កីឡា
ប៉ឺត សង្ឃឹម លើកមូលហេតុ អ្នកប្រដាល់ខ្លះឡើងលឿន ក៏ធ្លាក់ចុះវិញឆាប់
កីឡាករប្រដាល់គុនខ្មែរមួយចំនួនត្រូវបានមើលឃើញរក្សាគុណភាពខ្លាំងរបស់ខ្លួនមិនបានយូរអង្វែងទេ បន្ទាប់ពីខិតខំប្រឹងប្រែងរហូតឡើងខ្លាំងដល់កម្រិតមួយដែលឈានមុខគេនៅក្នុងប្រទេស ជាពិសេសនៅពេលកីឡាករអាយុច្រើនបន្តិចក៏ចាប់ផ្តើមថយចុះសមត្ថភាពវិញគួរឲ្យកត់សំគាល់។

វាមានកត្តាជាច្រើនដែលជំរុញឲ្យកីឡាករមួយចំនួនឆាប់ថយចុះសមត្ថភាពនៅពេលពួកគេឈានដល់កម្រិតខ្ពស់។ ពាក់ព័ន្ធនឹងបញ្ហានេះ កីឡាករ ប៉ឺត សង្ឃឹម ដែលជាម្ចាស់មេដាយមាសកីឡាស៊ីហ្គេម២សម័យកាលបានយល់ឃើញថា ការបន្ថយកម្រិតហ្វឹកហាត់គឺជាបញ្ហាចម្បងមួយធ្វើឲ្យកីឡាករឆាប់ថយចុះសមត្ថភាព។
ក្នុងបទសម្ភាសជាមួយសារព័ត៌មាន«កម្ពុជាថ្មី» ប៉ឺត សង្ឃឹម បានលើកឡើងថា ៖«ពេលខ្លះ យើងចាប់ផ្តើមពីដំបូង យើងខំប្រឹងខ្លាំងណាស់។ យើងខំប្រឹងពីព្រោះយើងចង់ល្បី តែពេលដល់ល្បីតាមអ្វីដែលយើងចង់បាន មានគេស្គាល់ច្រើន ក៏ចាប់ផ្តើមសប្បាយច្រើនដែរ។ សប្បាយច្រើនជាងការហ្វឹកហាត់ បណ្តោយខ្លួនតាមភាពសប្បាយ ពីព្រោះយើងអាងខ្លួនល្បី ហើយក៏បណ្តោយខ្លួន»។

«និយាយឲ្យចំគឺបានបន្ធូបន្ថយការហ្វឹកហាត់ ហ្វឹកហាត់មិនបានដិតដល់ដូចពីដំបូងៗ។ ភាគតិចណាស់ដែលកីឡាករអត់សូវដើរលេងច្រើន។ ពួកគាត់មិនមែនដើរលេងដាច់យប់អីទេ គ្រាន់តែថា មានមិត្តភក្តិហូចចុកញឹកញាប់ជាដើម។ អីចឹងហើយបានជា កីឡាករដែលអាយុច្រើនបន្តិចគឺធ្លាក់ចុះសមត្ថភាពវិញលឿនគឺបណ្តាលមកពីស្ទើរការហ្វឹកហាត់»។
កន្លងមកអ្នកគាំទ្រឃើញស្រាប់ហើយ កីឡាករថៃមួយចំនួនអាយុច្រើនចាប់ពី៣៥ឆ្នាំដល់៥០ឆ្នាំក៏នៅតែរក្សារាងកាយមាំមួន និងបានមកប្រកួតជាមួយកីឡាករកម្ពុជាថែមទៀត។ ទោះបីជាយ៉ាងណា រឿង សុភ័ណ្ឌ អាយុច្រើនបន្តិចមែន ប៉ុន្តែសមត្ថភាពនៅល្អ ហើយ ព្រំ សំណាង ទើបតែទទួលបានជោគជ័យខ្លាំងនៅពេលអាយុជាង៣០ឆ្នាំក្រាស់ទៅហើយ។

ប៉ឺត សង្ឃឹម ដែលជាកីឡាករទទួលបានការសរសើរខ្លាំងពីអ្នកជំនាញកីឡាប្រដាល់ និងអ្នកគាំទ្រអំពីសមត្ថភាពរបស់ខ្លួនបានបន្តថា បច្ចុប្បន្ន កីឡាប្រដាល់ទទួលបានតម្លៃខ្លួនច្រើន ហើយកីឡាករខ្លាំងៗពិតប្រាកដកំពុងរកចំណូលបានច្រើន។
«ឥឡូវសង្វៀននីមួយៗបានកុងត្រាកីឡាករល្អៗទុកតែម្តង អីចឹងកីឡាករល្អៗកំពុងត្រូវប៉ាន់»។ ការលើកឡើងរបស់ ប៉ឺត សង្ឃឹម បែបនេះ ស្របពេលកីឡាករល្អៗឈានមុខគេនៅកម្ពុជាកំពុងទទួលបានឱកាសប្រកួតជាញឹកញាប់ និងស្ទើរតែរកពេលសម្រាកមិនបាន ខណៈមានការឧបត្ថម្ភជាថវិកាជាបន្តបន្ទាប់ពីសប្បុរសជន។ ផ្ទុយទៅវិញ ក៏មានគ្រូបង្ហាត់ខ្លះបានត្អួញត្អែរពីកីឡាកររបស់ខ្លួនមិនទទួលបានឱកាសឡើងប្រកួតញឹកញាប់។
ប៉ឺត សង្ឃឹម ទើបតែត្រឡប់មកកាន់សង្វៀនវិញកាលពីខែតុលាកន្លងទៅនេះដោយបានប្រកួតឈ្នះ៣លើកជាប់គ្នា បន្ទាប់ពីសម្រាកព្យាបាលរបួសច្រើនខែក្រោយពេលព្រឹត្តិការណ៍កីឡាស៊ីហ្គេមចប់កាលពីចុងខែឧសភា ឆ្នាំ២០២៣៕

អត្ថបទ៖ វីរបុត្រ

-
ព័ត៌មានអន្ដរជាតិ១០ ម៉ោង ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២០ ម៉ោង ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
កីឡា១ សប្តាហ៍ ago
កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
ព័ត៌មានអន្ដរជាតិ៣ ថ្ងៃ ago
តើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?