ក្រុម​ទាំង​១៦​ទទួល​បាន​ចំណេះ​ដឹង​បន្ថែមមុន​ពេលប្រកួត ស្វាយរៀងស៊ុបភើខាប់

នៅថ្ងៃសៅរ៍ ទី២៧ ខែកក្កដា ឆ្នាំ២០២៤ សហភាពសហព័ន្ធយុជនកម្ពុជា ខេត្តស្វាយរៀង បាន​សហការជាមួយក្លិបបាល់ទាត់​ព្រះខ័នរាជស្វាយរៀង បានរៀបចំកម្មវិធីចែករំលែកបទពិសោធ ដល់គ្រូបង្វឹក និងកីឡាករ ដែលនឹងត្រូវចូលរួមប្រកួត ពានរង្វាន់ ស្វាយរៀង ស៊ុបភើ ខាប់ លើកទី១ ឆ្នាំ២០២៤។

កម្មវិធី​ចែក​រំលែកនេះ​មាន​២យ៉ាង​ដើម្បី​ឲ្យ​កីឡាករ និង​ក្រុម​ការងារ​គ្រូ​ទទួល​បាន​ចំណេះ​ដឹង​ថ្មី​យក​អនុវត្ត​ផ្ទាល់​។ ទី១. ការចែករំលែកបទពិសោធ​ជូនដល់គ្រូបង្វឹក និងគ្រូជំនួយទាំង១៦ក្រុម អំពីរបៀបនៃការដឹកនាំក្រុម បច្ចេកទេស និង​យុទ្ធសាស្ត្រ ឬប្រព័ន្ធលេងនៅលើទីលានប្រកួត​ដែល​បង្ហាញ​​ដោយលោក សំ វណ្ណដេត ប្រធានបច្ចេកទេសសាលាបាល់ទាត់ព្រះខ័នរាជស្វាយរៀង នៅ​កីឡដ្ឋានខេត្តស្វាយរៀង។

ទី​២. ការចែករំលែកបទពិសោធ​ដល់​ក្រុម​គ្រូ​បង្វឹក​ និងកីឡាករទាំងអស់ នូវបច្ចេកទេស​លេងនៅលើទីលានប្រកួតមួយចំនួនពីកីឡាអតីតជម្រើសជាតិ​គឺ​កីឡាករ អោម ឧត្តម, រស់ គង់សម្រេច និង​ សុខ សំណាង។ កីឡាករ​អាជីព​ទាំង​៣​រូប​​បាន​ធ្វើបទបង្ហាញនូវច្បាប់ល្បែង និងបទបញ្ជាបច្ចេកទេសមួយចំនួន សម្រាប់ក្រុមនីមួយៗបានត្រៀមខ្លួនក្នុងព្រឹត្តិការណ៍ប្រកួត នៅសាលប្រជុំ នៃសាកលវិទ្យាល័យស្វាយរៀង។

កម្មវិធីទាំង​២នេះ រៀបចំឡើងក្រោមការចង្អុលបង្ហាញពី ឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង និងជាប្រធានក្លិបបាល់ទាត់ ព្រះខ័នរាជស្វាយរៀង ក្នុងគោលបំណងចែករំលែកបទពិសោធ​នៃការដឹកនាំក្រុម បច្ចេកទេសច្បាប់ល្បែង និងបទបញ្ជាផ្សេងៗ ជូនដល់គ្រូបង្វឹក គ្រូជំនួយ ប្រតិភូក្រុម និងកីឡាករទាំង ១៦ក្រុម ដើម្បីត្រៀមលក្ខណៈគ្រប់គ្រាន់រួចជាស្រេចដើម្បីចូលរួមប្រកួត ពានរង្វាន់ ស្វាយរៀង ស៊ុបភើ ខាប់ លើកទី១ ឆ្នាំ២០២៤ ដែលនឹងចាប់ផ្ដើមប្រកួតចាប់ពីថ្ងៃអាទិត្យ ទី២៨ ខែកក្កដា ឆ្នាំ២០២៤៕

អត្ថបទ៖ វីរបុត្រ