កីឡា

Ryan Garcia ខកចិត្តក្រោយឈ្នះ Devin Haney តែមិនទទួលបានខ្សែក្រវាត់ WBC

បានផុស

២ years មុន

នៅ

ថ្ងៃចន្ទ ២២ មេសា ២០២៤

ដោយ

កីឡាករ Ryan Garcia ធ្វើបានយ៉ាងល្អដោយផ្តល់ឲ្យជើងខ្លាំង Devin Haney ម្ចាស់ខ្សែក្រវាត់ WBC Super Lightweight ស្គាល់រស់ជាតិបរាជ័យលើកដំបូងក្នុងអាជីព ប៉ុន្តែរូបគេបែរជាមិនទទួលបានខ្សែក្រវាត់ទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបដ៏អស្ចារ្យដើមឆ្នាំ២០២៤ ជើងខ្លាំងអាមេរិកទាំង២រូប កីឡាករ Devin Haney ជួបជាមួយកីឡាករ Ryan Garcia ដែលគេហៅថា This One Counts។ វាជាការប្រកួតប្រដាល់សកលអាជីពរវាងម្ចាស់ជើងឯកទម្ងន់ស្រាល WBC Super Lightweight ជួបជាមួយអតីតម្ចាស់ខ្សែក្រវាត់ WBC interim lightweight។ ការប្រកួតនេះចំណាយពេលអស់១២ទឹកក្នុងនោះកីឡាករ Ryan Garcia បានឈ្នះដោយពិន្ទុ ក្រោយវាយកីឡាករ Devin Haney រាប់៣ដងក្នុងទឹកទី៧ ទី១០ និងទី១១។

ការប្រកួតនេះធ្វើឡើងក្នុងទម្ងន់ ៦៣.៥គីឡូក្រាម ប៉ុន្តែកីឡាករ Ryan Garcia លើសទម្ងន់ចំនួន១.៤៥គីឡូក្រាម ដូច្នេះរូបគេមិនមានសិទ្ធិឈ្នះខ្សែក្រវាត់ WBC Super Lightweight។

កីឡាករ Ryan Garcia កំពុងបន្ដកំណត់ត្រាយ៉ាងល្អក្រោយឈ្នះ២៥លើកក្នុងចំណោម២៦ ប្រកួត។ សម្រាប់ការបរាជ័យលើកដំបូងបំផុតគឺចាញ់កីឡាករ Gervonta Tank Davis កាលពី១២ខែមុន។

សម្រាប់កីឡាករ Devin Haney ម្ចាស់ជើងឯកទម្ងន់ស្រាលពិភពលោក WBC Super Lightweight បន្ទាប់ពីយកឈ្នះលើកីឡាករ Regis Prograis កាលពីខែធ្នូ ប៉ុន្តែរូបគេបានភ្លាត់ស្នៀតចាញ់ជាលើកដំបូងក្នុងការប្រកួត៣២លើក ក្រោយចាញ់កីឡាករ Garcia៕