កីឡា
អ្នកចុះឈ្មោះបរទេស៧០%នឹងហោះមកចូលរួមរត់ចម្ងាយឆ្ងាយនៅអង្គរចុងខែនេះ
ក្នុងចំណោមជនបរទេសដែលបានចុះឈ្មោះចូលរួមប្រកួតរត់ចម្ងាយឆ្ងាយឆ្លងកាត់ឧបសគ្គច្រើន Angkor Ultra Trail លើកទី៧ នៅតំបន់អង្គរ ខេត្តសៀមរាប នាចុងខែមករា ឆ្នាំ២០២៤គឺមាន៧០%នឹងហោះមកពីប្រទេសផ្ទាល់ខ្លួនរបស់ពួកគេមកចូលរួមនៅទឹកដីកម្ពុជា។
![](https://www.kampucheathmey.com/wp-content/uploads/2024/01/angkor-ultra-trail-running-2024-8-1024x768.jpg)
ក្នុងសន្និសីទសារព័ត៌មាន ព្រឹកថ្ងៃចន្ទ ទី៨ ខែមករា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា លោក ថោង ខុន ប្រធានគណៈកម្មាធិការជាតិអូឡាំពិកកម្ពុជាបានឲ្យដឹងថា ព្រឹត្តិការណ៍នេះរួមចំណែកដ៏សំខាន់ក្នុងការទាក់ទាញជនបរទេសឲ្យចូលមកប្រទេសកម្ពុជា។ នេះជាព្រឹត្តិការណ៍កីឡាទេសចរណ៍ ជនបរទេសទាំងអ្នកទេសចរ និងអ្នកកីឡាសុទ្ធតែអាចចូលរួមប្រកួតដើម្បីសុខភាព និងកម្សាន្ត។
លោក ថោង ខុន បានសង្កត់ធ្ងន់ថា ការរៀបចំលើកនេះមានអំណោយផលច្រើនសម្រាប់ការចូលរួម ពីព្រោះជនបរទេសអាចហោះហើរផ្ទាល់ពីប្រទេសរបស់ពួកគេចូលមកខេត្តសៀមរាបតាមអាកាសយានដ្ឋានអន្តរជាតិដែលទើបតែបើកសម្ពោធកាលពីពេលថ្មីៗនេះ។
![](https://www.kampucheathmey.com/wp-content/uploads/2024/01/angkor-ultra-trail-running-2024-2-1-1024x768.jpg)
លោក Edouard George អ្នកទទួលបន្ទុករៀបចំព្រឹត្តិការណ៍រត់ចម្ងាយឆ្ងាយ Angkor Ultra Trail បានឲ្យដឹងថា រហូតដល់ពេលនេះមានអ្នកបានចុះឈ្មោះចូលរួមប្រកួត១០៧៦នាក់ទាំងក្នុង និងក្រៅប្រទេស។ ក្រុមការងារនឹងជំរុញឲ្យមានការចុះឈ្មោះបន្ថែម៤០០ទៅ៥០០នាក់ទៀតមុនពេលថ្ងៃប្រកួតមកដល់។ ក្នុងចំណោមអ្នកចុះឈ្មោះចូលរួមទាំងអស់មកពី៤៣ប្រទេសផ្សេងគ្នាក្នុងពិភពលោក។ ប្រទេសចំនួន៥ដែលមានអ្នកចុះឈ្មោះច្រើនជាងគេគឺម្ចាស់ផ្ទះកម្ពុជា បារាំង វៀតណាម កូរ៉េខាងត្បូង និងសហរដ្ឋអាមេរិក។
លោក Edouard George បានឲ្យដឹងថា ក្រៅពីសាធារណជន កីឡាករ កីឡាការិនីទូទៅដែលបានចុះឈ្មោះចូលរួមប្រកួត ក្រុមការងារបានសហការជាមួយអង្គភាពរដ្ឋាភិបាលនានាក្នុងនោះមានមន្ត្រីរដ្ឋាភិបាល អាជ្ញាធរខេត្តសៀមរាប ស្នងការប៉ូលិសខេត្ត ប៉ូលិសអន្តោប្រវេសន៍ មន្ទីរសុខាភិបាល និងអាជ្ញាធរអប្សរាជាដើមបានចុះឈ្មោះចូលរួមប្រកួតដោយសេរី។
![](https://www.kampucheathmey.com/wp-content/uploads/2024/01/angkor-ultra-trail-running-2024-3-1024x768.jpg)
អ្នកទទួលបន្ទុករៀបចំព្រឹត្តិការណ៍កីឡាទេសចរណ៍នេះបានប្រាប់ថា ក្នុងចំណោមអ្នកចុះឈ្មោះជាជនបរទេសគឺមាន៧០%ដែលមកពីប្រទេសរបស់ពួកគាត់ផ្ទាល់ហោះមកចូលរួមប្រកួតរត់ចម្ងាយលើកទី៧។ ប្រហែលជា៣០%ទៀតគឺមានជនបរទេសដែលមកពីតំបន់អាស៊ាន និងជនបរទេសដែលកំពុងធ្វើការនៅប្រទេសកម្ពុជា។
