កីឡា

តារាបាល់ទះឆ្នើមវ័យក្មេង Luvi ធ្លាប់លេងនៅអារ៉ាប់រួមមុនមកកម្ពុជា

បានផុស

២ years មុន

នៅ

ថ្ងៃចន្ទ ២២ មករា ២០២៤

ដោយ

កីឡាករឥណ្ឌូណេស៊ីវ័យក្មេង Luvi Febrian Nugraha កំពុងត្រូវបានអ្នកគាំទ្រចាប់អារម្មណ៍ខ្លាំងចំពោះសមត្ថភាពដ៏អស្ចារ្យនៅក្លិបបញ្ជាការដ្ឋានអង្គរក្សនៃពានរង្វាន់បាល់ទះតេជោលីគរដូវកាលទី១។

Luvi FN ដែលកើតនៅថ្ងៃទី១៤ ខែកុម្ភៈ ឆ្នាំ២០០៤ នៅតំបន់ Garut ខេត្ត West Java ប្រទេសឥណ្ឌូណេស៊ីធ្លាប់លេងឲ្យក្លិបជាច្រើនមុនពេលចូលមកប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីលេងឲ្យក្រុមនៅស្រុកកំណើត Luvi ទទួលបានឱកាសចូលរួមជាមួយក្លិប TNI Headquarters នៅឆ្នាំ២០១៩ សម្រាប់ការប្រកួតលីគបាល់ទះឥណ្ឌូណេស៊ីលំដាប់ទី២ និងទទួលបានចំណាត់ថ្នាក់លេខ២។ នៅឆ្នាំ២០២២ រូបគេបានចូលរួមជាមួយក្លិប Jarkata Pertamina Pertamax នៃក្របខណ្ឌលីគបាល់ទះកំពូលឥណ្ឌូណេស៊ី នៅឆ្នាំ២០២២ នៅពេលរូបគេទើបអាយុ១៨ឆ្នាំ។

បន្ទាប់មករូបគេបានចូលរួមជាមួយក្លិប Bandung Tectona នៅឆ្នាំ២០២៣។ អ្វីដែលគួរឲ្យចាប់អារម្មណ៍គឺការលេងជម្រើសខេត្ត West Kalimantan ក្នុងពានរង្វាន់ថ្នាក់ជាតិឥណ្ឌូណេស៊ី 2023 National Police Chief Cup ដែលត្រូវបានគេស្គាល់រូបគេជាម៉ាស៊ីនរកគ្រាប់បាល់ម្នាក់។

មែនទែនទៅ រូបគេជាយុវជនវ័យក្មេងម្នាក់ ប៉ុន្តែបានលេងជាមួយកីឡាកររៀមច្បងល្អៗដូចជា Nizar Julfikar, Mahfud Nurcahyadi និង Samsul Kohar ក្នុងពានរង្វាន់ National Police Chief Cup ហើយទទួលបានការចាប់អារម្មណ៍យ៉ាងខ្លាំង។ នៅឆ្នាំ២០២៣ដដែល រូបគេជាមួយក្រុមខេត្ត West Kalimantan បានលេងជើងឯក Kapolri Cup មួយទៀត មុនពេលផ្លាស់ទៅលេងនៅក្រៅប្រទេស។

ឆ្នាំ២០២៣ Luvi ចាប់ផ្តើមបោះជំហានទៅក្រៅប្រទេសដោយបានចូលរួមជាមួយក្លិប Hatta Club Dubai នៅក្នុងក្របខណ្ឌលីគកំពូលប្រទេសអារ៉ាប់រួម។ ដើមឆ្នាំ២០២៤ រូបគេបានមកចូលរួមជាមួយក្លិបបញ្ជាការដ្ឋានអង្គរក្សសម្រាប់ការលេងក្នុងលីគបាល់ទះកំពូលកម្ពុជា។

តាមពិតទៅរូបគេមិនទាន់ធ្លាប់បានជាប់ក្នុងជម្រើសជាតិឥណ្ឌូណេស៊ីក្រុមធំទេ ប៉ុន្តែរូបគេមានឱកាសបានចេញលេងនៅក្រៅប្រទេសទាំងវ័យក្មេង។ ក្នុងចំណោមកីឡាករឥណ្ឌូណេស៊ី៣នាក់នៅក្លិបបញ្ជាការដ្ឋានអង្គរក្ស Luvi ត្រូវបានអ្នកគាំទ្រចាប់អារម្មណ៍ខ្លាំងក្នុងនាមជាអ្នកវ៉ៃផ្តាច់ដើម្បីទទួលបានពិន្ទុ ស្របពេលរូបគេលេងជាមួយមិត្តរួមជាតិ Dio និង Dony។

រហូតដល់ពេលនេះ បញ្ជាការដ្ឋានអង្គរក្សមិនទាន់ចាញ់ឡើយក្នុងចំណោម៥ប្រកួត ប៉ុន្តែការប្រកួតខ្លះបានចាញ់១សិត ឬ២សិតដែលធ្វើឲ្យពួកគេមាន១៣ពិន្ទុ ឈរចំណាត់ថ្នាក់លេខ២នៅពីក្រោមវិសាខាដែលមាន១៥ពិន្ទុពីការឈ្នះទាំង៥លើកក្នុងនោះវិសាខាមិនទាន់ចាញ់សូម្បី១សិត៕