គ្រូដង្កោសែន​ជ័យ​ ថា ព្រះ​ខ័ន​រាជ​ស្វាយរៀងជាក្រុមគ្រោះថ្នាក់ខ្លាំង

ក្រុមអាយអេសអាយ ដង្កោសែនជ័យ ត្រូវជួបជាមួយក្រុមព្រះខ័នរាជស្វាយរៀង វេលាម៉ោង៦​ល្ងាច​នេះ សប្ដាហ៍ទី២​ខេមបូឌានព្រីមៀរលីគ រដូវកាលឆ្នាំ២០២៤-២៥។

លោក John Botioba គ្រូ​បង្វឹក​អាយអេស​ ដង្កោសែន​ជ័យ​ យល់ឃើញថា ក្លិបព្រះខ័នរាជស្វាយរៀង រដូវកាលនេះជាក្រុមគ្រោះថ្នាក់​​ខ្លាំង បន្ទាប់​ពី​ពួកគេ​បាន​រៀបចំបានយ៉ាងល្អ។ ជាពិសេស​ការ​នាំយកកីឡាករ​ថ្មីឆ្នើមៗមករួមក្រុមបន្ថែមទៀត។

លោកបាននិយាយថា ៖«សម្រាប់ខ្ញុំកីឡាករ Cristian, Pablo, សុីដាន និងកីឡាករស្វាយរៀងទាំងអស់សុទ្ធតែមានគុណភាព។ ព្រះខ័នរាជ​ស្វាយរៀងជាក្រុមកំពុងល្អខ្លាំង។ ពួកគេបានឆ្លងដល់ចែកពូលពានរង្វាន់ Shoppe Cup ហើយការប្រកួតចុងក្រោយ ពួកគេឈ្នះ៧-០។ នេះជាមូល​ហេតុ​ជំរុញទឹកចិត្តរបស់ពួកគេ​យ៉ាង​ខ្លាំង»។

ការប្រកួតយប់នេះមិនមានវត្តមានកីឡាករប្រធានក្រុម Abdel Kader Coulibaly ទេ ដោយសារជាប់ពិន័យ ក្រោយទទួលបានកាតក្រហមកាលពីប្រកួតសប្ដាហ៍ទី១។ ទោះបីអវត្តមាន​រូប​គេ​ ប៉ុន្តែ​លោក John Botioba ថា គ្មាន​បញ្ហា​ចោទ​ខ្លាំង​ទេ។

លោក John Botioba បន្ដែមថា ៖«Abdel ជាតួសំខាន់ក្នុងក្រុម ប៉ុន្តែយើងមិនផ្ដោតតែលើកីឡាករតែម្នាក់ទេ។ ទោះមិន​មាន​គាត់ តែ​​យើងត្រូវរកវិធីសាស្រ្ដ​ផ្សេង​។ អ្វីដែលពិសេសគឺយើងទុកចិត្តលើកីឡាករយើងទាំងអស់»៕

អត្ថបទ៖ ផា រតនា