កីឡា

ម្ចាស់មេដាយមាសស៊ីហ្គេម រិន ដេវិត ចេញវីដេអូស្នើឲ្យប្រធានគុនខ្មែររកយុត្តិធម៌

បានផុស

៤ ខែ មុន

នៅ

ថ្ងៃសុក្រ ៩ កុម្ភៈ ២០២៤

ដោយ

កីឡាករប្រដាល់គុនខ្មែរ រិន ដេវិត បានចេញវីដេអូស្នើដល់លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរជួយរកយុត្តិធម៌ដល់ខ្លួន បន្ទាប់ពីចៅក្រមបានកាត់ក្តីឲ្យរូបគេបានចាញ់កីឡាករ ធន់ អៀឡៃ សម្រាប់ការប្រកួតវគ្គផ្តាច់ព្រ័ត្រដណ្តើមខ្សែក្រវាត់នៅសង្វៀនថោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការតស៊ូគ្នា៣ទឹកនៅលើសង្វៀន នៅយប់ថ្ងៃទី៨ ខែកុម្ភៈ ឆ្នាំ២០២៤ ចៅក្រម៣រូបគឺលោក ណុប វ៉ាន់ថេត, កែវ ពៅ និងលោក ប៉ាន់ ស៊ីថៃ ផ្តល់ពិន្ទុ ៥៩-៥៨ ដូចគ្នាឲ្យ ធន់ អៀឡៃ ខណៈចៅក្រម២រូបគឺលោក បឹត សំខាន់ និង ឌៀន វិបុល ផ្តល់ពិន្ទុ ៥៩-៥៨ ដូចគ្នាឲ្យ រិន ដេវិត។

ការពិតបង្ហាញនៅលើសង្វៀនដែលមហាជនបានមើលឃើញផ្ទាល់ភ្នែកគឺ រិន ដេវិត មានប្រៀបនៅទឹកទី១ និង២ ប៉ុន្តែនៅទឹកទី៣ ធន់ អៀឡៃ ហាក់ធ្វើបានល្អ។ ក្រោយចប់ការប្រកួត ខាងភាគីកីឡាករ រិន ដេវីត បានតវ៉ា និងសម្តែងការមិនពេញចិត្តយ៉ាងខ្លាំង ហើយអ្នកគាំទ្រភាគច្រើនក៏បានបញ្ចេញមតិមិនពេញចិត្តសម្រាប់លទ្ធផលនេះដែរ។

តាមការលើកឡើងរបស់លោក ស៊ន អេលីត ដែលជាអ្នកធ្លាប់រៀបចំកម្មវិធីប្រកួត និងជាគ្រូបង្ហាត់ម្នាក់បានលើកជាចម្ងល់ថា ហេតុអ្វីបានដាក់ឲ្យលោក កែវ ពៅ ជាចៅក្រមដាក់ពិន្ទុសម្រាប់ការប្រកួតនេះ ពីព្រោះលោក កែវ ពៅ ជាឪពុកបង្កើតរបស់កីឡាករ តាញ់ មករា ដែលជាកូនសិស្សរបស់លោកគ្រូ ធន់ សុភា ដែលជាគ្រូរបស់ ធន់ អៀឡៃ។

នៅរសៀលថ្ងៃទី៩ ខែកុម្ភៈនេះ រិន ដេវិត បានចេញវីដេអូឃ្លីបខ្លីនដោយបាននិយាយថា ៖«បាទគោរពជំរាបសួរពុកម៉ែបងប្អូនទាំងអស់គ្នា ខ្ញុំបាទកីឡាករ រិន ដេវិត ជាម្ចាស់មេដាយមាសស៊ីហ្គេម ឆ្នាំ២០២៣។ ដូចបងប្អូនបានទស្សនាការប្រកួតកាលពីយប់មិញ ខ្ញុំជាមួយនឹង ធន់ អៀឡៃ ហើយលទ្ធផលនោះគឺខ្ញុំមិនពេញចិត្ត ពីព្រោះខ្ញុំបានប្រឹងប្រែងអស់ពីសមត្ថភាពហើយ។ ខ្ញុំគិតថា មានប្រៀបទៅលើគាត់។ សូមឲ្យលោកអ៊ុំ តែម ម៉ឺន ជួយរកយុត្តិធម៌ឲ្យខ្ញុំបាទផង។ ចុងក្រោយខ្ញុំសូមអរគុណដល់ពុកម៉ែបងប្អូនចូលចិត្តស្រឡាញ់ខ្ញុំបាទកីឡាករ រិន ដេវិត»។

សូមបញ្ជាក់ថា រិន ដេវិត ជាម្ចាស់មេដាយមាសកីឡាស៊ីហ្គេម ឆ្នាំ២០២៣ សម្រាប់កីឡាឃីកបុកស៊ី វិញ្ញាសា Light Contact ទម្ងន់៦៣គីឡូក្រាម បន្ទាប់ពីយកឈ្នះកីឡាករថៃ Karrakot Wijitnavee នៅវគ្គផ្តាច់ព្រ័ត្រ។ រូបគេបានឈ្នះខ្សែក្រវាត់១គ្រឿងនៅប្រទេសម៉ាឡេស៊ី និងឈ្នះខ្សែក្រវាត់២គ្រឿងនៅសង្វៀន PNN៕