គ្រូក្លិប Lens រិះគន់រដ្ឋាភិបាលបារាំងពីវិធានការមុនកីឡាអូឡាំពិក៧ខែ

គ្រូបង្វឹកក្លិបបាល់ទាត់ Lens របស់លីគកំពូលបារាំង លោក Franck Haise បានសម្តែងការមិនយល់ស្របចំពោះការសម្រេចចិត្តរបស់រដ្ឋាភិបាលបារាំង​តាម​រយៈ​សេចក្តីថ្លែងការណ៍ដ៏ចម្រូងចម្រាសមួយថា «តើយើង​រៀបចំព្រឹត្តិការណ៍កីឡាអូឡាំពិក​​ដោយ​របៀបណា បើយើងមិនអាចទទួលអ្នកគាំទ្ររបស់ក្រុម​ Sevilla ប្រមាណ​​​៣០០​នាក់​​ដែលបាន​ត្រៀម​មក​ទស្សនា​ការ​ប្រកួតជា​មួយក្រុម​ Lens  នៅទឹកដីបារាំង?

ប្រទេសបារាំងកំពុងពិបាកក្នុងការគ្រប់គ្រងអ្នកគាំទ្រនៅកីឡដ្ឋានផ្សេងៗ។ កាលពីថ្ងៃសៅរ៍សប្តាហ៍មុន អ្នកគាំទ្រ Nantes ម្នាក់ត្រូវបានចាក់សម្លាប់​ក្នុងការប៉ះទង្គិចគ្នាមុនការប្រកួតរបស់​ក្រុម​ Nantes ជា​មួយ​ក្រុម Nice។ ជាអកុសល ឧបទ្ទវហេតុនេះមិនមែនជាករណីដាច់ដោយឡែកនោះទេ ដោយសារបញ្ហាក៏បានកើតឡើង​កាល​ពី​ខែតុលា នៅ​ពេលការប្រកួតរវាង Marseille និង Lyon។ ក្នុង​ជំនួប​នោះ​ មានបុគ្គលជាច្រើនបានវាយប្រហារ​រថយន្តក្រុងរបស់ក្រុម Lyon បណ្តាលឲ្យគ្រូបង្វឹក Fabio Grosso រងរបួស។

ការស្រែកជេរប្រមាថ ការលើកដៃសញ្ញារបស់ណាស៊ី បដានយោបាយជ្រុលនិយម – ជាច្រើនដែលមានខ្លឹមសារប្រកាន់​ពូជសាសន៍ និងសូម្បីតែអំពើឧក្រិដ្ឋកម្ម – គឺជាអ្វីដែលជ្រុលនិយមបារាំងបានចូលរួមក្នុងរយៈពេលប៉ុន្មានខែកន្លងមកនេះ។

ជាការឆ្លើយតប នៅក្នុងប្រទេស​បដិវត្តន៍បារាំងដែលតែងតែមានមោទនភាពចំពោះសេរីភាពលើសពីអ្វីទាំងអស់ រដ្ឋាភិបាលរបស់​លោកប្រធានាធិបតី Macron បានចាត់វិធានការដែលមិនពេញនិយមក្នុងការហាមឃាត់ការមកដល់របស់អ្នកគាំទ្រ Sevilla របស់​អេស្ប៉ាញ​ សម្រាប់ការប្រកួតពាន​រង្វាន់ Champions League ទល់នឹង Lens កាលពីយប់​ថ្ងៃ​ពុធ​ ទី​១៣ ខែ​ធ្នូ។

រដ្ឋមន្ត្រីក្រសួងមហាផ្ទៃ លោក Gérald Darmanin បានប្រកាសបែបនេះកាលពីថ្ងៃអាទិត្យ ត្រឹមតែ​២​ថ្ងៃមុនការប្រកួត។ នៅពេលសួរអំពីស្ថានភាពនេះ គ្រូបង្វឹក Lens លោក Franck Haise បានសង្កត់ធ្ងន់ថា ៖«ប្រសិនបើប្រទេសបារាំងមិនអាចទទួលអ្នកគាំទ្រ Sevilla ប្រមាណ​​៣០០នាក់​បាន​ ​តើ​យើងនឹងរៀបចំការប្រកួតកីឡាអូឡាំពិក​បាន​ដោយរបៀបណា?

ជាងនេះទៅទៀត គ្រូបង្វឹកក្នុងស្រុកមិនបានលាក់បាំងការខ្វែងគំនិតរបស់លោកជាមួយនឹងវិធានការភ្លាមៗ​របស់​រដ្ឋាភិបាល​ឡើយ​ ហើយដោយ​បាននិយាយថា៖ «វាជាការហាមឃាត់យឺតពេល។ ខ្ញុំចាំថា ការចាប់ឆ្នោតធ្វើឡើងនៅចុងខែសីហា។ អ្នកគាំទ្រ Sevilla ចន្លោះពី ៣០០ ទៅ ៤០០នាក់ បាន​ត្រៀម​​ទៅ​ប្រទេស​បារាំង​ ហើយនៅនាទីចុងក្រោយ យើងប្រាប់ពួកគេថា កុំមក ព្រោះមានបញ្ហាខ្លះ។ បញ្ហា​ក្នុង​ប្រទេសភាគច្រើនកំពុងជួបប្រទះ»។

ករណីនេះបន្ថែមលើបញ្ហាដែលបានកើតឡើងក្នុងប៉ុន្មានសប្តាហ៍​មុន​​ទាក់ទងនឹងការដឹកជញ្ជូន និងការរឹតបន្តឹងលើសេរីភាពសម្រាប់ការប្រកួតកីឡាអូឡាំពិក​ឆ្នាំ​២០២៤។ ដើម្បីចូលទៅក្នុងតំបន់មួយចំនួន​​ក្នុង​ទីក្រុងប៉ារីស​បាន​ ប្រព័ន្ធផ្ទៀងផ្ទាត់បុគ្គលិកលក្ខណៈតាមរយៈកូដ QR គឺត្រូវបានទាមទារ ដែលជាវិធានការមួយ​ត្រូវបានរិះគន់ដោយអង្គការឆ្វេងនិយមថាជាការរំលោភលើឯកជនភាពរបស់មនុស្ស ដោយកំណត់សេរីភាពក្នុងការ​ផ្លាស់​ទី​នៅក្នុងទី​ក្រុង។

ក្នុងរយៈពេលជាង៧ខែរហូតដល់ការចាប់ផ្តើម​ព្រឹត្តិការណ៍កីឡាអូឡាំពិក ឆ្នាំ២០២៤ រដ្ឋាភិបាលបារាំងកំពុងព្យាយាមចាត់វិធានការដើម្បី​ទប់ស្កាត់រលក​ហិង្សាដែលកំពុងកើនឡើងនៅក្នុងប៉ុន្មានខែថ្មីៗនេះ៕

ប្រែសម្រួល៖ មន្នីរ័ត្ន
ប្រភព៖ Inside The Games