តារាយូធូប Jake Paul ត្រូវការពេល៦ឆ្នាំទៀតដើម្បីក្លាយជា​ជើង​ឯក​ពិភពលោក

លោក Jake Paul ដែលមនុស្សភាគ​ច្រើន​ស្គាល់ជាតារា YouTuber ល្បីល្បាញមួយរូបបានអភិវឌ្ឍខ្លួនក្លាយជាអ្នក​ប្រដាល់ ហើយបានចិញ្ចឹមចង់ក្លាយជាម្ចាស់ខ្សែក្រវាត់ពិភពលោកកម្រិតអាជីពថែមទៀតផង។

Jake Paul បាន​បង្កភាព​ភ្ញាក់ផ្អើល ក្រោយទទួលបានជ័យជំនះលើអតីត​កំពូល​អ្នក​ប្រដាល់​ទម្ងន់​ធ្ងន់​ Mike Tyson កាលពីសប្តាហ៍មុន។ ការប្រកួតនោះចៅក្រមបានដាក់ពិន្ទុក្នុងការប្រកួត ៨០-៧២, ៧៩-៧៣ និង ៧៩-៧៣ សម្រេចឲ្យតារា YouTuber វ័យ២៧ឆ្នាំឈ្នះជា​ឯកច្ឆន្ទ​។ ក្រោយ​បញ្ចប់ការប្រកួត Paul បាន​បង្ហាញ​មហិច្ឆតា​ក្នុង​​ការ​អភិវឌ្ឍ​ខ្លួន​ក្លាយ​ជា​អ្នក​ប្រដាល់​សកល​អាជីព ហើយ​អាច​នឹង​គ្រង​ខ្សែក្រវាត់ពិភពលោកក្នុងរយៈពេល​នា​ប៉ុន្មាន​ឆ្នាំ​ខាង​មុខ។

លោក Jake Paul បាននិយាយថា ៖«ខ្ញុំបានហាត់កីឡានេះ​៤ឆ្នាំហើយ ហើយខ្ញុំសកម្មខ្លាំង។ ប្រសិនបើអ្នករាល់គ្នាចង់មើល​ការ​ប្រកួត​ទៀត​ សូមទុកពេលឲ្យខ្ញុំ​ពីរ​ទៅ​បី​ខែទៀត។ ខ្ញុំនឹងសម្រេចអ្វីៗបានច្រើនជាងនេះ។ ខ្ញុំជឿថាខ្ញុំអាចក្លាយជាម្ចាស់ជើងឯកពិភពលោកក្នុងរយៈពេល៦ឆ្នាំខាង​មុខ»។

ការប្រកួតជាមួយ​លោក​ Mike Tyson បាន​ធ្វើ​ឲ្យ​ម្ចាស់​ខ្សែ​ក្រវាត់​ពិភព​លោក​របស់អង់គ្លេសគឺកីឡាករ Daniel Dubois ចាប់អារម្មណ៍ចង់​ណាត់​តារា​យូធូប​ Jake Paul ​ឡើង​សង្វៀន​ផ្លូវ​ការ​​ដើម្បី​ដណ្ដើមខ្សែក្រវាត់ពិភពលោក។

លោក Jake Paul បាន​ឆ្លើយ​តបថា ៖‍«បុរសម្នាក់បាន​ឡើង​សង្វៀន​រយៈពេល១២ឆ្នាំ ប្រកួតជាង១០០ដង ​ចាប់​ផ្តើម​តាំង​ការ​ប្រកួត​ស្ម័គ្រ​ចិត្ត រហូត​ក្លាយជា​​កីឡាករអាជីព បែរ​ជា​ចង់វាយជាមួយខ្ញុំដែល​មិន​មែន​ជា​កីឡាករអាជីព»។

ទោះ​បី​ជា​យ៉ាង​ណា ចិត្តជាកូនប្រុស Jake Paul ក៏មិនខ្លាចដែរ។ លោក​ហ៊ានទទួលយកសំណើររបស់​ Daniel Dubois ប៉ុន្តែ​ត្រូវការពេលវេលាបន្ថែមទៀត​ក្នុង​ការ​ត្រៀម​ខ្លួន។ កីឡាករ​ Dubois ជាម្ចាស់ខ្សែក្រវាត់ពិភព​លោក​ទម្ងន់ធ្ងន់ IBF៕

ប្រែសម្រួល៖ ផា រតនា