កីឡា

លោក Ballard ត្រូវបានបញ្ឈប់ពីការងារអត្ថាធិប្បាយកីឡាអូឡាំពិកភ្លាមៗ

បានផុស

២ years មុន

នៅ

ថ្ងៃអង្គារ ៣០ កក្កដា ២០២៤

ដោយ

ពិធីករកីឡាអូឡាំពិក លោក Bob Ballard ត្រូវបានបញ្ឈប់ពីការងារអត្ថាធិប្បាយភ្លាមៗ ក្រោយបង្ហោះវីដេអូបែបសើចចំអកទៅលើក្រុមកីឡាការិនីហែលទឹកអូស្ត្រាលី ពេលប្រកួតហែលទឹកសេរីបណ្ដាក់ ៣x១០០ ម៉ែត្រ ក្នុងកីឡាអូឡាំពិក នៅប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីបញ្ចប់ការប្រកួតហែលសេរីបណ្ដាក់ ៣x១០០ ម៉ែត្រ លោក Bob Ballard បានបង្ហោះវីដេអូបែបលេងសើចពាក់ព័ន្ធជាមួយនារីភេទ ក្រោយក្រុមកីឡាការិនីហែលទឹកអូស្ត្រាលីបានឈ្នះមេដាយមាស។

លោក Bob Ballard បាននិយាយថា ៖«មែនហើយ ការប្រកួតស្ត្រីទើបតែបញ្ចប់។ អ្នកដឹងថា មនុស្សស្រីចូលចិត្តបំផុតគឺការដើរលេង និងតុបតែងខ្លួន»។

អ្នកនាំពាក្យ Eurosport ជាក្រុមហ៊ុនផ្សព្វផ្សាយកីឡាអូឡាំពិកនៅអឺរ៉ុប បានបញ្ជាក់ថា លោក Ballard ត្រូវបានដកចេញពីការអត្ថាធិប្បាយ ក្រោយករណីនេះកើតឡើង។ ក្នុងសេចក្តីថ្លែងការណ៍របស់ក្រុមហ៊ុនបាននិយាយថា ៖«យើងអាចបញ្ជាក់បានថា លោក Bob Ballard ត្រូវបានដកចេញពីបញ្ជីឈ្មោះជាអ្នកអត្ថាធិប្បាយរបស់យើងហើយ»។

លោក Ballard ជាអ្នកអត្ថាធិប្បាយកីឡាដែលមានបទពិសោធច្រើន។ លោកដែលបានធ្វើការងារកីឡាតាំងពីពាក់កណ្តាលទសវត្សរ៍ឆ្នាំ៨០ បានធ្វើការងារក្នុងព្រឹត្តិការណ៍កីឡាអូឡាំពិកជាច្រើន។ លោកក៏ជាតន្ត្រីករ និងជាពិធីករវិទ្យុ BBC Local ផងដែរ។

លោក Ballard ដែលបានសូមទោសចំពោះការបង្ហោះរបស់លោកបាននិយាយថា លោកគ្មានចេតនាមាក់ងាយនរណាម្នាក់ឡើយ។ ប្រសិនបើលោកធ្វើបែបនេះខុស លោកសូមអភ័យទោស៕

ប្រែសម្រួល៖ ផា រតនា