ស្ត្រីអភិបាលក្រុងប៉ារីស ចុះហែលទឹកទន្លេសែនជាផ្លូវការមុនកីឡាអូឡាំពិក

អភិបាលក្រុងប៉ារីស លោកស្រី Anne Hidalgo បានហែលជានិមិត្តរូបនៅទន្លេសែន កាលពីថ្ងៃពុធ ដើម្បីបង្ហាញពីគុណភាពទឹក​ល្អ​មុនការប្រកួតកីឡាអូឡាំពិកនាពេលខាងមុខ។

ការជ្រមុជទឹកកាន់តែជ្រៅជាផ្នែកមួយនៃកិច្ចខិតខំប្រឹងប្រែងដើម្បីធានាថា ទឹក​ទន្លេមានសុវត្ថិភាពសម្រាប់អត្តពលិក បង្ហាញពីការប្តេជ្ញាចិត្តរបស់ទីក្រុងក្នុងការសម្អាតផ្លូវទឹកដែលជានិមិត្តរូប​សម្រាប់​រៀបចំព្រឹត្តិការណ៍​​ចាប់​ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ឆ្នាំ​២០២៤។

ស្ត្រីវ័យ៦៥ឆ្នាំបានពាក់វ៉ែនតា និងឈុតហែលទឹករបស់លោកស្រី បានហែលទឹកយ៉ាងស្រស់ស្អាតនៅក្រោមពន្លឺថ្ងៃ​ក្នុង​រដូវក្តៅ។ បន្ទាប់មកលោកស្រីបានជ្រមុជទឹកទៅក្នុងទន្លេសែន ប្រហែល ១០០ម៉ែត្រចុះក្រោម។

ចូលរួមជាមួយលោកស្រី ក៏មានមន្ត្រីជាន់ខ្ពស់ក្នុងតំបន់ និងលោក Tony Estanguet ប្រធានគណៈកម្មាធិការរៀបចំព្រឹត្តិការណ៍អូឡាំពិក២០២៤ និងជាកីឡាករទូកក្តោងដែលឈ្នះមេដាយមាស។

លោក Estanguet បាននិងកំពុងត្រួតពិនិត្យភាពស្អាតរបស់ទន្លេសែន ក្នុងការរៀបចំសម្រាប់ Paris Games ដែលគ្រោងនឹងចាប់ផ្តើមនៅសប្តាហ៍ក្រោយ។ លោក Estanguet ក៏បាននិយាយថា “ថ្ងៃនេះគឺជាការបញ្ជាក់ថាយើងពិតជាទៅដល់កន្លែងដែលយើងចង់ទៅ។ ឥឡូវនេះយើងបានត្រៀមខ្លួនជាស្រេចក្នុងការរៀបចំការប្រកួតក្នុងទន្លេសែន”។

ផ្នែកហែលទឹករបស់ទ្រីយ៉ាត្លុងអូឡាំពិក នឹងធ្វើឡើងនៅលើដងទន្លេសែននេះ នៅថ្ងៃទី៣០-៣១ ខែកក្កដា និងថ្ងៃទី០៥ ខែសីហា ខណៈ​ការហែលទឹក នៅថ្ងៃទី ៨-៩ ខែសីហា។ ទោះបីជាមានការវិនិយោគចំនួន ១.៥ពាន់លានដុល្លារ ដើម្បីបញ្ឈប់ការលេចធ្លាយទឹកស្អុយក៏ដោយ ក៏ទន្លេបានបរាជ័យជាបន្តបន្ទាប់ក្នុងការសាកល្បងគុណភាពទឹករហូតដល់ដើមខែនេះ។

ការហែលទឹកកាលពីថ្ងៃពុធ ដែលត្រូវបានធ្វើជាសាក្សីដោយអ្នកសារព័ត៌មានជាង ១៥០នាក់ ក្នុងគោលបំណងបង្ហាញពីការត្រៀមខ្លួនរបស់ទន្លេ និងគូសបញ្ជាក់ពីគោលដៅមួយក្នុងចំណោមគោលដៅកេរ្តិ៍ដំណែលសំខាន់ៗរបស់ប៉ារីស ឆ្នាំ​២០២៤។

គួរដឹងដែរថា ដើមឡើយ លោកស្រី Hidalgo មានគម្រោងចុះហែលទឹកទន្លេសែននេះកាលពីខែមុន ប៉ុន្តែត្រូវបានពន្យារពេលដោយសារ​ការធ្វើតេស្តទឹកបង្ហាញពីកម្រិតបាក់តេរី E.Coli ខ្ពស់ជាងកម្រិតដែលអនុញ្ញាតដល់ទៅ១០ដង។ ការប៉ុនប៉ងចុះហែលទឹករបស់លោកស្រីបានបង្ករឿងសើចចំអកនៅលើប្រព័ន្ធផ្សព្វផ្សាយសង្គមថែមទៀតផង៕

ប្រែសម្រួល៖ មន្នីរ័ត្ន
ប្រភព៖ Inside The Games