កីឡា

អង្គរថាយហ្គឺរ និង ភ្នំពេញក្រោន ជាក្រុមមិនទាន់ចាញ់ក្នុងលីគរដូវកាលនេះ

បានផុស

២ years មុន

នៅ

ថ្ងៃសុក្រ ២០ កញ្ញា ២០២៤

ដោយ

ក្លិបបាល់ទាត់ភ្នំពេញក្រោន និង អង្គរថាយហ្គឺរ ជាក្រុមពីរដែលមិនទាន់ស្គាល់បរាជ័យក្នុងការប្រកួតខេមបូឌានព្រីមៀរលីគ២០២៤-២៥ ដែលបានដំណើរការ៥សប្តាហ៍កន្លងទៅ បន្ទាប់ពីណាហ្គាវើលដ៍បានចាញ់ព្រះខ័នរាជស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោន រកបាន១២ពិន្ទុពេញ ឈរលេខ២ក្នុងតារាង តាមរយៈជ័យជម្នះទាំង៤ប្រកួត។ ប្រកួតទី១ ពួកគេបានយកឈ្នះ វិសាខា ៤-២, សប្តាហ៍ទី២ ឈ្នះ ក្រសួងការពារជាតិ ២-១, សប្តាហ៍ទី៣ ឈ្នះ បឹងកេត ២-១ និងសប្តាហ៍ទី៤ ឈ្នះ គិរីវង់សុខសែនជ័យ៦-០។

អង្គរថាយហ្គឺរ បានបង្កការភ្ញាក់ផ្អើលតាមរយៈការបង្កើតកំណត់ត្រាជ័យជម្នះ៤ប្រកួតជាប់គ្នា រកបាន១២ពិន្ទុ ឈរលេខ៣ក្នុងតារាង ស្មើពិន្ទុ ភ្នំពេញក្រោន និងព្រះខ័នរាជស្វាយរៀង។ សប្តាហ៍ទី១ ពួកគេបានយកឈ្នះ សមាគមបាល់ទាត់ក្រសួងមហាផ្ទៃ ០-១, សប្តាហ៍ទី២ ឈ្នះក្រសួងការពារជាតិ ១-២, សប្តាហ៍ទី៣ ឈ្នះ អាយអេសអាយ ដង្កោសែនជ័យ ០-២ និងសប្តាហ៍ទី៤ ឈ្នះ គិរីវង់សុខសែនជ័យ ១-៣។

ព្រះខ័នរាជស្វាយរៀង កំពុងឈរលើកំពូលតារាងដោយមាន១២ពិន្ទុ ប៉ុន្តែបានឆ្លងកាត់៥ប្រកួត។ ៥ប្រកួតកន្លងទៅ ពួកគេ បានឈ្នះ៤ និងចាញ់១ គឺឈ្នះ ក្រសួងការពារជាតិ ៧-០, ឈ្នះ អាយអេសអាយ ដង្កោសែនជ័យ ១-៤, ឈ្នះគិរីវង់សុខសែនជ័យ ៦-១, ចាញ់ វិសាខា ០-១ និងឈ្នះណាហ្គាវើលដ៍ ២-០។

ណាហ្គាវើលដ៍ កំពុងឈរលេខ៥ ដោយរកបាន៩ពិន្ទុ តាមរយៈជ័យជម្នះលើក្រុមគិរីវង់សុខសែនជ័យ ២-០ ក្នុងសប្តាហ៍ទី១, ឈ្នះ វិសាខា ១-០ ក្នុងសប្តាហ៍ទី២, ឈ្នះ បឹងកេត ៣-១ ក្នុងសប្តាហ៍ទី៣ និងចាញ់ ព្រះខ័នរាជស្វាយរៀង ០-២ ក្នុងសប្តាហ៍ទី៤។

វិសាខា មាន៩ពិន្ទុ ពីការឈ្នះ៣ និងចាញ់២ កំពុងឈរលេខ៤ ខណៈអាយអេសអាយដង្កោសែនជ័យ ឈរលេខ៦ពីការឈ្នះ២ ស្មើ១ និងចាញ់២។

ជាមួយគ្នានេះ បឹងកេត ឈ្នះ២ និងចាញ់២ មាន៦ពិន្ទុ ឈរលេខ៧ ហើយក្រសួងការពារជាតិឈ្នះ១ ស្មើ១ និងចាញ់៣ មាន៤ពិន្ទុឈរលេខ៨។ ក្រុម៣ដែលមិនទាន់ស្គាល់ជ័យជម្នះគឺ សមាគមបាល់ទាត់ក្រសួងមហាផ្ទៃ ចាញ់៣ និងស្មើ១ មាន១ពិន្ទុ។ ឡាយហ្វ ព្រះសីហនុ ស្មើ១ និងចាញ់៤មាន១ពិន្ទុ ខណៈគិរីវង់សុខសែនជ័យចាញ់ទាំង៥ប្រកួតស្ថិតនៅបាតតារាង៕