កីឡា

Nick Taylor រំពឹងព្រះខ័នរាជស្វាយរៀងនឹងខ្លាំងជាងរដូវកាលមុន

បានផុស

២ years មុន

នៅ

ថ្ងៃអង្គារ ១៦ កក្កដា ២០២៤

ដោយ

ខ្សែបម្រើស្លាបដ៏សង្ហា Nick Taylor រំពឹងក្រុមព្រះខ័នរាជស្វាយរៀងនឹងមានគុណភាពខុសប្លែក និងខ្លាំងជាងមុន បន្ទាប់ពីបានផ្លាស់ប្តូរកីឡាករជាច្រើនដើម្បីត្រៀមប្រកួតកម្មវិធីជាច្រើនក្នុងរដូវកាលថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនពេលចេញដំណើរទៅប្រទេសឡាវដើម្បីប្រកួតជម្រុះពានរង្វាន់ក្លិបអាស៊ាន ASEAN Club Championship ជាមួយ Young Elephants ប្រុសស្អាត Nick Taylor បានប្រាប់ថា ក្រុមទាំងមូលពិតជារីករាយសម្រាប់ការប្រកួតនេះ។ កីឡាករទាំងអស់បានត្រៀមខ្លួនយ៉ាងល្អរយៈពេលពីរបីសប្តាហ៍កន្លងទៅ។ ការផ្លាស់ប្តូរកីឡាករថ្មីមួយចំនួនបានធ្វើឲ្យក្រុមកំពុងអភិវឌ្ឍយ៉ាងល្អ។ ជាពិសេសការសិក្សាពីរបៀបលេងបានយ៉ាងឆាប់រហ័ស។

Nick បាននិយាយថា ៖«យើងមានកីឡាករខ្លះចេញ ហើយមានកីឡាករថ្មីចូល តែដូចខ្ញុំនិយាយអីចឹង ក្រុមយើងកំពុងរីកចម្រើនដែលជំរុញឲ្យយើងមានរបៀបលេងខុសប្លែកពីមុន។ យើងមានគុណភាពខុសប្លែក ប្រៀបធៀបនឹងឆ្នាំមុន។ ឆ្នាំនេះ ខ្ញុំសង្ឃឹមថា ក្រុមយើងនឹងកាន់តែខ្លាំងជាងមុន មិនត្រឹមតែក្នុងលីគកម្ពុជាប៉ុណ្ណោះទេ ប៉ុន្តែថែមទាំងការប្រកួអន្តរជាតិផងដែរ»។

កូនខ្មែរកើតនៅសហរដ្ឋអាមេរិកបានបន្ថែមថា ការមានកម្មវិធីប្រកួតច្រើនទាំងក្នុងស្រុក និងក្រៅប្រទេសគឺពិតជាល្អខ្លាំងណាស់សម្រាប់ព្រះខ័នរាជស្វាយរៀង។ ការប្រកួតច្រើនគឺធ្វើឲ្យកីឡាករហត់នឿយមែន ប៉ុន្តែការប្រកួតជាមួយក្រុមផ្សេងៗនៅក្រៅប្រទេសដែលមានរបៀបលេងខុសៗគឺរឹតតែធ្វើឲ្យក្រុមរឹងមាំ។ សូម្បីកីឡាករម្នាក់ៗក៏កាន់តែល្អ។

ព្រះខ័នរាជស្វាយរៀងបានធ្វើដំណើរទៅដល់ប្រទេសឡាវហើយកាលពីល្ងាចមិញដើម្បីប្រកួតជាមួយក្រុមជើងឯកឡាវ Young Elephants នៅល្ងាចថ្ងៃទី១៧ ខែកក្កដា ឆ្នាំ២០២៤ ជើងទី១ វគ្គជម្រុះពានរង្វាន់ ASEAN Club Championship ហើយសប្តាហ៍ក្រោយនឹងប្រកួតជើងទី២នៅទឹកដីកម្ពុជាវិញម្តង៕