វិសាខា នាំ​ចូល​ខ្សែប្រយុទ្ធជម្រើសជាតិហ្វីលីពីន​មានបទពិសោធ​ច្រើន

ក្លិប​បាល់ទាត់​វិសាខា​បាន​នាំ​ចូល​ខ្សែ​ប្រយុទ្ធ​ថ្មី​ទៀត​ហើយ​ដើម្បី​ពង្រឹង​ក្រុម​ត្រៀម​រដូវ​កាល​​២០២៤-២៥ ដែល​នឹង​ចាប់​ផ្តើម​នា​ខែ​សីហា ខាង​មុខ​នេះ។

ខ្សែ​ប្រយុទ្ធ Mike Rigoberto Ott ​អាយុ​២៩​ឆ្នាំ កម្ពស់​១.៦៧​ម៉ែត្រ កើត​នៅ​ប្រទេស​អាល្លឺម៉ង់ ប៉ុន្តែ​កូន​កាត់​ហ្វីលីពីន​ដែល​ធ្វើ​ឲ្យ​រូប​គេ​បាន​ជ្រើស​រើស​យក​ក្រុម​ជម្រើស​ជាតិ​ហ្វីលីពីន។ កាល​ពី​ក្មេង​រូប​គេ​លេង​ឲ្យ​ក្លិប 1860 Munich II និង 1 FC Numberg II នៅ​ប្រទេស​អាល្លឺម៉ង់​​ពី​ឆ្នាំ​២០១២ ដល់​ឆ្នាំ​២០១៧។

បន្ទាប់​មក​ Mike Ott បាន​​ផ្លាស់​មក​ក្លិប​លីគ​ទី២​របស់​ប្រទេស​ថៃ​ Angthong ​ដោយ​បង្ហាញ​ខ្លួន​លើ​ទី​លាន​​​៣០​ដង​ រក​បាន​៧​គ្រាប់ ពី​ឆ្នាំ​២០១៧-២០១៨។ ពី​ឆ្នាំ​២០១៨ ដល់​២០២២ រូប​គេ​បាន​ចូល​រួម​ជា​មួយ​​ក្លិប United City នៃ​លីគ​កំពូល​ហ្វីលីពីន ដោយ​​បង្ហាញ​ខ្លួន​លើ​ទី​លាន​​​៥៤​ដង រក​បាន​៣៥​គ្រាប់។

ចុង​ក្រោយ Mike Ott បាន​ចូល​រួម​ជា​មួយ​​ក្លិប Barito Putera នៃ​លីគ​កំពូល​ឥណ្ឌូណេស៊ី​ដោយ​បង្ហាញ​ខ្លួន​​​បាន​៦០​ដង រក​បាន​១០​គ្រាប់ ពី​ឆ្នាំ​២០២២-២០២៤ មុន​ពេល​ចូល​រួម​ជា​មួយ​វិសាខា​ចាប់​ពី​រដូវ​កាល​២០២៤-២៥។

រូប​គេ​បាន​​ជាប់​ជម្រើស​ជាតិ​ហ្វីលីពីន​តាំង​ពី​ឆ្នាំ​២០១៦​ដោយ​ធ្លាប់​បាន​​បង្ហាញ​ខ្លួនលើ​ឆាក​អន្តរជាតិ​​​៤០​លើក ស៊ុត​បាន​៥​គ្រាប់។

រហូត​ដល់​ពេល​នេះ វិសាខា មាន​ការ​ពង្រឹង​តំបន់​ប្រយុទ្ធ​ខ្លាំង​មែន​ទែន​ដោយ​បាន​បញ្ចេញ​កីឡាករ​កាល​ពី​រដូវ​កាល​មុន និង​នាំ​យក​ខ្សែ​ប្រយុទ្ធ​ថ្មី។ តំបន់​ប្រយុទ្ធ​ថ្មី​មាន​ដូច​ជា ខ្សែ​ប្រយុទ្ធ Vitalijs Jagodinskis ​អាយុ​៣២​ឆ្នាំ​ កម្ពស់១.៩១​ម៉ែត្រ​ជា​ជម្រើស​ជាតិ​ឡាតវី។ ខ្សែបម្រើ​កណ្តាល​សញ្ជាតិកូរ៉េ​ខាង​ត្បូង Park Jung-bin អាយុ​៣០​ឆ្នាំ កម្ពស់​១.៧៧​ម៉ែត្រ និង​ខ្សែ​ប្រយុទ្ធ​ប្រេស៊ីល Ramon Tanque៕

អត្ថបទ៖ វីរបុត្រ