កីឡា

គ្រូបង្វឹក៧០នាក់រៀនបច្ចេកទេស ត្រៀមយុទ្ធគុនចម្រុះខ្មែរបុរាណពានរង្វាន់សម្តេចធិបតីលើកទី២

បានផុស

៣ ខែ មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

គ្រូបង្វឹកចំនួន៧០នាក់បានចូលរៀនវគ្គបណ្តុះបណ្តាលបំប៉នបច្ចេកទេស លើកទី១ សម្រាប់ការត្រៀមខ្លួនរៀបចំការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចធិបតី លើកទី២ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាយុទ្ធគុនចម្រុះកម្ពុជា និងគណៈកម្មការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណពានរង្វាន់សម្តេចធិបតី នៅថ្ងៃទី៩ ខែមករា ឆ្នាំ២០២៥ បានបើកវគ្គបណ្តុះបណ្តាលស្តីពីបច្ចេកទេសយុទ្ធគុនចម្រុះខ្មែរបុរាណ លើកទី១ នៅអគាររបស់សាលាគុនធម៌ តាមបណ្តោយផ្លូវ២០០៤ ដែលមានសិក្ខាកាម៧០នាក់មកពីទូទាំងប្រទេសចូលរួមរៀនរយៈពេល៣ថ្ងៃ។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលបានអញ្ជើញជាអធិបតីក្នុងពិធីបើកវគ្គបណ្តុះបណ្តាល បានលើកឡើងថា វគ្គបណ្តុះបណ្តាលដើម្បីបំប៉នបច្ចេកទេស និងស្មារតីដល់គ្រូបង្វឹកនេះគឺធ្វើឡើងស្របតាមការយកចិត្តទុកដាក់ និងចក្ខុវិស័យវែងឆ្ងាយរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

គោលបំណងសំខាន់នៃវគ្គបណ្តុះបណ្តាលនេះគឺដើម្បីពង្រឹងបច្ចេកទេស សមត្ថភាព និងស្មារតីដល់គ្រូបង្វឹក និងអ្នកជំនាញដើម្បីឲ្យយល់កាន់តែច្បាស់ពីគោលការណ៍ បច្ចេកទេស និងក្បាច់គុនចម្រុះដ៏សំបូរបែបរបស់បុព្វបុរសដូនតាខ្មែរដែលបានបន្សល់ទុកដល់កូនចៅជំនាន់ក្រោយ។

លោកមានប្រសាសន៍ថា ៖«ថ្ងៃនេះអ្វីដែលយើងផ្តោតការយកចិត្តទុកដាក់គឺឲ្យគ្រូបង្វឹកទាំងអស់ចេះទ្រឹស្តីកីឡា ចេះរៀបចំផែនការបង្វឹកបង្ហាត់ទាំងបច្ចេកទេស និងកម្លាំងកាយដែលធ្វើយ៉ាងណាផ្តល់ឲ្យកូនសិស្សមានភាពធន់ កម្លាំងកាយល្អ និងសមត្ថភាពខ្ពស់»។ វគ្គបណ្តុះបណ្តាលនេះមានគ្រូឧទ្ទេសដែលមានជំនាញគុនចម្រុះ ចំបាប់ និងការប្រយុទ្ធឈរ។ ជាមួយគ្នានេះ វគ្គបណ្តុះបណ្តាលក៏ផ្តល់ជូននូវលក្ខន្តិកៈ និងគោលការណ៍នៃការប្រកួត ក្រមសីលធម៌មួយចំនួនទៀតដល់សិក្ខាកាមទាំងអស់។

លោក វ៉ាត់ ចំរើន បានសង្កត់ធ្ងន់ថា នេះជាគំរូដ៏ល្អមួយក្រោមការដឹកនាំ ចង្អុលបង្ហាញ និងអនុសាសន៍ដ៏ខ្ពង់ខ្ពស់របស់សម្តេចបវរធិបតីដើម្បីអភិវឌ្ឍធនធានមនុស្សឲ្យមានចីរភាពក្នុងការជំរុញ លើកកម្ពស់ អភិរក្ស និងអភិវឌ្ឍកីឡាយុទ្ធគុនចម្រុះខ្មែរបុរាណដ៏សំបូរបែបឲ្យមានក្បួនខ្នាតច្បាស់លាស់ដើម្បីថែរក្សាឲ្យគង់វង់យូរអង្វែង។

នេះជាវគ្គបណ្តុះបណ្តាលលើកទី១ដែលមានគ្រូបង្វឹក៣០នាក់មកពីតាមបណ្តាខេត្តឆ្ងាយ និង៤០នាក់មកពីខេត្តជិតៗរាជធានីភ្នំពេញ។ វគ្គបណ្តុះបណ្តាលបន្តបន្ទាប់ទៀតគឺវគ្គទី២ ការបណ្តុះបណ្តាលអាជ្ញាកណ្តាល-ចៅក្រម ក្នុងខែមីនា, វគ្គទី៣ ការបណ្តុះបណ្តាលបច្ចេកទេសយុទ្ធគុនចម្រុះខ្មែរបុរាណ ក្នុងខែឧសភា និងវគ្គ៤ ការបណ្តុះបណ្តាលអាជ្ញាកណ្តាល-ចៅក្រម ក្នុងខែសីហា។

ជាចក្ខុវិស័យវែងឆ្ងាយ វគ្គបណ្តុះបណ្តាលនឹងកាន់តែលំអិត និងជំនាញកម្រិតស្តង់ដាអន្តរជាតិនៅពេលគណៈកម្មការចំពោះកិច្ចគ្រោងនឹងអញ្ជើញអ្នកជំនាញអន្តរជាតិមកចែករំលែក និងផ្តល់ចំណេះដឹង។ លោក វ៉ាត់ ចំរើន បានបន្ថែមថា ឆ្នាំក្រោយៗទៀត គណៈកម្មការចំពោះកិច្ចនឹងធ្វើការជាមួយអ្នកជំនាញអន្តរជាតិដែលមានជំនាញកីឡាយុទ្ធគុនចម្រុះដូចជា នៅស្ថាវ័ន ONE Championship និង UFC ជាដើមដើម្បីមកផ្តល់ចំណេះដឹង។

តាមកាលកំណត់ ការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចធិបតី លើកទី២ គ្រោងនឹងធ្វើរយៈពេល៤ថ្ងៃគឺទី១៦ ១៧ ១៨ និង១៩ ខែតុលា ឆ្នាំ២០២៥ នៅពហុកីឡដ្ឋានជាតិមរតកតេជោ៕