វិសាខាប៉ះបឹងកេតជាជំនួប​ធំប្រជែងតំបន់ Top 4​ថ្ងៃអាទិត្យនេះ

ក្លិប​បាល់ទាត់​បឹងកេត​ត្រូវ​ទទួល​វិសាខា​វេលា​ម៉ោង​៦​ល្ងាច​ថ្ងៃ​អាទិត្យ ទី​២៥ ខែ​កុម្ភៈ នៅ​ពហុកីឡដ្ឋាន​ជាតិ​អូឡាំពិក​សម្រាប់​សប្តាហ៍​ទី​២២ ​​ខេមបូឌានព្រីមៀរលីគ​រដូវ​កាល​២០២៣-២៤។

វា​ជា​ជំនួប​ធំ​ប្រចាំ​សប្តាហ៍​ដើម្បី​ប្រជែង​តំបន់​កំពូល​តារាង​ទាំង​៤ (Top 4) នៅ​កណ្តាល​រាជ​ធានី​ភ្នំពេញ​ដែល​នឹង​មាន​អ្នក​គាំទ្រ​ច្រើន​ចូល​រួមលើក​ទឹក​ចិត្ត​​ដល់​ក្រុម​រៀង​ៗ​ខ្លួន។

បន្ទាប់​ពី​ចែក​ផ្លូវ​គ្នា​ជា​មួយ​គ្រូ​បង្វឹក​សញ្ជាតិស្កុកឡែនលោក Simon McMenemy កាល​ពី​ថ្ងៃ​ទី​៥ ខែ​ធ្នូ ឆ្នាំ​២០២៣ និង​តែង​តាំង​លោក មាស ចាន់ណា ជំនួសកាល​ពី​ថ្ងៃ​ទី​៦ ខែ​ធ្នូ ឆ្នាំ​២០២៣ ព្រម​ទាំង​បាន​បញ្ចេញ​កីឡាករ​ខ្លះ និង​នាំ​ចូល​សមាជិក​ថ្មី ក៏​វិសាខា​នៅ​តែ​ធ្វើ​មិន​សូវ​បាន​ល្អ​ដដែល។

ឆ្លង​កាត់២១​ប្រកួត​កន្លង​ទៅ វិសាខា រក​បាន​៣៥​ពិន្ទុ​ កំពុង​ឈរ​ចំណាត់​ថ្នាក់​លេខ​៣​ក្នុង​តារាង បន្ទាប់​ពី​​ទទួល​បាន​ជ័យជម្នះ​១១​លើក ស្មើ​២ និង​ចាញ់​៨។ ​​កាល​ពី​សប្តាហ៍​ទី​២១ វិសាខា បាន​បាត់​បង់​៣​ពិន្ទុ​នៅ​​ក្នុង​​​ដី​របស់​ខ្លួន​ បន្ទាប់​ពី​​បរាជ័យ​ក្រោម​ថ្វី​ជើង​របស់​សមាជិក​លីគ​ថ្មី​គឺ អាយអេយអាយ ដង្កោសែន​ជ័យ ដោយ​លទ្ធផល ១-៣។

ចំណែក​ម្ចាស់​ផ្ទះ​បឹងកេត​ក៏​បាន​ចែក​ផ្លូវ​គ្នា​ជា​មួយ​គ្រូ​បង្វឹក​សញ្ជាតិ​សិង្ហបុរី​លោក Clement Teo កាល​ពី​ថ្ងៃ​ទី​១៥ ខែ​ធ្នូ ឆ្នាំ​២០២៣ និង​តែង​តាំង​លោក ហុង ផេង ជំនួស​នៅ​ថ្ងៃ​ទី​១៥ ខែ​ធ្នូ ឆ្នាំ​២០២៣ ព្រម​ទាំង​មាន​ការ​ផ្លាស់​ប្តូរ​សមាជិក​មួយ​ចំនួន​ដូច​គ្នា។ បន្ទាប់​មក បឹងកេត ហាក់​មាន​ទម្រង់​លេង​ល្អ​ប្រសើរ​។

ឆ្លង​កាត់​២១​សប្តាហ៍​កន្លង​ទៅ បឹងកេត រក​បាន​៣១​ពិន្ទុ កំពុង​ឈរ​ចំណាត់ថ្នាក់​លេខ​៤ បន្ទាប់​ពី​ឈ្នះ​៨ ស្មើ​៧ និង​ចាញ់ ដោយ​តាម​ពី​ក្រោយ​វិសាខា​៥​ពិន្ទុ។ ​ប្រសិន​បើ​ បឹងកេត ឈ្នះ ក្រុម​ទាំង​ពីរ​បន្ត​នៅ​តំបន់​​កំពូល​ទាំង​៤​ដដែល។ ផ្ទុយ​ទៅ​វិញ ប្រសិន​បើ​បឹងកេត​ចាញ់​ ហើយ​ អាយ​អេសអាយ ដង្កោសែនជ័យ ឈ្នះ នោះ​បឹងកេត​ នឹង​ធ្លាក់​ចេញ​​ពី​តំបន់ Top 4 ហើយ​អាយអេសអាយ ដង្កោសែនជ័យ ដែល​មាន​៣១​ពិន្ទុ​ដែរ​ នឹង​ឡើង​។ ប៉ុន្តែ​ប្រសិន​បើ អាយអេសអាយ ដង្កោសែន​ជ័យ ចាញ់​ព្រះ​ខ័ន​រាជ​ស្វាយរៀង នោះ​តារាង​ចំណាត់​ថ្នាក់​មិន​ប្រែ​ប្រួលទេ។

