បានទៅអូឡាំពិកលើកដំបូង អត្តពលិកអ៊ីរ៉ាក់ ប្រើសារធាតុប៉ូវកម្លាំង ត្រូវគេរកឃើញ 

ទីភ្នាក់ងារធ្វើតេស្តអន្តរជាតិ (ITA) បានប្រកាសកាលពីថ្ងៃសុក្រទី២៦ខែកក្កដាថា ខ្លួនបានរកឃើញករណីទីមួយ ដែលអត្តពលិកបានប្រើប្រាស់សារធាតុហាមឃាត់ ក្នុងព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ២០២៤។ នោះគឺកីឡាករយូដូអ៊ីរ៉ាក់ឈ្មោះ Sajjad Sehen ដែលទើបតែចូលរួមក្នុងការប្រកួតកីឡាអូឡាំពិក លើកទីមួយប៉ុណ្ណោះ ក្នុងឆាកជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គាត់ត្រូវបានរកឃើញប្រើប្រាស់សារធាតុប៉ូវកម្លាំង Metandienone និង Boldenone ក្នុងការធ្វើតេស្តនៅទីក្រុងប៉ារីស កាលពីថ្ងៃទី២៣ខែកក្កដា។

យោងតាមកាលវិភាគ កីឡាករវ័យ២៨ឆ្នាំរូបនេះ នឹងត្រូវប្រកួតជាមួយដៃគូមកពីប្រទេសអ៊ូសបេគីស្ថាន នៅថ្ងៃទី៣០ខែកក្កដា ក្នុងប្រភេទទម្ងន់៨១គីឡូក្រាម។

ទោះបីជាយ៉ាងណាក៏ដោយ ជាមួយលទ្ធផលតេស្តខាងលើនេះ គាត់នឹងត្រូវព្យួរពីការប្រកួត ហើយស្ថិតនៅក្រោមការស៊ើបអង្កេតករណីរំលោភវិន័យ។

ស្របពេលជាមួយគ្នានោះដែរ បើតាមសេចក្តីប្រកាសពី ITA, នេះមានន័យថា Sajjad Sehen មិនត្រូវបានអនុញ្ញាតឲ្យប្រកួត ហ្វឹកហាត់ ឬចូលរួមក្នុងសកម្មភាពណាមួយ ក្នុងអំឡុងពេលព្រឹត្តិការណ៍កីឡាអូឡាំពិកនេះទេ៕

អត្ថបទ៖ សុខ សុវណ្ណ

ចុចអាន៖ ចាប់អារម្មណ៍ទេ? កំហុសធំមួយកើតឡើង ពេលបង្ហូតទង់អូឡាំពិក ក្នុងពិធីបើក