កីឡា

Sammy ផ្តាំដល់អ្នករិះគន់ខ្លះគោរពកីឡាករប្រទេសរបស់ខ្លួន

បានផុស

៤ នាទី មុន

នៅ

ថ្ងៃពុធ ៣ មេសា ២០២៤

ដោយ

កីឡាករថៃ Sammy Banchamek ទំនងជាដឹងអំពីអ្នកគាំទ្រកម្ពុជា ឬអ្នកវិភាគខ្លះបានរិះគន់កីឡាករគុនខ្មែរ បន្ទាប់ពីរូបគេបានមកប្រកួតនៅប្រទេសកម្ពុជាជាច្រើនលើករហូតធ្វើឲ្យរូបគេស្នើឲ្យមានការគោរពកីឡាករប្រទេសរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី៣១ ខែមីនា ឆ្នាំ២០២៤កន្លងទៅនេះ Sammy បានមកប្រកួតនៅប្រទេសកម្ពុជាជាមួយកីឡាករ ឡៅ ចន្ទ្រា។ ជាលទ្ធផលកីឡាករកម្ពុជាបានវាយឲ្យរូបគេសន្លប់ក្នុងទឹកទី៣តាមរយៈការទាត់ពោះ និងកែងដ៏គ្រោះថ្នាក់។ ការប្រកួតនេះ កីឡាករថៃទទួលបានប្រាក់ឧបត្ថម្ភលើកទឹកចិត្ត១០លានរៀល។ រាល់មកប្រកួតនៅកម្ពុជា រូបគេតែងតែដើរទៅតាមផ្សារ និងថតវីដេអូផ្សព្វផ្សាយអំពីប្រទេសកម្ពុជា ហើយរូបគេក៏កម្រនិយាយអាក្រក់ពីកម្ពុជាណាស់។

និយាយពីការប្រកួតចុងក្រោយជាមួយ ឡៅ ចន្ទ្រា មានចំនួន៥ទឹក ប៉ុន្តែ Sammy មិនទាន់បានចេញសមត្ថភាពអស់ពេញលេញផងក៏ត្រូវបានអ្នកលេងគុនខ្មែរវាយឲ្យសន្លប់ក្នុងទឹកទី៣។ ការបង្ហាញសមត្ថភាពនេះត្រូវបានអ្នកមើលខ្លះរិះគន់រូបគេអំពីការមិនប្រឹងប្រែងប្រកួត ប៉ុន្តែជាការសម្តែងទៅវិញ។

កន្លងមកក៏មានអ្នកខ្លះរិះគន់ថា ការដើរលេងសប្បាយភ្លេចការហ្វឹកហាត់បានជាសមត្ថភាពធ្លាក់ចុះ។ មតិខ្លះថា ពេលប្រកួតឈ្នះស្រួលលឿនពេក មកពីដៃគូអន់ខ្សោយ ប៉ុន្តែពេលប្រកួតចាញ់ បណ្តាលមកពីមិនខិតខំហ្វឹកហាត់។

ការរិះគន់បែបនេះហើយបានជាធ្វើឲ្យ Sammy បង្ហោះសារខ្លីនៅព្រឹកថ្ងៃទី៣ ខែមេសា ឆ្នាំ២០២៤ថា ៖«សូមគោរពអ្នកប្រដាល់ប្រទេសរបស់អ្នក និងឈប់និយាយអ្វីដែលមិនពិតទៅ។ ខ្ញុំមិនមែនមកប្រកួតដើម្បីឲ្យដៃគូឈ្នះទេ។ ខ្ញុំត្រូវតែផ្តល់កិត្តិយសដល់អ្នកប្រដាល់របស់អ្នកខ្លះ។ កីឡាមានឈ្នះ មានចាញ់ សូមអ្នកមើលវាជាកីឡា»៕