កីឡា

នាយករដ្ឋមន្ត្រីឥណ្ឌា Modi ប្តេជ្ញាដេញថ្លៃធ្វើម្ចាស់ផ្ទះកីឡាអូឡាំពិក២០៣៦

បានផុស

២ years មុន

នៅ

ថ្ងៃព្រហស្បតិ៍ ២៦ កញ្ញា ២០២៤

ដោយ

នាយករដ្ឋមន្រ្តីឥណ្ឌា លោក Narendra Modi បានកំពុងប្រឹងប្រែងដើម្បីធ្វើជាម្ចាស់ផ្ទះរៀបចំព្រឹត្តិការណ៍កីឡាអូឡាំពិកនៅឆ្នាំ២០៣៦។

កាលពីថ្ងៃអាទិត្យ លោកនាយករដ្ឋមន្ត្រី Modi បានថ្លែងទៅកាន់ជនភៀសខ្លួនឥណ្ឌា ១៥,០០០នាក់ ដែលបានប្រមូលផ្តុំនៅតំបន់ Nassau Coliseum ក្នុងទីក្រុង Long Island ទីក្រុងញូវយ៉ក ដែលជាផ្នែកមួយនៃកម្មវិធី “Modi and US”។

បន្ទាប់ពីការស្វាគមន៍យ៉ាងកក់ក្តៅ លោក Modi បានសន្យាជាមួយទស្សនិកជនថា ប្រទេសឥណ្ឌានឹងធ្វើជាម្ចាស់ផ្ទះការប្រកួតកីឡាអូឡាំពិកក្នុងពេលឆាប់ៗ។ លោកថា ៖«កាលពីប៉ុន្មានថ្ងៃមុន ព្រឹត្តិការណ៍អូឡាំពិកទីក្រុងប៉ារីសបានបញ្ចប់។ ឆាប់ៗនេះ អ្នកនឹងក្លាយជាសាក្សីនៃកីឡាអូឡាំពិកនៅប្រទេសឥណ្ឌាវិញម្តង។ យើងកំពុងខិតខំប្រឹងប្រែងអស់ពីសមត្ថភាពដើម្បី ធ្វើជាម្ចាស់ផ្ទះកីឡាអូឡាំពិកឆ្នាំ២០៣៦»។

ប្រទេសឥណ្ឌាទទួលបានមេដាយសំរិទ្ធ៥ និងប្រាក់១ នៅក្នុងការប្រកួតកីឡាអូឡាំពិកទីក្រុងប៉ារីសឆ្នាំ២០២៤ ដែលបានបញ្ចប់ក្នុងចំណាត់ថ្នាក់ទី៧១ ក្នុងតារាងមេដាយ។ លទ្ធផលនេះគឺអាក្រក់ជាងមេដាយសរុបចំនួន៧របស់ខ្លួនក្នុងកីឡាអូឡាំពិក កាលពីឆ្នាំ២០២០ ដែលបានឈ្នះមាស១ ប្រាក់២ និងសំរឹទ្ធ៤ ប៉ុន្តែនៅតែជាចំនួនមេដាយខ្ពស់បំផុតទីពីរក្នុងប្រវត្តិសាស្ត្ររបស់ពួកគេ។

លោក Modi បាននិយាយអំពីការរីកចម្រើនរបស់ឥណ្ឌានៅក្នុងពិភពកីឡា។ លោកបាននិយាយកាលពីថ្ងៃអាទិត្យថា ៖«មិនថាកីឡា អាជីវកម្ម បរិស្ថាន ឬការកម្សាន្ត ឥណ្ឌាគឺជាមជ្ឈមណ្ឌលនៃការយកចិត្តទុកដាក់ដ៏ធំនាពេលបច្ចុប្បន្ន»។ លីគកីឡាគ្រីឃីត គឺជាលីគកីឡាកំពូលមួយក្នុងពិភពលោក។

នេះជាលើកទី២ហើយដែលលោកបានថ្លែងទៅកាន់ទស្សនិកជនក្នុងអំឡុងពេលដំណើរទស្សនកិច្ចរយៈពេល៣ថ្ងៃរបស់លោកទៅកាន់សហរដ្ឋអាមេរិកដោយបានចូលរួមក្នុងកិច្ចប្រជុំកំពូល Quad ជាមួយប្រធានាធិបតីសហរដ្ឋអាមេរិកលោក Joe Biden នាយករដ្ឋមន្ត្រីអូស្ត្រាលីលោក Anthony Albanese និងនាយករដ្ឋមន្ត្រីជប៉ុន លោក Fumio Kishida កាលពីមួយថ្ងៃមុន។

លោក Modi មិនបានលាក់បាំងពីបំណងរបស់ខ្លួនក្នុងការធ្វើជាម្ចាស់ផ្ទះកីឡាអូឡាំពិកកាលពីឆ្នាំមុននោះទេ ហើយបានសង្កត់ធ្ងន់ម្តងហើយម្តងទៀតនូវការប្តេជ្ញាចិត្តរបស់លោកក្នុងការមើលឃើញប្រទេសរបស់ខ្លួនរីកចម្រើននៅក្នុងពិភពកីឡា។ វាកើតឡើងបន្ទាប់ពីលោកបាននិយាយអំពីរដ្ឋាភិបាល “ផ្តោតលើអត្តពលិក” នៅការប្រកួតកីឡាអត្តពលកម្មនៅទីក្រុងដេលីកាលពីឆ្នាំមុន។

ឆ្នាំ២០២៣ ឥណ្ឌាត្រូវបានមើលឃើញថាមានការរីកចម្រើនគួរឱ្យកត់សម្គាល់នៅក្នុងព្រឹត្តិការណ៍កីឡាជនពិការអាស៊ី ជាមួយនឹងមេដាយមាស២៩ ប្រាក់៣១ និងមេដាយសំរិទ្ធ៥១ ដែលជាការបំបែកកំណត់ត្រាចាស់របស់ខ្លួន។ មេដាយជាង១០០ បានធ្វើឱ្យពួកគេបញ្ចប់ក្នុងចំណាត់ថ្នាក់ទី៥ តាមពីក្រោយប្រទេសចិន អ៊ីរ៉ង់ ជប៉ុន និងកូរ៉េខាងត្បូង៕

ប្រែសម្រួល៖ មន្នីរ័ត្ន
ប្រភព៖ Inside The Games