កីឡា

ស្វិតស្វាញខ្លាំង! ៣គូស្មើ ស្វាយរៀងខាប់ U13 សប្តាហ៍ទី១

បានផុស

២ years មុន

នៅ

ថ្ងៃចន្ទ ៤ វិច្ឆិកា ២០២៤

ដោយ

ការប្រកួត«ពានរង្វាន់បាល់ទាត់ ស្វាយរៀងខាប់ អាយុក្រោម១៣ឆ្នាំ) លើកទី១ ឆ្នាំ២០២៤» សប្តាហ៍ទី១ កាលពីថ្ងៃអាទិត្យ ទី៣ ខែវិច្ឆិកា បង្ហាញឲ្យឃើញពីការប្រកួតប្រជែងគ្នាស្វិតស្វាញខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតចំនួន៤គូនៅទីលានវិទ្យាល័យ ហ៊ុនសែន ស្វាយរំពារ ស្រុកស្វាយទាប ខេត្តស្វាយរៀង បានបញ្ចប់ទៅដោយលទ្ធផលតឹងតែងខ្លាំង។ ថ្វីបើជាយុវជនអាយុទើប១៣ឆ្នាំ ប៉ុន្តែក្រុមនីមួយៗមានប្រព័ន្ធការពាររឹងមាំដូចគ្នាពោលគឺមិនងាយទម្លាយសំណាញ់ទីគ្នាស្រួលៗឡើយ។

ការប្រកួតវេលាម៉ោង៨:៣០នាទីព្រឹក ក្រុម U13 រមាសហែក និង ក្រុមបឋមសិក្សាជ្រៃធំ បានចែកគ្នា១ពិន្ទុម្នាក់ បន្ទាប់ពីលទ្ធផលស្មើគ្នា ១-១។ វេលាម៉ោង២:៣០នាទីរសៀល ក្រុមសសយក ក្រុងស្វាយរៀង បានក្លាយជាក្រុមតែមួយគត់ដែលបានចាញ់ក្នុងថ្ងៃបើកឆាក បន្ទាប់ពីត្រូវបាន U13 Blue Dragon លត់ដោយលទ្ធផល ៤-០។

ចំណែកវេលាម៉ោង៣:៣០នាទីរសៀល ក្រុម U13 ព្រះខ័នរាជស្វាយរៀង ទទួលបាន១ពិន្ទុពីលទ្ធផលស្មើ ២-២ ជាមួយក្រុម ស្រុកស្វាយទាប ហើយគូចុងក្រោយក៏ស្មើគ្នាទៀតគឺ យុវជនសាមគ្គី និង សសយក ស្រុកកំពង់រោទិ៍បានបញ្ចប់ដោយលទ្ធផល ១-១។

សូមបញ្ជាក់ថា នេះជាលទ្ធផលក្នុងសប្តាហ៍ទី១ វគ្គវិលជុំសន្សំពិន្ទុ ពានរង្វាន់ស្វាយរៀងខាប់អាយុ១៣ឆ្នាំ។ បន្ទាប់ពីចប់វគ្គវិលជុំសន្សំពិន្ទុ ក្រុមកំពូលទាំង៤នឹងឡើងទៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ៕