កីឡា

ក្រុមបាល់ទាត់នារី៤បានឡើងទៅជម្រុះកីឡាអូឡាំពិកជុំទី៣ក្នុងតំបន់អាសុី

បានផុស

៣ years មុន

នៅ

ថ្ងៃព្រហស្បតិ៍ ២ វិច្ឆិកា ២០២៣

ដោយ

ការប្រកួតប្រជែងវគ្គជម្រុះជុំទី២ ក្នុងព្រឹត្តិការណ៍អូឡាំពិកប្រចាំតំបន់អាស៊ី បានបញ្ចប់កាលពីថ្ងៃទី១ ខែវិច្ឆិកា ឆ្នាំ២០២៣ ដោយបានរកឃើញក្រុមចំនួន៤បានឡើងទៅវគ្គជម្រុះជុំទី៣បន្តទៀត។

ក្រុមបាល់ទាត់នារីកូរ៉េខាងជើង ជប៉ុន និង អូស្រ្ថាលី បានឡើងទៅជុំទី៣ ក្នុងនាមជាក្រុមឈរលេខ១។ ដោយឡែក សម្រាប់ក្រុមបាល់ទាត់នារីអ៊ូបេគីស្ថាន បានឡើងទៅវគ្គបន្តក្នុងនាមជាក្រុមលេខ២ ល្អបំផុត ខណៈក្រុមបាល់ទាត់នារីនៅតំបន់អាស៊ានបានធ្លាក់អស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីកូរ៉េខាងជើង ធ្វើបានល្អក្នុងវគ្គជម្រុះជុំទី២ ព្រឹត្តិការណ៍អូឡាំពិកក្នុងតំបន់អាស៊ី ដោយប្រកួត៣លើក ឈ្នះ២និងស្មើ១ មាន៧ពិន្ទុឈរលេខ១ ក្នុងពូល B ។ ពួកគេបានយកឈ្នះក្រុមបាល់ទាត់នារីចិន ២-១, ស្មើគ្នា ០-០ ជាមួយកូរ៉េខាងត្បូង និងចុងក្រោយយកឈ្នះក្រុមនារីថៃ ៧-០។ សម្រាប់ជុំទី៣ ក្រុមបាល់ទាត់នារីខាងត្បូងត្រូវជួបក្រុមនារីជប៉ុន។

សម្រាប់ក្រុមបាល់ទាត់នារីអូស្រ្តាលី បានឡើងទៅវគ្គជម្រុះជុំទី៣ បន្ទាប់ពីឈរលេខ១ ក្នុងពូលA តាមរយៈជ័យជម្នះទាំង៣ប្រកួត រកបាន៩ពិន្ទុពេញ។ ក្រុមនារីអូស្រ្តាលីបានឈ្នះអុីរ៉ង់ ២-០, ឈ្នះហ្វីលីពីន ៨-០ និង ឈ្នះឆាយនីសតៃបុិ ៣-០។ ក្រុមបាល់ទាត់នារីអូស្រ្តាលីត្រូវជូបក្រុមបាល់ទាត់នារីអ៊ូបេគីស្ថាន នៅវគ្គជម្រុះជុំទី៣។

ចំពោះក្រុមបាល់ទាត់នារីជប៉ុន ធ្វើបានល្អក្នុងវគ្គជម្រុះជុំទី២ ប្រកួត៣លើក ឈ្នះទាំង៣ រកបាន៩ពិន្ទុ ឈរលេខ១ ក្នុងពូល C ។ នារីជប៉ុនបានយកឈ្នះក្រុមនារីឥណ្ឌា ៧-០, ឈ្នះក្រុមនារីអ៊ូបេគីស្ថាន ២-០ និងចុងក្រោយយកឈ្នះក្រុមនារីវៀតណាម ២-០។ នៅជុំទី៣ ក្រុមនារីជប៉ុនត្រូវជួបក្រុមបាល់ទាត់នារីខាងជើង។

ក្រុមបាល់ទាត់នារីអ៊ូបេគីស្ថាន ក៏បានឡើងទៅវគ្គជម្រុះជុំទី៣ ក្នុងនាមជាក្រុមលេខ២ល្អបំផុត។ ក្រុមនារីអ៊ូបេគីស្ថានឈ្នះទាំង២ និងចាញ់១ រកបាន៦ពិន្ទុ ឈរលេខ២ ក្នុងពូល C ។ ក្រុមនារីអ៊ូបេគីស្ថានបានឈ្នះវៀតណាម ១-០, ចាញ់ក្រុមនារីជប៉ុន ២-០ និងឈ្នះក្រុមនារីឥណ្ឌា ៣-០។ ក្រុមបាល់ទាត់នារីអ៊ូបេគីស្ថានត្រូវជូបក្រុមបាល់ទាត់នារីអូស្រ្តាលី នៅវគ្គជម្រុះជុំទី៣។

ដោយឡែកក្រុមបាល់ទាត់នារីនៅតំបន់អាស៊ានគ្មានក្រុមណាមួយឡើងទៅជម្រុះជុំទី៣ឡើយ បន្ទាប់ពីធ្លាក់ត្រឹមវគ្គជម្រុះជុំទី២គឺ វៀតណាម ហ្វីលីពីន និងថៃ៕