ជីវិតកម្សាន្ដ

អតីតអ្នកប្រដាល់ថៃ Somrak បដិសេធរំលោភក្មេងអាយុ១៧ឆ្នាំ និងទម្លាយថា លោកលែងលះភរិយា

បានផុស

៥ ខែ មុន

នៅ

ថ្ងៃចន្ទ ១១ ធ្នូ ២០២៣

ដោយ

នៅថ្ងៃទី១១ ខែធ្នូ ឆ្នាំ២០២៣ អតីតអ្នកប្រដាល់ថៃលោក Somrak Kamsing បានប្រកាសរកមេធាវីប្រឆាំងនឹងការចោទប្រកាន់ពីបទរំលោភក្មេងស្រីអាយុ១៧ឆ្នាំ និងសារភាពថាលោកបានត្រឹមឱបថើបជនរងគ្រោះ តែមិនបានប្រព្រឹត្តអំពើអសីលធម៌ណាមួយទេ។

ហេតុការណ៍នេះបានកើតឡើងនៅថ្ងៃទី0៩ ខែធ្នូ ឆ្នាំ២០២៣ វេលាម៉ោង៩និង៣០នាទីយប់ ដោយជនរងគ្រោះមានអាយុ១៧ឆ្នាំ បានរាយការណ៍ទៅកាន់ស្ថានីយ៍ប៉ូលិស Mueang Khon Kaen ប្ដឹងទៅលើអតីតអ្នកប្រដាល់ដ៏ល្បីមួយរូបជាឪពុកតារាសម្ដែង Best Rakwanee ហើយចោទប្រកាន់ពីបទបៀតបៀនផ្លូវភេទ និងប្រព្រឹត្តអំពើមិនសមរម្យនៅសណ្ឋាគារមួយក្នុងក្រុងខនកែន។

ក្រោយមក Somrak បានបើកចំហអំពីករណីដែលបានកើតឡើង។ គាត់បានដឹងដំណឹងនេះរួចហើយ និងបានចាត់តាំងមេធាវីដើម្បីអនុវត្តនីតិវិធីច្បាប់។ ក្នុងនោះលោកថែមទាំងបញ្ចាក់ពីភាពស្អាតស្អំរបស់ខ្លួនថា “ខ្ញុំមិនបានប្រព្រឹត្តករណីរំលោភទេ! ដោយកិត្តិយសជាបុរសនិងអតីតម្ចាស់មេដាយមាសអូឡាំពិក ពិតជាគ្មានវិធីធ្វើដូច្នោះទេ។ តែពួកយើងពិតជាមានបានអាក្រាតកាយ ឱបនិងថើប ប៉ុន្តែខ្ញុំសូមបដិសេធមិនបានដេកជាមួយគ្នា។ ខ្លួនខ្ញុំផ្ទាល់មិនចង់និយាយច្រើនទេទុកឲ្យដំណើរការតាមច្បាប់និងភស្តុតាងដែលមានស្រាប់”។

ទន្ទឹមនោះទៀតសោត អតីតម្ចាស់មេដាយមាសកីឡាប្រដាល់ស្ម័គ្រចិត្តអូឡាំពិកឆ្នាំ ១៩៩៦ រូបនេះ បានទម្លាយពីស្ថានភាពគ្រួសាររបស់លោកថា តាមពិតទៅលោកបានស៊ីញ៉េលែងលះជាមួយភរិយាកាលពីជាងពីរខែមុនមកម៉្លេះ។ ប៉ុន្តែចំពោះមូលហេតុដែលលែងលះ មិនត្រូវបានបង្ហើបឲ្យដឹងនោះទេ។

**ក្រុមគ្រួសាររបស់អតីតអ្នកប្រដាស់ថៃ Somrak**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះយ៉ាងណាក៏ដោយ ករណីមួយនេះបានក្លាយជារឿងកំពុងតែកក្រើកនៅក្នុងប្រទេសថៃ ហើយក៏បានក្លាយជារឿងដែលមនុស្សជាច្រើនចាប់អារម្មណ៍ និងតាមដានខ្លាំង។ ចំណែកក្រុមស៊ើបអង្កេតមួយ ត្រូវបានបញ្ជូនទៅកាន់តំបន់នោះ ដើម្បីប្រមូលព័ត៌មានពីកាមេរ៉ា CCTV ត្រៀមរៀបចំរបាយការណ៍ស៊ើបអង្កេតប្រមូលភស្តុតាងបន្ថែមទៀតផងដែរ៕