Connect with us

កីឡា

គ្រួសារ អេ ភូថង អង្វរកុំហៅ ធឿន ធារ៉ា ជា «ស្តេច​ត្រាញ់ ឬ ស្តេចប្រដាល់»

បានផុស

នៅ

អ្នក​ស្រី​ សាំង​ សុម៉ាលី​ ដែល​ជា​ភរិយា​របស់​លោក​គ្រូ អេ ភូថង ​បាន​អង្វរ​​ករ​ដល់​មហា​ជន​មួយ​ចំនួន សូម​​កុំ​ដាក់​រហស្សនាម​​ឲ្យ​កីឡាករ​ ធឿន ធារ៉ា ជា​ស្តេច​ប្រដាល់ ឬ​ជា​ស្តេច​ត្រាញ់។

ធឿន ធារ៉ា ត្រូវ​បាន​​ម្ចាស់​ឧបត្ថម្ភ​កម្មវិធី​មួយ​សរសេរ​បង្ហោះ​នៅ​លើ​ផេក​ជា«​ស្តេច​ត្រាញ់»​អំបោះ​ឆៅ​គុន​ខ្មែរ បន្ទាប់​ពី​បាន​ផ្តួល​ជើង​ខ្លាំង​​រុស្ស៊ី Alexandr Skvortsov តាម​រយៈ​អាជ្ញា​កណ្តាល​បញ្ឈប់​ក្នុង​ទឹក​ទី​៣​កាល​ពី​ថ្ងៃ​សុក្រ ទី​១៤ ខែ​មិថុនា ឆ្នាំ​២០២៤ នៅ​កោះ​ពេជ្រ។ បន្ទាប់​មក​ក៏​មាន​ផេក​មួយ​ចំនួន​បាន​សរសេរ​ហៅ​ជា«ស្តេច​ត្រាញ់»​នៃ​អំបោះ​ឆៅ​ស្រុក​ខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការ​​ដាក់​រហស្សនាម​បែប​នេះ​មិន​ត្រូវ​បាន​ក្រុម​គ្រួសារ​លោក​គ្រូ អេ ភូថង ដែល​ជា​អ្នក​គ្រប់​គ្រង និង​គ្រូ​បង្វឹក​របស់​កីឡាករ​ពេញ​ចិត្ត​​ឡើយ។ ក្រុម​គ្រួសារ​របស់​លោក អេ ភូថង មិន​ទទួល​យករហស្សនាមជា​«​ស្តេច​ប្រដាល់ ឬ​ ស្តេច​ត្រាញ់​»​ទេ ពី​ព្រោះ​ ធារ៉ា មិន​ទាន់​ស័ក្តិសម​នឹង​​រហស្សនាម​នេះ​ទេ ប៉ុន្តែ​ផ្ទុយ​ទៅ​​អាច​នឹង​ទទួល​រង​ការវាយ​ប្រហារ​ដោយ​ការ​ជេរ ប្រមាថ រិះ​គន់​​ ពី​មនុស្ស​មួយ​ចំនួន​ទៅ​វិញ​។

អ្នក​ស្រី សាំង សុម៉ាលី ​ភរិយា​របស់​លោក អេ ភូថង បាន​និយាយ​ក្នុង​​វីដេអូផ្សាយ​ផ្ទាល់​លើ​គណនី​ Facebook ​ថា ៖«ឈ្មោះ​ស្តេច​ត្រាញ់ឲ្យ​ ធឿន​ ធារ៉ា ខ្ញុំ​អត់​ចង់​បាន​ឲ្យ​សិស្សរបស់​ខ្ញុំ​​ទេ។ កូន​សិស្ស​របស់​ខ្ញុំ​អត់​ទាន់​សម​ជា​ស្តេច​​ត្រាញ់​អំបោះ​ឆៅ​ទេ។ ចង់​យក​នរណា​​ធ្វើ​ជា​ស្តេច​ត្រាញ់​ក៏​យក​ទៅ ប៉ុន្តែ​មិន​បាច់ ធឿន ធារ៉ា​ ទេ ពី​ព្រោះ​គាត់​ទើប​វ៉ៃ​អំបោះ​ឆៅប៉ុន្មាន​ប្រកួត​ប៉ុណ្ណោះ»។

«ការ​លើក​បែប​នេះ​នាំ​តែ​គេ​​ជេរ​សិស្ស​របស់​ខ្ញុំ​ ហើយ​ពាក្យ ស្តេច​ប្រដាល់​ក៏​មិន​បាច់​ដាក់​​ឲ្យ​កូន​សិស្ស​របស់​ខ្ញុំ​ដែរ។ បើ​កូន​សិស្ស​របស់​ខ្ញុំ​វ៉ៃ​អត់​កើត​រឹត​តែ​គេ​ជេរ​​ថែម​ទៀត។ ខ្ញុំ​សូម​អង្វរ ជា​ពិសេស​ផេក​មួយ​សូម​កុំ​សរសេរ​​ងារ​ទាំង​នេះ​ដាក់​សិស្ស​របស់​ខ្ញុំ ព្រោះ​គេ​ជេរ​សិស្ស​របស់​ខ្ញុំ។ អ្នក​ខ្លះ​អត់​ដឹង​ការ​ពិត​គឺ​គិត​តែ​ជេរ ដូច្នេះ​ខ្ញុំ​សូម​អង្វរ​ ខ្ញុំ​សូម​អង្វរ»។ អ្នក​ស្រី សាំង សុម៉ាលី បាន​សង្កត់​ធ្ងន់។

បន្ទាប់​ពី​ផ្តួល​ជើង​ខ្លាំង​រុស្ស៊ី​កាល​ពី​ថ្ងៃ​ទី​១៤ ខែ​មិថុនា ឆ្នាំ​២០២៤​ អ្នក​លេង​គុន​ខ្មែរ​ ធឿន ធារ៉ា មាន​ខ្សែ​ក្រវាត់​ចំនួន​៧​ខ្សែ​ហើយ​គឺ ខ្សែក្រវាត់ពិភព​លោក​ Thai Fight ខ្សែក្រវាត់គុនខ្មែរអន្តរជាតិ IPCC Kun Khmer ខ្សែក្រវាត់គ្រុដ​គុនខ្មែរអន្តរជាតិ ខ្សែក្រវាត់គុនខ្មែរអន្តរទ្វីប Kun Khmer Intercontinental ខ្សែក្រវាត់ តេជោសន្តិភាព គុនខ្មែរពិភពលោក ខ្សែក្រវាត់គុនខ្មែរពិភពលោក 8 Men Tournament  និង​ខ្សែ​ក្រវាត់អំបោះ​ឆៅ​គុន​ខ្មែរ។

ធឿន​ ធារ៉ា ​ជា​អត្តពលិក​ខ្មែរ​ដំបូង​គេ​បង្អស់​ដែល​ជាប់​ឈ្មោះ​ក្នុង​ទស្សនា​​វដ្តី​អាមេរិក​ដ៏​ល្បី «Forbes» ឆ្នាំ​២០២៤​ បន្ទាប់​ពី​ទទួល​បាន​ជោគជ័យ​យ៉ាងខ្លាំង​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ និង​រួម​ចំណែក​យ៉ាង​សំខាន់​ក្នុង​ការ​ផ្សព្វផ្សាយ​គុន​ខ្មែរ​ទៅ​លើ​ឆាក​អន្តរជាតិ៕

អត្ថបទ៖ វីរបុត្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម