កីឡា

Ronaldo រកបានចំណូលច្រើនជាងចំណូលរបស់ Messi និង Neymar បូកបញ្ចូលគ្នា

បានផុស

៥ ខែ មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

កីឡាករ Cristiano Ronaldo រកចំណូលបាន២៨៥លានដុល្លារអាមេរិកក្នុងអំឡុងឆ្នាំ២០២៤ ដែលជាចំនួនច្រើនជាងរបស់កីឡាករ Lionel Messi និង Neymar បូកបញ្ចូលគ្នាទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទស្សនាវដ្តី Forbes កីឡាករ Ronaldo ទទួលបានទឹកប្រាក់ប្រមាណ២២០លានដុល្លារពីក្លិប Al Nassr រួមទាំងប្រាក់ខែ ប្រាក់រង្វាន់ និងកាតព្វកិច្ចក្នុងផ្សព្វផ្សាយផ្សេងទៀត។ លើសពីនេះរូបគេទទួលបានចំនួន៦៥លានដុល្លារការបណ្តាក់ទុនអាជីវកម្មជាច្រើនទៀត។ នេះជាកំណត់ត្រាផ្ទាល់ខ្លួនថ្មីមួយសម្រាប់ Ronaldo ដែលអាចរកចំណូលកើនលើសពីឆ្នាំមុន។ កីឡាករនៅតែឈរនៅកំពូលតារាងក្នុងនាមជាកីឡាករបាល់ទាត់រកចំណូលបានខ្ពស់បំផុតរបស់ទស្សនាវដ្ដី Forbes ចំនួន៦លើក។

ក្នុងឆ្នាំ២០២៤ កីឡាករ Ronaldo បានក្លាយជាមនុស្សដំបូងគេដែលមានអ្នកតាមដានសរុបជាងមួយពាន់លាននាក់នៅលើប្រព័ន្ធផ្សព្វផ្សាយសង្គម។ នៅអាយុ៣៩ឆ្នាំ រូបគេនៅរកចំណូលបានបន្ថែមពីដៃគូសហការឧបត្ថម្ភជាមួយក្រុមហ៊ុន Nike, Herbalife និង Whoop រួមជាមួយនឹងអាជីវកម្មផ្ទាល់ខ្លួនម៉ាក់ឃីហោ CR7 រួមមានសណ្ឋាគារ គ្រឿងក្រអូប និងខោក្នុង។

ចំពោះកីឡាករ Messi ត្រូវបានគេព្យាករណ៍ថា អាចរកបានប្រហែល១៣៥លានដុល្លារ ក្នុងនោះ៦០លានដុល្លារបានមកពីកិច្ចសន្យាជាមួយក្លិបអាមេរិក Inter Miam។ រូបគេក៏អាចបានចំណូលជាច្រើនបន្ដែមទៀតពីដៃគូសហការឧបត្ថម្ភជាមួយម៉ាកផលិតផលសំខាន់ៗដូចជា Adidas, Apple TV និង Konami និងមានអ្នកតាមដាន Instagram ជាង៥០០លាននាក់។ កាលពីខែមុន Messi បានបើកដំណើរការក្រុមហ៊ុនផលិតផលផ្ទាល់ខ្លួនគឺក្រុមហ៊ុន 525 Rosario ដែលដាក់ឈ្មោះតាមស្រុកកំណើតរបស់ខ្លួនក្នុងប្រទេសអាហ្សង់ទីន។

ចំណែកកីឡាករ Neymar ទោះបីជាអវត្តមានពីទីលានច្រើនខែដោយសាររបួស ក៏នៅតែរកបានចំណូលប្រមាណ១១០លានដុល្លារ ក្នុងនោះ៨០លានដុល្លារពីក្លិប Al Hilal និង៣០លានដុល្លារផ្សេងទៀតក្រៅពីបាល់ទាត់។ រូបគេបានចូលរួមជាមួយក្រុម Al Hilal ក្នុងខែសីហា ឆ្នាំ២០២៣ ក្នុងតម្លៃផ្ទេរកំណត់ត្រានៅប្រទេសអារ៉ាប៊ីសាអូឌីតចំនួន៩៨លានដុល្លារ ប៉ុន្តែទើបតែបង្ហាញខ្លួនលើទីលានបាន៥ប្រកួតប៉ុណ្ណោះ និងស៊ុតបញ្ចូលទីបាន១គ្រាប់។ កិច្ចសន្យារបស់គាត់មានរហូតដល់រដូវក្តៅឆ្នាំ២០២៥។ តារាប្រេស៊ីល Neymar មានអ្នកតាមដាន Instagram ជាង២២៥លាននាក់។ រូបគេបន្តភាពជាដៃគូសហការឧបត្ថម្ភយូរអង្វែងជាមួយក្រុមហ៊ុន Puma និង Blaze Casino។

ក្រឡែកមើលចំណូលរបស់កំពូលកីឡាករ៣រូបខាងលើ ឃើញថា Cristiano Ronaldo អាចនឹងរកចំណូលបាន២៨៥លានដុល្លារអាមេរិកក្នុងឆ្នាំ២០២៤ ច្រើនជាងចំណូល Lionel Messi និង Neymar បូកបញ្ចូលគ្នាបានត្រឹមតែ២៤៥លានដុល្លារ៕