កីឡា

ការយក Privat ចូលជម្រើសជាតិកម្ពុជាឈានដល់ដៃមេធាវីអន្តរជាតិតស៊ូជាមួយ FIFA

បានផុស

២ years មុន

នៅ

ថ្ងៃសុក្រ ១០ វិច្ឆិកា ២០២៣

ដោយ

ការផ្តល់សញ្ជាតិខ្មែរទៅកីឡាករដើមកំណើតកាមេរូន Privat Mbarga ដើម្បីក្លាយជាកីឡាករបាល់ទាត់ជម្រើសជាតិកម្ពុជានៅមិនទាន់រួចរាល់ជាផ្លូវការទេដោយសហព័ន្ធកីឡាបាល់ទាត់កម្ពុជាកំពុងធ្វើការជាមួយមេធាវីអន្តរជាតិដើម្បីតស៊ូមតិជាមួយសហព័ន្ធកីឡាបាល់ទាត់អន្តរជាតិ (FIFA)។

សហព័ន្ធកីឡាបាល់ទាត់កម្ពុជាបានប្រកាសនៅព្រឹកថ្ងៃទី១០ ខែវិច្ឆិកា ឆ្នាំ២០២៣នេះថា ៖«តបតាមការស្នើសុំរបស់ផ្នែកបច្ចេកទេសនៃក្រុមជម្រើសជាតិកម្ពុជា ដែលឃើញពីភាពអំណោយផល និងសមត្ថភាពរបស់កីឡាករ Privat Mbarga ហើយក៏ដូចជាមានគោលជំហរ ក្នុងការតាំងចិត្ត ចង់ចូលសញ្ជាតិដើម្បីចូលរួមលេងឲ្យក្រុមជម្រើសជាតិកម្ពុជា សហព័ន្ធកីឡាបាល់ទាត់កម្ពុជាបានដាក់សំណើទៅរាជរដ្ឋាភិបាលកម្ពុជា។ រាជរដ្ឋាភិបាលក៏បានចូលរួមគាំទ្រក្នុងការស្នើសុំព្រះមហាក្សត្រកម្ពុជា ក្នុងការចេញព្រះរាជក្រឹត្យត្រាស់បង្គាប់ ផ្តល់សញ្ជាតិខ្មែរជាផ្លូវការដល់កីឡាករ Privat Mbarga»។

«អំឡុងការកោះហៅកីឡាករបោះជុំរំហ្វឹកហាត់ត្រៀមលេងពានរង្វាន់បាល់ទាត់ FIFA World Cup 2026 Preliminary Joint Qualification វគ្គជម្រុះជុំទី១ កាលពីខែតុលាកន្លងទៅ នៅក្នុងការចុះឈ្មោះកីឡាករ FIFA ពុំបានបញ្ជាក់ច្បាស់លាស់អំពីលក្ខណៈបុគ្គលិករបស់កីឡាករ Privat Mbarga ដែលអាចលេងតំណាងឲ្យកម្ពុជាបាន។ នៅក្នុងការឆ្លើយតបទៅបញ្ហានេះ សហព័ន្ធកីឡាបាល់ទាត់កម្ពុជាបានជួលមេធាវីនៅប្រទេសស្វីស ដែលជាអ្នកឯកទេសក្នុងច្បាប់កីឡា បើកក្តីក្នុងការតស៊ូមតិទៅកាន់ FIFA ដើម្បីបញ្ជាក់នូវលក្ខណៈវិនិច្ឆ័យរបស់ Privat Mbarga ក្នុងការលេងឲ្យក្រុមជម្រើសជាតិកម្ពុជា។ បច្ចុប្បន្នមេធាវីដែលសហព័ន្ធកីឡាបាល់ទាត់កម្ពុជាបានជួលឲ្យធ្វើការតស៊ូមតិជាមួយ FIFA កំពុងធ្វើការងារក្នុងករណីនេះ។ ពួកយើងនឹងធ្វើបច្ចុប្បន្នភាពបន្ថែមទៀតនៅពេលទទួលបានព័ត៌មានបន្ថែមអំពីករណីនេះ»។

Privat អាយុ៣១ឆ្នាំធ្លាប់លេងនៅលីគកំពូលកម្ពុជាជាច្រើនរដូវកាលក្នុងនោះចូលរួមជាមួយបឹងកេតនៅឆ្នាំ២០១៣ ហើយនៅឆ្នាំ២០១៤-១៥ចូលរួមជាមួយ វេស្ទើនយូណាញធីត។ ឆ្នាំ២០១៥-១៦ រូបគេបានចូលរួមជាមួយអង្គរថាយហ្គឺរ និងឆ្នាំ២០១៦-១៧ចូលរួមជាមួយណាហ្គាវើលដ៍មុនពេលផ្លាស់ទៅក្លិបថៃ Samut Prakan ២០១៧-១៨។

ឆ្នាំ២០១៨-១៩ រូបគេបានត្រឡប់មកកម្ពុជាវិញចូលរួមជាមួយអាស៊ីអឺរ៉ុប មុនពេលចូលរួមជាមួយព្រះខ័នរាជស្វាយរៀង៣រដូវកាលគឺ២០១៩-២០២០ និង២០២១ ជាពេលដែលរូបគេឈ្នះស្បែកជើងមាស២ដង និងជាកីឡាករល្អបំផុតប្រចាំរដូវកាល២០១៩ មុនពេលផ្លាស់ទៅក្លិប Bali United របស់ប្រទេសឥណ្ឌូណេស៊ីនៅចុងឆ្នាំ២០២១៕