លោក​ Muñoz ថា Terengganu មានទម្រង់លេងដូចព្រះខ័នរាជស្វាយរៀង

ក្រុមព្រះខ័នរាជស្វាយរៀង​ត្រូវធ្វើធ្ងន់​ជាមួយក្រុមម្ចាស់ផ្ទះម៉ាឡេសុី Terengganu FC បើក​ឆាក​វគ្គសន្សំពិន្ទុក្នុងពានរង្វាន់ ASEAN Club Championship វេលា​ម៉ោង​៨​យប់ ថ្ងៃ​ទី​២១ ខែ​សីហា ឆ្នាំ​២០២៤។

លោក Pep Muñoz គ្រូបង្វឹកព្រះខ័នរាជស្វាយរៀងគិតថា ការលេងជាមួយ Terengganu នៅក្នុងដីរបស់ពួកគេជាការប្រកួតមួយពិបាក។ ពួកគេជាក្រុមចូលចិត្តលេងរក្សាបាល់ ហើយមានទម្រង់​លេង​ស្រដៀង​នឹង ព្រះខ័នរាជស្វាយរៀងដែរ។ ជាពិសេសក្រុមមួយនេះមានកីឡាករក្នុងស្រុកល្អៗច្រើនបូករួមទាំងកីឡាករបរទេសចំនួន៦រូបសុទ្ធតែមានគុណភាព។

លោក Pep Muñoz បាននិយាយថា ៖«Terengganu ជាក្រុមចូលចិត្តលេងបាល់ក្រោម ហើយចូលចិត្តលេងគ្រប់គ្រងបាល់។ យើង​ក៏​មាន​របៀល​លេង​បែបនេះដែរ។ យើង​នឹង​ព្យាយាមបញ្ឍប់ភាពខ្លាំងរបស់ពួកគេ។ Terengganu មានកីឡាករល្អច្រើនទាំងកីឡាករក្នុងស្រុកនិង​បរទេស។ កីឡាករបរទេស​៦រូប​សុទ្ធតែមានគុណភាព ប៉ុន្តែក្រុមយើងក៏មានកីឡាករកម្ពុជាល្អៗដូចគ្នា ជាពិសេសកីឡាករបរទេសយើងក៏ល្អអាចប្រកួតប្រជែងជាមួយពួកគេបាន»។

បើនិយាយពីសមិទ្ធផលរបស់ក្រុមទាំង២ ព្រះខ័នរាជស្វាយរៀង បាន​ឈ្នះជើងឯកលីគកំពូលកម្ពុជា​៣លើក, ពានរង្វាន់សម្តេច​តេជោ ហ៊ុន សែន ៥លើក និង​ខេមបូឌាន ស៊ូបភើខាប់១លើក។ ចំណែក Terengganu ធ្លាប់​បាន​ជើងឯករងលីគកំពូលម៉ាឡេសុី៤លើក, ឈ្នះជើងឯកលីគទីពីរ​២លើក, ឈ្នះពាន Malaysia Cup ១លើក និង ឈ្នះពានរង្វាន់ Malaysia​ FA Cup ១លើក៕

អត្ថបទ៖ ផា រតនា