កីឡា

ធឿន ធារ៉ា ទទួលបានចំណូលមិនក្រោម១០ម៉ឺនដុល្លារក្នុងឆ្នាំ២០២៤

បានផុស

១ year មុន

នៅ

ថ្ងៃសុក្រ ២៧ ធ្នូ ២០២៤

ដោយ

ធឿន ធារ៉ា ជាកីឡាករគុនខ្មែរដែលមានតម្លៃខ្លួនខ្ពស់បំផុតក្នុងចំណោមកីឡាករទម្ងន់៧២គីឡូក្រាម បន្ទាប់ពីទទួលបានជោគជ័យខ្លាំងក្នុងអាជីពរយៈពេល៣ឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានធ្លាប់បានប្រាប់សារព័ត៌មាន«កម្ពុជាថ្មី»ក្នុងបទសម្ភាសពិសេសមួយថា រយៈពេល២ឆ្នាំចុងក្រោយ កីឡាករល្បីៗមួយចំនួនទទួលបានតម្លៃខ្លួនកើនឡើងយ៉ាងឆាប់រហ័ស។ ពីមុន ពួកគេទទួលបានតម្លៃខ្លួនចន្លោះពី៣០០ទៅ៤០០ដុល្លារប៉ុណ្ណោះ ប៉ុន្តែឥឡូវពួកគេទទួលបានចន្លោះពី១០០០ដុល្លារទៅ២០០០ដុល្លារក៏មាន។ ពេលខ្លះ ពួកគេប្រកួតដណ្តើមខ្សែក្រវាត់ដែលមានប្រាក់រង្វាន់ច្រើន និងប្រាក់ឧបត្ថម្ភផ្សេងៗទៀតនោះ គឺអាចទទួលបាន៣០០០ទៅ៥០០០ដុល្លារក្នុងមួយរាត្រី។

បើតាមព័ត៌មានក្រៅផ្លូវការ ធឿន ធារ៉ា ទទួលបានតម្លៃខ្លួនមិនក្រោម២០០០ដុល្លារក្នុងមួយប្រកួត។ លោក អេ ភូថង ជាគ្រូបង្វឹករបស់កីឡាករធ្លាប់បានឲ្យដឹងថា ការចេញទៅប្រកួតនៅក្រៅប្រទេស ធឿន ធារ៉ា ទាល់តែទទួលបានតម្លៃខ្លួនខ្ពស់ជាងនៅក្នុងស្រុកទើបអនុញ្ញាតឲ្យទៅ។ ជាក់ស្តែង ការប្រកួតនៅប្រទេសថៃ ទាល់តែបានតម្លៃខ្លួនចាប់ពី១សែនបាត (ប្រហែល៣០០០ដុល្លារ)ទើបលោកព្រមឲ្យទៅប្រកួត។

ទោះបីជាយ៉ាងណា តម្លៃខ្លួនទាំងការប្រកួតក្នុងស្រុក និងក្រៅប្រទេស អាចមានការប្រែប្រួលតិច ឬច្រើនជាងការកំណត់ គឺអាស្រ័យទៅលើម្ចាស់កម្មវិធី និងដៃគូសហការដែលអាចយោគយល់គ្នា។

បើគិតលើតម្លៃខ្លួនសុទ្ធលើការប្រកួត១៣ដងនៅក្នុងឆ្នាំ២០២៤ សរុបប្រហែលជិត៣ម៉ឺនដុល្លារអាមេរិក បូកនឹងវីឡាមួយខ្នងដែលមានតម្លៃប្រមាណ៧ម៉ឺនដុល្លារ ព្រមទាំងប្រាក់រង្វាន់ និងប្រាក់ឧបត្ថម្ភផ្សេងៗទៀតនោះគឺមិនក្រោម១០ម៉ឺនដុល្លារអាមេរិកឡើយដែល ធឿន ធារ៉ា ទទួលបាន។ នេះមិនទាន់គិតទៅការងារផ្សេងៗដូចជាថតផ្សាយពាណិជ្ជកម្មជាដើម។

ទស្សនាវដ្តីអាមេរិក Forbes បានចាត់ ធឿន ធារ៉ា ចូលក្នុងបញ្ជី «30 Under 30 Asia Class of 2024»ប្រចាំតំបន់អាស៊ីដែលផ្តោតលើសហគ្រិនជោគជ័យ បុគ្គលមានឥទ្ធិពល និងបុគ្គលមានវឌ្ឍភាពក្នុងអាជីពឈានដល់កម្រិតកំពូល។

ស្ថិតិប្រកួតមិនចាញ់ក្នុងឆ្នាំ២០២៤

ឈ្នះកឡាករចិន Jiao Zhou ទឹកទី១ នៅថ្ងៃទី១៩ ខែមករា
ឈ្នះកីឡាករកូរ៉េ Kim Hyunjun ទឹកទី១ នៅថ្ងៃទី១៣ ខែមីនា
ឈ្នះកីឡាករបេឡារុស្ស Pavel Grishanovich ដោយពិន្ទុ នៅថ្ងៃទ១៤ ខែមីនា
ឈ្នះកីឡាករអ៊ុយក្រែន Nikita Gerasismovich ដោយពិន្ទុ ថ្ងៃទី៣១ ខែមីនា ការពារខ្សែក្រវាត់
ឈ្នះកីឡាកររុស្ស៊ី Podgornov Andreii ទឹកទី១ នៅថ្ងៃទី១៣ ខែមេសា ទទួលបានខ្សែក្រវាត់
ឈ្នះកីឡាករចិន Ji Long Theng ទឹកទី១ នៅថ្ងៃទី១៥ ខែឧសភា
ឈ្នះកីឡាករអេស្ប៉ាញ Alexander Skvortosv ទឹកទី៣ ថ្ងៃទ១៦ ខែមិថុនា ទទួលបានខ្សែក្រវាត់
ឈ្នះកីឡាករចិន Yue Shuai ទឹកទី៣ សម្រាប់ការប្រកួត ឃីកបុកស៊ីង ថ្ងៃទី២១ ខែកក្កដា
ឈ្នះកីឡាករអេស្ប៉ាញ Edye Ruiz ទឹកទី២ នៅថ្ងៃទី១៥ ខែសីហា ទទួលបានខ្សែក្រវាត់
ឈ្នះកីឡាករប្រេស៊ីល Victor Teixeira ទឹកទី៣ ថ្ងៃទី៨ ខែកញ្ញា នៅកូរ៉េខាងត្បូង
ឈ្នះកីឡាករប្រេស៊ីល បារាំង និងអូស្ត្រាលី នៅថ្ងៃទី១៥ ខែកញ្ញា ទទួលបានខ្សែក្រវាត់ 8 Men Tournament
ឈ្នះកីឡាករចិន Zeng Donghui ទឹកទី១ ថ្ងៃទី៤ ខែតុលា
ឈ្នះកីឡាករម៉ុងហ្គោលី Namuung Erel ទឹកទី២ នៅថ្ងៃទី១៥ ខែធ្នូ