លោកបានបញ្ជាក់ថា ៖«ជនបរទេសទាំងនោះ មិនមែនមកដើម្បីតែចូលរួមរត់ប្រណាំងតែម្យ៉ាងនោះទេ ប៉ុន្តែមកកម្សាន្តនៅប្រទេសកម្ពុជាច្រើនថ្ងៃទៀត។ ទាំងនេះហើយដែលរួមចំណែកជួយដល់វិស័យទេសចរណ៍នៅក្នុងព្រះរាជាណាចក្រកម្ពុជា»។
ព្រឹត្តិការណ៍ប្រកួតនេះមាន៨វិញ្ញាសាគឺរត់ចម្ងាយ ចម្ងាយ៨គីឡូម៉ែត្រ ១៨គីឡូម៉ែត្រ ៣២គីឡូម៉ែត្រ ៤២គីឡូម៉ែត្រ ៦៤គីឡូម៉ែត្រ ១០០គីឡូម៉ែត្រ ហើយវិញ្ញាសាច១៨គីឡូម៉ែត្រសម្រាប់ដើរ និងចម្ងាយ១៨គីឡូម៉ែត្រសម្រាប់ដើរផងកាន់ឈើច្រត់ឆ្លងភ្នំ។
![](https://www.kampucheathmey.com/wp-content/uploads/2024/01/angkor-ultra-trail-running-2024-6-1024x768.jpg)
តាមកាលបរិច្ឆេទ ព្រឹត្តិការណ៍រត់ចម្ងាយឆ្ងាយ Angkor Ultra Trail លើកទី៧នេះ នឹងធ្វើនៅថ្ងៃសៅរ៍ ទី២៧ ខែមករា ឆ្នាំ២០២៤ ក្នុងនោះវិញ្ញាសាចម្ងាយ១០០គីឡូម៉ែត្រ អ្នករត់ត្រូវឆ្លងកាត់ឧបសគ្គជាច្រើនដូចកាត់ទីប្រជុំជន វាលស្រែ និងត្រូវរត់ទាំងយប់-ថ្ងៃដើម្បីឲ្យសម្រេចគោលដៅដ៏សែនឆ្ងាយក្នុងរយៈពេលខ្លី៕
![](https://www.kampucheathmey.com/wp-content/uploads/2024/01/3angkor-ultra-trail-2024-1024x768.jpg)
![](https://www.kampucheathmey.com/wp-content/uploads/2024/01/1angkor-ultra-trail-2024-1024x683.jpg)
![](https://www.kampucheathmey.com/wp-content/uploads/2024/01/2angkor-ultra-trail-2024-1024x683.jpg)
![](https://www.kampucheathmey.com/wp-content/uploads/2024/01/4angkor-ultra-trail-2024.jpg)
អត្ថបទ៖ វីរបុត្រ
-
សេដ្ឋកិច្ច៦ ថ្ងៃ ago
ការវិនិយោគរបស់ក្រុមហ៊ុនជប៉ុន កំពុងជួយរុញឱ្យកំណើនសេដ្ឋកិច្ចកម្ពុជាកាន់តែងើបឡើងបន្ថែមទៀត
-
KPT+៧ ថ្ងៃ ago
១០ ប្រទេស កំពូលគ្រោះថ្នាក់ខ្លាំង ចំពោះស្រ្តី
-
ព័ត៌មានជាតិ៤ ថ្ងៃ ago
អ្នកនាំពាក្យទទូចដល់អ្នកប្រើបណ្តាញសង្គមបញ្ឈប់ចែកចាយជាបន្ទាន់ និងលុបចេញរាល់មាតិកាដែលពាក់ព័ន្ធឃាតកម្មឃោរឃៅ
-
ព័ត៌មានជាតិ៦ ថ្ងៃ ago
ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក
-
ព័ត៌មានជាតិ៣ ថ្ងៃ ago
លោក ជួន ណារិន្ទ បញ្ជាឱ្យហៅគ្រូមន្តអាគមយកកាំភ្លើងពោះខ្លួនឯងមកសួរនាំ ទោះសាមីខ្លួនសុំទោសជាសាធារណៈ
-
ព័ត៌មានជាតិ១ សប្តាហ៍ ago
តើឧកញ៉ាមានសិទ្ធិកាន់កាប់ និងប្រើប្រាស់កាំភ្លើង ដែរឬទេ?
-
ព័ត៌មានជាតិ៥ ថ្ងៃ ago
បុរសម្នាក់ ត្រូវសត្វថ្លែនខាំបណ្តាលឱ្យស្លាប់ ក្រោយបញ្ជូនទៅសង្គ្រោះនៅមណ្ឌលសុខភាព
-
ព័ត៌មានជាតិ៦ ថ្ងៃ ago
ក្នុងឆ្នាំ២០២៤៖ ឧកញ៉ា អ្នកឧកញ៉ា ៤នាក់ ត្រូវដកហូតគោរមងារ ក្រោយរកស៊ីបោកប្រាស់ និងបាញ់ប្រហារពលរដ្ឋ