងៃអង្គារ ១៧ តុលា ២០២៣

ដោយ

កីឡាករខ្មែរ-អាមេរិករបស់ព្រះខ័នរាជស្វាយរៀង Nick Taylor បានប្តេជ្ញាធ្វើឲ្យអ្នកគ្រប់គ្នាមានមោទនភាពសម្រាប់ការប្រកួតដ៏សំខាន់វគ្គជម្រុះជុំទី១ ជើងឯកពិភពលោកឆ្នាំ២០២៦ ជាមួយប៉ាគីស្ថាន វេលាម៉ោង៤រសៀល ថ្ងៃទី១៧ ខែតុលា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិករបស់ព្រះខ័នរាជស្វាយរៀងរូបនេះមិនត្រូវបានគ្រូបង្វឹកដាក់ឲ្យចូលលេងទេក្នុងជើងទី១ដែលបញ្ចប់ទៅដោយលទ្ធផលស្មើគ្នា ០-០ កាលពីថ្ងៃទី១២ ខែតុលា ឆ្នាំ២០២៣ នៅរាជធានីភ្នំពេញ។

ទោះបីជាយ៉ាងណា ដោយសារលទ្ធផលគ្មានគ្រាប់បាល់ក្នុងជើងទី១ អ្នកគាំទ្រចង់ឲ្យគ្រូបង្វឹកលោក Felix Dalmas ដាក់ Nick Taylor ឲ្យចូលលេងក្នុងជើងទី២ ហើយរូបគេអាចមានភាគរយខ្ពស់សម្រាប់ការបង្ហាញខ្លួននារសៀលនេះ។

ជុំវិញការប្រកួតនេះ ខ្សែបម្រើស្លាប Nick Taylor បាននិយាយថា ៖«ផ្តោតស្មារតី និងប្តេជ្ញាចិត្តពេញលេញសម្រាប់ការប្រកួតដ៏សំខាន់ថ្ងៃនេះ។ តែងតែមានកិត្តិយសដែលបានតំណាងឲ្យប្រទេសជាតិមួយនេះ យើងនឹងធ្វើឲ្យអ្នកមានមោទនភាព»។

ការប្រកួតជើងទី២ ធ្វើនៅកីឡដ្ឋាន Jinnah ក្នុងទីក្រុងអីស្លាម៉ាបាដ ជាការរៀបចំប្រកួតលើកដំបូងរបស់ម្ចាស់ផ្ទះប៉ាគីស្ថាន បន្ទាប់ពីត្រូវបានហាមអស់រយៈពេល៨ឆ្នាំដោយសារបញ្ហាសន្តិសុខ។ ការប្រកួតនេះនឹងសម្រេចថា តើក្រុមមួយណាដែលត្រូវឡើងទៅវគ្គជម្រុះជុំទី២ដែលប្រជុំដោយក្រុមខ្លាំងៗនៅតំបន់អាស៊ី។

ក្រុមដែលទទួលបានជ័យជម្នះក្នុងការប្រកួតរសៀលនេះនឹងឡើងទៅ វគ្គជម្រុះជុំទី២ FIFA World Cup 2026 ស្ថិតនៅពូល G ជាមួយក្រុមជម្រើសជាតិ អារ៉ាប៊ីសាអ៊ូឌីត ហ្ស៊កដានី និងតាជីគីស្ថាន៕

អត្ថបទ៖ វីរបុត្រ