កីឡា

ឯកឧត្តម ឌី វិជ្ជា សរសើរប្រធានក្លិបអង្គរថាយហ្គឺរចូលរួមអភិវឌ្ឍបាល់ទាត់កម្ពុជា

បានផុស

៦ ខែ មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

ឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀង បានកោតសរសើរបុរសជនជាតិជប៉ុន លោក AKIHIRO KATO ប្រធានក្លិបបាល់ទាត់ អង្គរថាយហ្គឺរ ដែលបានចំណាយពេលវេលា និងធនធាន មកជួយកសាងអភិវឌ្ឍវិស័យបាល់ទាត់នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្លិបបាល់ទាត់ អង្គរថាយហ្គឺរ បានបង្កើតឡើងតាំងពីឆ្នាំ២០១៥។ ក្នុងរយៈពេល៥ឆ្នាំនេះ ក្លិបដែលមានមូលដ្ឋាននៅខេត្តសៀមរាប បានចូលរួមចំណែកអភិវឌ្ឍវិស័យបាល់ទាត់នៅកម្ពុជាយ៉ាងសកម្ម។ ជាពិសេសបានផ្ដល់ឱកាសឲ្យកីឡាករនៅក្នុងខេត្តបានចូលលេងបាល់ទាត់កម្រិតអាជីព។ ក្នុងឆ្នាំ២០២៤ ក្លិបបាល់ទាត់ អង្គរថាយហ្គឺរ បានសាងសងកីឡដ្ឋានផ្ទាល់ខ្លួននៅទឹកដីខេត្តសៀមរាប។ នេះហើយជាការចូលរួមចំណែកយ៉ាងខ្លាំងក្នុងការលើកស្ទួយវិស័យបាល់ទាត់នៅកម្ពុជា ស្របតាមផែនការរបស់សហព័ន្ធកីឡាបាល់ទាត់កម្ពុជាសម្រាប់ខេត្តមួយមានក្លិបអាជីពមួយ និងកីឡដ្ឋានមួយ។

ក្រោយឃើញពីការលះបង់របស់បុរសជនជាតិជប៉ុន លោក AKIHIRO KATO ប្រធានក្លិបបាល់ទាត់ អង្គរថាយហ្គឺរ ឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀង ក្នុងនាមជាអ្នកចូលរួមចំណែកអភិវឌ្ឍបាល់ទាត់មួយរូប ពិតជាមានការកោតសរសើយ៉ាងខ្លាំងចំពោះទស្សនវិស័យរបស់ដឹកនាំក្លិបអង្គរថាយហ្គឺរ។

ឯកឧត្តម ឌី វិជ្ជា បានលើឡើងថា ៖«ខ្ញុំសូមធ្វើការកោតសរសើរចំពោះ លោក AKIHIRO KATO ប្រធានក្លិបបាល់ទាត់ អង្គរថាយហ្គឺរ ដែលបានចំណាយពេលវេលា និងធនធាន មកជួយកសាងអភិវឌ្ឍវិស័យបាល់ទាត់នៅកម្ពុជា ជាពិសេសនៅលើទឹកដីអង្គរ ខេត្តសៀមរាប។ សូមជូនពរ លោក AKIHIRO KATO ក្រុមគ្រួសារ ព្រមទាំងកីឡាករ មន្រ្តី បុគ្គលិកក្លិបបាល់ទាត់អង្គរថាយហ្គឺរទាំងអស់ មានសុខភាពល្អ និងជួបតែសំណាងល្អ»។

ចំពោះក្លិបអង្គរថាយហ្គឺរ ក៏បានប្រកាសពីគម្រោងនៃការសាងសង់ដំណាក់កាលទី១ របស់កីឡដ្ឋានថ្មី មានបំពាក់កៅអីអង្គុយប្រហែល ២,០០០ កៅអី។ កីឡដ្ឋាននេះគ្រោងនឹងការបើកដំណើរនៅ ថ្ងៃទី១០ ខែវិច្ឆិកា ឆ្នាំ២០២៤៕

អត្ថបទ៖ ផា រតនា