កីឡា

ជាប្រវត្តិសាស្ត្រដំបូង! នារីកម្ពុជា លត់ ទីម័រខាងកើត៣គ្រាប់ ឡើងវគ្គផ្តាច់ព្រ័ត្រ ASEAN Women’s Cup 2024

បានផុស

១ year មុន

នៅ

ថ្ងៃចន្ទ ២ ធ្នូ ២០២៤

ដោយ

ក្រុមបាល់ទាត់នារីជម្រើសជាតិកម្ពុជា បានឡើងទៅកាន់វគ្គផ្តាច់ព្រ័ត្រពានរង្វាន់ ASEAN Women’s Cup 2024 បន្ទាប់ពីបានយកឈ្នះ ក្រុមនារីទីម័រខាងកើត ដោយលទ្ធផល ៣-០ ក្នុងវគ្គពាក់កណ្តាលផ្តាច់ព្រ័ត្រ។

គ្រាប់បាល់ទី១រកបានដោយកីឡាការិនី សឿន វិផា សម្រាប់ការស៊ុតពិន័យ១១ម៉ែត្រនៅនាទី៣៦ និង២គ្រាប់ទៀតរកបានដោយកីឡាការិនី ពឿន គន្ធា នៅនាទី៧៤ និងនាទី៩០តាមរយៈការស៊ុតយ៉ាងស្អាតទាំងពីរគ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈជ័យជម្នះនេះ ក្រុមនារីកម្ពុជាបានបង្កើតប្រវត្តិសាស្ត្រជាលើកដំបូង ក្នុងការឡើងទៅកាន់វគ្គផ្តាច់ព្រ័ត្រ ពានរង្វាន់ ASEAN Women’s Cup បន្ទាប់ពីបង្កើតកំណត់ត្រាម្តងហើយក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រកាលពីថ្ងៃទី២៩ ខែវិច្ឆិកា ឆ្នាំ២០២៤។

អ្វីដែលកាន់តែពិសេស ក្រុមនារីកម្ពុជាបានធានាកៅអីដោយស្វ័យប្រវត្តិឈានទៅពានរង្វាន់នារីលំដាប់ទី១ប្រចាំតំបន់អាស៊ានគឺ ASEAN Women’s Championship ដែលមានក្រុមខ្លាំង ហ្វីលីពីន ថៃ និង វៀតណាម កំពុងរង់ចាំនៅឆ្នាំ២០២៥។

សូមបញ្ជាក់ថា ពានរង្វាន់ ASEAN Women’s Cup 2024 នឹងជ្រើសរើសយក៣ក្រុមគឺលេខ១ លេខ២ និងលេខ៣ ឡើងទៅកាន់ពានរង្វាន់ ASEAN Women’s Championship។ ជាក់ស្តែង ក្រុមនារីកម្ពុជាឡើងវគ្គផ្តាច់ព្រ័ត្រគឺមានន័យថា បើឈ្នះនៅវគ្គផ្តាច់ព្រ័ត្រ ទទួលបានលេខ១ ឬបើចាញ់ទទួលបានចំណាត់ថ្នាក់លេខ២៕