កីឡា

លោក អេ ភូថង ផ្ដាំឲ្យកីឡាករចេះសន្សំលុយទុកត្រៀមមានបញ្ហា

បានផុស

២ years មុន

នៅ

ថ្ងៃសុក្រ ៥ មករា ២០២៤

ដោយ

អាជីពជាកីឡាករប្រដាល់ប្រឈមនឹងគ្រោះថ្នាក់គ្រប់ពេលវេលា ដូច្នេះកីឡាករ កីឡាការិនីគ្រប់រូបត្រូវប្រុងប្រយ័ត្នខ្ពស់នៅលើសង្វៀន ជាពិសេសត្រូវចេះបែងចែក និងសន្សំលុយទុកត្រៀមពេលខ្លួនមានបញ្ហារបួស ឬជំងឺកើតឡើងជាយថាហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតអ្នកប្រដាល់ដ៏ល្បី លោក អេ ភូថង បានមើលឃើញសន្ទះគុនខ្មែរកំពុងរីកចម្រើនខ្លាំងនាពេលបច្ចុប្បន្ន។ ទន្ទឹមគ្នានេះលោកបានផ្ដាំទៅអ្នកប្រដាល់គ្រប់រូបឲ្យចេះសន្សំទុក ពីព្រោះអាជីពជាកីឡាករមិនអាចឋិតថេរជារៀងរហូតនោះទេ។ ជូនកាលជួបគ្រោះថ្នាក់ របួស ឬកើតមានជំងឺ ដូច្នេះត្រូវគិតអំពីរឿងនេះ។ ជាពិសេសក្រោយពេលបញ្ចប់អាជីពប្រដាល់ត្រូវមានប្រាក់សម្រាប់ចិញ្ចឹមជីវិត។

លោក អេ ភូថង បានប្រាប់«កម្ពុជាថ្មី»ថា ៖«ទាំងកូនសិស្ស កូនបង្កើត ខ្ញុំតែងតែប្រាប់ថា កុំឲ្យចាយលុយខ្ជះខ្ជាយ។ ត្រូវចេះសន្សំលុយ ព្រោះកីឡាប្រដាល់វាមិនទៀងទេ។ វាមិនឋិតថេរទេ។ បើយើងប្រកួតទៅមានគ្រោះថ្នាក់អី យើងមានលុយព្យាបាលខ្លួនឯង»។

ជីវភាពកីឡាករប្រដាល់បច្ចុប្បន្នល្អប្រសើរ បើប្រៀបធៀបទៅកាលជាង១០ឆ្នាំមុន។ សព្វថ្ងៃមានកម្មវិធីប្រកួតច្រើន តម្លៃខ្លួនខ្ពស់ និងមានរង្វាន់ធំដូចជារថយន្តជាដើម។ កត្តាទាំងអស់នេះហើយដែលធ្វើឲ្យធនធានអ្នកប្រដាល់កើនឡើងច្រើន។

លោក អេ ភូថង បានបន្ថែមថា ៖«ឥឡូវនេះធនធានកីឡាករយើងល្អប្រសើរច្រើនណាស់។ កីឡាករទទួលបានតម្លៃខ្លួនថ្លៃ ប្រាក់រង្វាន់ក៏ច្រើន។ កីឡាករក្មេងៗប្រឹងហាត់ដើម្បីចង់ល្បី។ បើបៀបធៀបទៅជំនាន់មុនខុសគ្នាឆ្ងាយ។ ជំនាន់មុនហាត់មានតែបច្ចេកទេស កម្លាំងអត់សូវមានទេ ហាត់ហើយទៅផ្ទះវិញ តែឥឡូវនេះកីឡាករហាត់មានការផ្គត់ផ្គង់មានបាយ មានកន្លែងស្នាក់នៅត្រឹមត្រូវ»។

ក្នុងឆ្នាំ២០២៣ អាចថាជារជ្ជកាលដ៏រុងរឿងមួយរបស់គុនខ្មែរដែលទទួលបានការគាំទ្រយ៉ាងខ្លាំងពីមហាជន ក្រោយគុនខ្មែរត្រូវបានដាក់បញ្ចូលក្នុងកីឡាស៊ីហ្គេមលើកទី៣២ ដែលកម្ពុជាធ្វើម្ចាស់ផ្ទះ។ ក្នុងនាមជាម្ចាស់ក្បាច់គុនខ្មែរ កម្ពុជាទទួលបានមេដាយ១៩គ្រឿងគឺ មាស១៤ ប្រាក់៣ និងសំរិទ្ធ២៕

អត្ថបទ៖ ផា រតនា