ប្រធានផ្នែកអាជ្ញាកណ្តាល UEFA សរសើរក្រុមកាងារ VAR នៅអឺរ៉ូធ្វើការលឿន

ប្រធានផ្នែកអាជ្ញាកណ្តាលរបស់សហព័ន្ធ​កីឡា​បាល់ទាត់​​ទ្វីបអឺរ៉ុប (UEFA) បានចេញមុខការពារមន្ត្រីរបស់ខ្លួននៅព្រឹត្តិការណ៍ Euro ដោយ​លើ​ឡើង​ពី​ការសម្រេចចិត្តភាគច្រើនគឺត្រឹមត្រូវ និងការបង្ហាញវីដេអូក្រាហ្វិកកាត់សេចក្ដីកាន់តែមានភាពល្អប្រសើរ។

ក្រោយបញ្ចប់ការប្រកួតក្នុងវគ្គសន្សំពិន្ទុក្នុងពូល លោក Roberto Rosetti ត្រូវបានសាកសួរអំពីករណីចម្រូងចម្រាសជាច្រើនកើតមានក្នុងព្រឹត្តិការណ៍អឺរ៉ូ។ ជាពិសេសចំពោះករណីក្រុមស្កុតឡែន និងសាធារណរដ្ឋឆេក។ ក្នុងនោះអាជ្ញាកណ្តាលជាច្រើននឹងត្រូវកាត់ចេញក្នុងការប្រកួតវគ្គបន្ទាប់ ហើយលោក Rosetti ចាត់​ទុក​ជារឿងមួយដែលលោកពិបាកសម្រេចចិត្តបំផុត។

លោក Roberto Rosetti និយាយថា ៖«ការ​ប្រាប់​អាជ្ញាកណ្តាល​ថា​ ភារកិច្ចនៅអឺរ៉ូ​របស់​គាត់​បានបញ្ចប់​គឺជារឿង​ពិបាក​ណាស់។ ខ្ញុំធ្វើ​ជា​អាជ្ញាកណ្តាល​អស់​៣០​ឆ្នាំ​ទើប​ខ្ញុំយល់ច្បាស់ពីរឿងនេះ។ ពួកគេប្រឹងប្រែងអស់ពីសមត្ថភាព មិនមែនសម្រាប់តែអត្មានិយម​ទេ ប៉ុន្តែសម្រាប់បាល់ទាត់ទាំងមូល»។

លោក Rosetti បានបង្ហាញតួ​លេខ​ថា ការសម្រេចចិត្តរបស់ក្រុមការងារ VAR ក្នុងព្រឹត្តិការណ៍អឺរ៉ូធ្វើការងារលឿនជាងក្រុមការងារ VAR នៅក្នុងក្របខ័ណ្ឌ Champions League។ បច្ចេកវិទ្យាពាក់កណ្តាលស្វ័យប្រវត្តិកម្មបាល់ជំហរក្រៅល្បែង Semi-automated offside technology (SAOT) គឺដំណើរការល្អណាស់។ ពេលវេលាជាមធ្យមសម្រាប់ការកាត់ក្ដីរបស់ SAOT គឺប្រើពេលត្រឹមតែ៤៦វិនាទី ប្រៀប​ធៀប​នឹង​ការប្រកួតក្របខណ្ឌ UEFA ត្រូវប្រើពេល៥៨វិនាទី។ ការឆែកមើលវីដេអូ VAR នៅលើអេក្រង់ធំនៅក្នុងកីឡដ្ឋានកំពុងមានឥទ្ធិពលសំខាន់ ហើយឥឡូវនេះត្រូវបានបង្ហាញតែរយៈពេលមួយនាទី។

សរុបមកក្រុមមន្ត្រីអជ្ញាកណ្ដាលនៅ Euro ត្រូវបាន​សរសើរ​ពី​ការ​កាត់​សេចក្ដីមានល្អប្រសើរច្រើន ហើយចំណុចពិសេសមួយគឺច្បាប់ថ្មីដែលអនុញ្ញាតឲ្យប្រធានក្រុមចូលទៅជិតអាជ្ញាកណ្តាល ដើម្បីពិភាក្សាពីក្រោយមានការបង្កកំហុសនៅលើទីលាន៕

ប្រែសម្រួល៖ ផា រតនា