វា​ជា​ការ​ជួប​គ្នា​លើក​ទី​៣ក្នុង​​រដូវ​​កាល​នេះ បន្ទាប់​ពី​២​លើក​កន្លង​ទៅ បឹងកេត​បាន​យក​ឈ្នះ​ដោយ​លទ្ធផល ៤-២ ក្នុង​ជើង​ទី​១ នៅ​ពហុកីឡដ្ឋាន​ជាតិ​អូឡាំពិក ហើយ​វិសាខា​បាន​យក​ឈ្នះ​វិញ​ដោយ​លទ្ធផល ២-០ ក្នុង​ជើង​ទី​២​នៅ​កីឡដ្ឋាន​ព្រីនស៍។

៥​ប្រកួត​ចុង​ក្រោយ​របស់បឹងកេត​គឺ​ឈ្នះ​៣ ស្មើ១ និង​ចាញ់១ គឺ​ឈ្នះ​ព្រៃវែង ២-០, ឈ្នះ​អង្គរថាយហ្គឺរ ៥-២, ឈ្នះអាយអេសអាយ ដង្កោសែនជ័យ ៤-១, ស្មើណាហ្គាវើលដ៍ ០-០ និង​ចាញ់​ភ្នំពេញ​ក្រោន ១-០។ ចំណែក​៥​ប្រកួត​ចុង​ក្រោយ​របស់​វិសាខា​គឺ​ឈ្នះ​៣ និង​ចាញ់​២ ក្នុង​នោះឈ្នះ​គិរីវង់សុខសែន​ជ័យ ៦-១, ឈ្នះព្រៃវែង ៣-១, ឈ្នះ​​អង្គរថាយហ្គឺរ ៤-៣ ហើយ​ចាញ់ណាហ្គាវើលដ៍ ៣-១ និង​ចាញ់ អាយអេសអាយ ដង្កោសែន​ជ័យ ១-៣។ ឃើញ​ថា ២​លើក​ចុង​ក្រោយ​របស់​បឹងកេត ឈ្នះ​ទាំង​២​លើក ខណៈ​២លើក​ចុង​ក្រោយ​របស់​វិសាខា​ចាញ់​ទាំង​២​លើក។

ក្រុម​ទាំង​ពីរ​បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ពាន​រង្វាន់​សម្តេចតេជោ ហ៊ុន សែន ឆ្នាំ​នេះ​ដូច​គ្នា ដោយបឹងកេត​បាន​យក​ឈ្នះ អាយអេសអាយ ដង្កោសែន​ជ័យ​ ទាំង​ពីរ​ជើង​ដោយ​លទ្ធផល ៨-៤។ ចំណែក​វិសាខា​វិញ​ខ្សត់​គ្រាប់​បាល់​ដោយ​បាន​យកឈ្នះព្រៃវែង​ទាំង​ពីរ​ជើង​តែ​ ១-០ ប៉ុណ្ណោះ។

សូម​បញ្ជាក់​ថា បន្ទាប់​ពី​ចប់​ជុំ​ទី​៣ ស្មើ​​នឹង​​២៧​សប្តាហ៍​ ក្រុម​កំពូល​តារាង​​៤​នឹង​​បន្ត​ប្រកួត​​សន្សំ​ពិន្ទុ​​ទៀត​ដើម្បី​​ស្វែង​រក​ជើង​ឯក ខណៈ​ក្រុម​ចំណាត់​ថ្នាក់​លេខ​៥​ដល់​១០​អស់​ឱកាស​ប្រជែង​ជើង​ឯក៕

គូប្រកួត​សប្តាហ៍ទី​២២ ថ្ងៃសៅរ៍ ទី​២៤ ខែ​កុម្ភៈ

• ណាហ្គាវើលដ៍ vs ភ្នំពេញ​ក្រោន (ម៉ោង​៦​ល្ងាច​នៅ​កីឡដ្ឋាន​កំពង់ស្ពឺ)
• ISI ដង្កោសែនជ័យ vs ព្រះ​ខ័ន​រាជ​ស្វាយរៀង (ម៉ោង​៦​ល្ងាច នៅខេអឹមអេកផាក)

គូ​ប្រកួត​សប្តាហ៍ទី​២២ ថ្ងៃ​អាទិត្យ ទី​២៥ ខែ​កុម្ភៈ​

• អង្គរថាយហ្គឺរ vs ក្រសួង​ការពារ​ជាតិ (ម៉ោង​៣:៤៥នាទី​រសៀល នៅកីឡដ្ឋានហនុមាន)
• គិរីវង់សុខសែនជ័យ vs ព្រៃវែង (ម៉ោង​៣:៤៣នាទី​រសៀល នៅកីឡដ្ឋាន​គិរីវង់)
• បឹងកេត vs វិសាខា (ម៉ោង​៦​ល្ងាច នៅពហុកីឡដ្ឋាន​ជាតិ​អូឡាំពិក)

អត្ថបទ៖ វីរបុត្រ